¹ ۱۔ اِے نادان گلتیو! کئیں نے تُہاڈے تے افسوس کیتا ہِے؟ ایویں ہِے کہ تُہاڈی اکھیاں دے سامنے یسوع مسیح کوُ صلیب تے ڈِکھایا گئے۔ ² ۲۔ میں تُہاڈے کولوں صرف اِے پُچھنا چاہندا ہاں کہ تُساں شریعت دے اعمال توں روُح کو پائے یا ایمان دے پیغام نال؟۔ ³ ۳۔ کیا تُساں ایہو جئے نادان ہو جوروُح دے طور تے شروع کر کے ہُن جسم دے طور تے کم پورا کرنا چاہندے ہیوے؟۔ ⁴ ۴۔ اِے ساریاں تکلیفاں ایویں بے فائدہ ای چاتیاں ہِن؟ پر شاید بےفائدہ نئیں۔ ⁵ ۵۔ پر جیہڑا تُہاکوُ روُح ڈیندے تے تُہاڈے وِچ معجزے ظاہر کریندا ہِے کیا اوہ شریعت دے اعمال دے پاروں اِے کریندا ہِے یا ایمان دے پیغام دے نال؟۔ ⁶ ۶۔ چنانچہ ابراہام خدا تے ایمان گھِن آیا اَتے ایہہ اوُندے کیتے راستبازی گِنا گِیا۔ ⁷ ۷۔ وَل تُساں ہُن جان گھِنو کہ جیہڑے ایمان آلے ہِن اوُہو ابرہام دے پُتر ہِن۔ ⁸ ۸۔ اَتے کتابِ مُقدس نے پہلے توں اِے جان کے کہ خُدا غیرقوماں کوُ ایمان دے نال راستباز ٹھہراسی تاں پہلے ای توں ابرہام کوُ ایہہ خوشخبری سُنائی جو تیڈے پاروں ساریاں قوماں برکت پاسن۔ ⁹ ۹۔ پس جیہڑے ایمان آلے ہِن اوہ ایماندار ابرہام دے نال برکت پاندے ہِن۔ ¹⁰ ۱۰۔ کیونکہ جتنے وی شریعت دے اعمال دے بھروسہ کریندِن اوہ سارے سزا دے حقدار ہِن۔ چنانچہ لکھا لاتھے کہ جو کوئی اُنہاں ساریاں گالہیں دے کرن تے قائم نئیں راہندا جیہڑیاں شریعت دی کتاب اچ لکھیاں لاتھِن اوہ لعنتی ہِے۔ ¹¹ ۱۱۔ اَتے ایہہ گالہہ وی ظاہر ہِے جو شریعت دے پاروں کوُئی وی بندہ خدا دے نیڑے راستباز نئیں تھی سگدا کیونکہ لکھا لاتھے کہ راستباز ایمان نال جیوندا راہسی۔ ¹² ۱۲۔ تے شریعت کوُ ایمان نال کجھ وی واسطہ نئیں بلکہ لکھا لاتھے کہ جئیں نے اُنہاں تے عمل کیتے اوہ اُنہاں دے پاروں جیوندا راہسی۔ ¹³ ۱۳۔ مسیح جو ساڈے کیتے لعنتی بن گئیے اوُں نے ساکوُ مُل گھِن کے شریعت دی سزا توں چھُڑائے کیوں جو لکھا لاتھے کہ جیہڑا کوُئی لکڑی تے لٹکایا گئیے اوہ لعنتی ہِے۔ ¹⁴ ۱۴۔ تاں جو مسیح یسوع اِچ ابرہام دی برکت غیرقوماں تک وی پہنچے اَتے اساں ایمان دے وسیلے نال اوُں روُح کوُ گھِنوں جیندا وعدہ کیتا گیا ہا۔ ¹⁵ ۱۵۔ اِے بھراو! میں انسان دے طور تے آدھا ہاں کہ اگرچہ بندے ہی دا عہد ہووے جڈاں اوُں دی تصدیق تھی گئی تاں کوُئی اوُں کو بےکار نئیں کریندا اَتے نہ ای اوُندے اِچ کجھ ودھاسی ۔ ¹⁶ ۱۶۔ پس ابرہام تے اوندی نسل نال وعدے کیتے گئے۔ اوہ ایہہ نئیں آدھا کہ نسلاں نال۔ جیویں ڈوجہیاں دے کیتے آکھیا ویندے بلکہ جیویں ہِک دے کیتے کہ تیڈی نسل کوُ اَتے اوہ مسیح ہِے۔ ¹⁷ ۱۷۔ میڈا اِے مطلب ہِے کہ جیہڑے عہد دی خدا نے پہلے توں تصدیق کیتی ہا اوُں کوُ شریعت چارسو تریہی سال دے بعد آکے باطل نہیں کر سگدی کہ اوہ وعدہ بےفائدہ ہووے۔ ¹⁸ ۱۸۔ کیوں جو اگر میراث شریعت دے پاروں ملی ہِے تاں وعدہ دے پاروں نہ تھئی پر ابرہام کوُ خدا نے وعدہ دے پاروں ہی ڈِتی۔ ¹⁹ ۱۹۔ وَل شریعت کیا تھئی؟ اوہ نافرمانیاں دے پاروں بعد اِچ ڈِتی گئی کہ اوُں نسل دے آون تک راہے جئیں دا وعدہ کیتا گیا ہا اَتے اوہ فرشتیاں دے وسیلے نال ہَک درمیانی دے پاروں مقرر کیتی گئی۔ ²⁰ ۲۰۔ ہُن درمیانی ہِک دا نئیں پر خدا ہِک ای ہِے۔ ²¹ ۲۱۔ وَل کیا شریعت خدا دے وعدیاں دے خلاف ہِے؟ ہرگز نئیں! کیونکہ اگر کوُئی ایہو جئی شریعت ڈِتی ویندی جیہڑی زندگی بخش سگدی تاں البتہ راستبازی شریعت دے پاروں ہووے ہا۔ ²² ۲۲۔ مگر کتابِ مُقّدس نے ساریاں کوُ تابع فرمان کر ڈِتاتاں جو اوہ وعدہ جیہڑا یسوع مسیح تے ایمان گھِن آون تے ختم ہِے ایمانداراں دے حق اِچ پورا کیتا ونجے۔ ²³ ۲۳۔ ایمان دے آون توں پہلے شریعت دی ماتحتی اِچ ساڈی نگرانی تھیندی ہائی اَتے اوُں ایمان دے آون تائیں جیہڑا ظاہر تھیون آلا ہا اساں اوُں دے پابند راہے۔ ²⁴ ۲۴۔ وَل شریعت مسیح تائیں پہنچاون کوُ ساڈا استاد بنی تاں جو اساں ایمان دے پاروں راستباز ٹھہروں۔ ²⁵ ۲۵۔ پر جیہڑے ویلے ایمان آگیئے تاں اساں اُستاد دے ماتحت نہ رہے۔ ²⁶ ۲۶۔ کیونکہ تُساں سارے اوُں ایمان دے پاروں جیہڑا یسوع مسیح اِچ ہِے خدا دے پُتر ہو۔ ²⁷ ۲۷۔ تُساں ساریاں جنہاں نے مسیح اِچ شامل تھیون دا بپتسمہ گِدے مسیح کو کپڑیاں آلی کار پاگِدے۔ ²⁸ ۲۸۔ نہ کوئی یہودی ریہا نہ یونانی۔ نہ کوئی غلام نہ آزاد۔ نہ کوئی مَرد نہ تریہمت کیونکہ تُساں سارے مسیح یسوع اِچ ہک ہیوے۔ ²⁹ ۲۹۔ اَتے اگر تُساں مسیح دے ہیوے تاں ابرہام دی نسل تے وعدہ دے مطابق وارث ہیوے۔