¹ ۱۔ پس اَے میڈے پُتر! تُوں اوُں فضل توں جو مسیح یسوع اِچ ہِے مضبوط بن۔ ² ۲۔ اَتے جو گالہیں تُوں بہوُں سارے گواہاں دے سامنے میڈے کولوں سُنیاں ہَن اُنہاں کوُ ایہو جئے دیانتدار بندیاں دے حوالے کر جیہڑے ڈوجھیاں کوُ وی سِکھاون دے قابل ہوون۔ ³ ۳۔ مسیح یسوع دے چنگے سپاہی دی کار میڈے نال ڈُکھ چا۔ ⁴ ۴۔ کوُئی سپاہی جڈاں لڑائی کیتے ویندا ہِے اپنے آپ کو دُنیا دے معاملیاں وِچ نئیں پھسینداتاں جو اپنے بھرتی کرن آلے کوُ خوش کرے۔ ⁵ ۵۔ دَنگل وِچ مقابلہ کرن آلا وی اگر اوُں نے باقائدہ مقابلہ نہ کیتا ہوئے تاں سہرا نئیں پا سگدا۔ ⁶ ۶۔جیہڑا کسان محنت کریندِے اپنی فصل دا حصہ پہلے اوُں کوُ ملنا چاہیدِے۔ ⁷ ۷۔جو میں آدھا ہاں اوُندے تے غور کر کیونکہ خداوند تیکوُ ساریاں گالہیں دی سمجھ ڈیسی۔ ⁸ ۸۔ یسوع مسیح کوُ یاد رکھ جیہڑا مُردیاں وِچوں زندہ تھیا ہِے اَتے داؤد دی نسل ویہِے۔ میڈی اوُں خوشخبری دے موافق۔ ⁹ ۹۔جئیں کیتے میں بدکار دی کار ڈُکھ چیندا ہاں اِتھوں تک کہ قید اِچ ہاں پر خدا دا کلام قید نئیں۔ ¹⁰ ۱۰۔ اِیں دے پاروُں میں چُنے ہوئے لوگاں دی خاطر سب کجھ برداشت کریندا ہاں تاں جو اوہ وی اوُں نجات کوُ جو یسوع مسیح اِچ ہِے ابدی جلال سمیت حاصل کرن۔ ¹¹ ۱۱۔ایہہ گالہہ سچ ہِے کہ جڈاں اساں اوُندے نال مَر گئے تاں اوُندے نال زندہ وی راہسوں۔ ¹² ۱۲۔ اگر اساں ڈُکھ برداشت کریسوں تاں اوُندے نال بادشاہی وی کریسوں۔ اگر اساں اوُندا انکار کریسوں تاں اوہ وی ساڈا انکار کریسی۔ ¹³ ۱۳۔ اگر اساں بےوفا تھی ویسوں تاں وی اوہ وفادار راہسی کیوں جو اوہ آپ اپنا انکار نئیں کر سگدے۔ ¹⁴ ۱۴۔ ایہہ گالہیں اُنہیں کوُ یاد ڈیوا اَتے خداوند دے سامنے تاکید کر کہ لفظی بحث نی کرن جیندے توں کجھ وی حاصل نئیں تھیندا بلکہ سُنن آلےوگڑ ویندِن۔ ¹⁵ ۱۵۔ اپنے آپ کوُ خدا دے سامنے مقبول تے ایہو جئے کم کرن آلے دی کار پیش کرن دی کوشش کر جئیں کوُ شرمندہ تھیونا نہ پووے اَتے جیہڑا حق دے کلام کوُ ٹھیک طریقے نال استمعال کریندا ہووے۔ ¹⁶ ۱۶۔لیکن بےہودہ بکواس توں پرہیز کر کیونکہ ایہو جئے بندے بہوُں بےدینی اِچ ترقّی کریسن۔ ¹⁷ ۱۷۔ اَتے اُنہاں دا کلام اوُں زخم دی کار ہِے جیہڑا ٹھیک نئیں تھیندا وگڑدا لگا ویسی۔ ہُمِنِیُس تے فلِتُس اُنہاں وِچوں ای ہِن۔ ¹⁸ ۱۸۔ اوہ ایہہ آکھ کے کہ قیامت تاں تھی گئی ہِے حق توں گمراہ تھی گئے ہِن اَتے بعض دا ایمان وگِاڑ ڈیندِن۔ ¹⁹ ۱۹۔ تاں وی خدا دی مضبوط بنیاد قائم راہندی ہِے اَتے اوُندے تے ایہہ مُہر ہِے کہ خداوند اپنیاں کوُ سُنجاندِے اَتے جو کوُئی خداوند دا ناں گھِندے ناراستی توں باز راہوے۔ ²⁰ ۲۰۔ وڈے گھر وِچ نہ صرف سونے چاندی ہی دے بھانڈے ہوندِن بلکہ لکڑی تے مٹی دے وی۔ بعض عزّت تے بعض ذِلّت کیتے۔ ²¹ ۲۱۔ پس جو کوُئی اِنہاں توں اَنج تھی کے اپنے آپ کوُ پاک کریسی اوہ عزّت دا بھانڈا تے مُقّدس بنسی اَتے مالک دے کم دے لائق تے ہر نیک کم کیتے تیار ہوسی۔ ²² ۲۲۔ جوانی دیا خواہشاں کولوں بھج تے جیہڑے پاک دِل دے نال خداوند توں دعا کریندِن اُنہاں دے نال راستبازی تے ایمان تے محبت تے صُلح دا طالب تھی۔ ²³ ۲۳۔ پر بےوقوفی تے گھٹ عقلی دی بحث توں کنارہ کر کیونکہ تیکوُ پتہ ہِے جو اِنہاں دے نال جھگڑے پیدا تھیندِن۔ ²⁴ ۲۴۔ اَتے ایہہ مناسب نئیں کہ خداوند دابندا جھڑے بلکہ ساریاں دے نال نرمی اختیار کرے ا۔تے تعلیم ڈیون دے لائق تے برداشت کرن آلا ہووے۔ ²⁵ ۲۵۔ اَتے مخالفاں کوُ وڈی حلیمی نال سکھاوے۔ شاید خدا اُنہاں کوُ توبہ دی توفیق بخشے تاں جو اوہ ھق کوُ سُنجان گھنن۔ ²⁶ ۲۶۔ تے خدا دے بندے دے ہتھ توں خدا دی مرضی دے قیدی تھی کے ابلیس دے پھندے توں آزاد تھی ونجن۔