1
۱۔پولُس دی طرفوںجو اوُں زندگی دے وعدہ دے موافق جو مسیح یسوع وِچ ہِے خدا دی مرضی نال یسوع دا رسول ہِے۔
2
۲۔ پیارے پُتر تیمتھیس دے ناں۔ فضل۔ رَحم تے اطمینان خدا باپ تے ساڈے خداوند مسیح یسوع دی طرفوں تیکوُ مِلدا راہوے۔
3
۳۔ جئیں خدا دی عبادت میں صاف دِل نال پیو ڈاڈے دے طور تے کریندا ہاں اوُں دا شکر ہِے کہ اپنی دعاواں اِچ روزانہ تیکوُ یاد رکھیندا ہاں۔
4
۴۔ اَتے تیڈے ہنجواں کوُ یاد کر کے ڈِیں رات تیڈے نال مِلن دا مشتاق راہندا ہاں تاں جو خوشی نال بھر ونجاں۔
5
۵۔ اَتے میکوُ تیڈا اوہ ریاکاری توں آزاد ایمان یاد ڈیوایا گیا ہِے جو پہلے تیڈی نانی لُوئس تے تیڈی ماں یونیکے رکھدیاں ہَن اَتے میکوُ یقین ہِے کہ تُو وی رکھیندا ہئیں۔
6
۶۔ اِیں دے پاروُں میں تیکوُ یاد ڈیویندا ہاں کہ تُو خدا دی اوُں نعمت کوُ چمکا ڈے جو میڈے ہتھ رکھن دے پاروُں تیکوُ مِلی ہِے۔
7
۷۔ کیونکہ خدا نے ساکوُ دہشت دی روُح نئیں بلکہ قدرت تے محبت تے تربیت دی روُح ڈِتی ہِے۔
8
۸۔ پس ساڈے خداوند دی گواہی ڈیون نال تے میڈے کولوں جیہڑا اوُں دا قیدی ہاں شرم نہ کر بلکہ خدا دی قدرت دے موافق خوشخبری دی خاطر میڈے نال ڈُکھ چا۔
9
۹۔ جئیں نے ساکوُ نجات ڈِتی تے پاک بلاوے تھوں سڈیا ساڈے کماں دے موافق نئیں بلکہ اپنے خاص ارادہ تے اوُں فضل دے موافق جیہڑا یسوع مسیح اِچ ساڈے تے ازل توں تھیئے۔
10
۱۰۔پر ہُن ساڈے مُنجی مسیح یسوع دے ظہور توں ظاہر تھیئے جئیں نے موت کوُ ختم کر کے تے زندگی تے بقا کوُ اوُں خوشخبری دے وسیلے نال روشن کر ڈِتے۔
11
۱۱۔ جئیں کیتے میں مُنادی کرن آلا تے رسول تے استاد مقرر تھیا۔
12
۱۲۔ اِیں دے پاروُں میں اِے ڈُکھ وی چاتے لیکن شرم نئیں کیتی کیونکہ جئیں دا میں یقین کیتا ہِے اوُں کوُ جان دا ہاں اتے میکوُ یقین ہِے کہ اوہ میڈی امانت دی اوُں ڈِیں تک حفاظت کر سگدے۔
13
۱۳۔ جو صحیح گالہیں تُوں میڈے کولوں سُنیاں ہِن اوُں ایمان تے محبت دے نال جو مسیح یسوع وِچ ہِے اوُں دا خاکہ یاد رکھ۔
14
۱۴۔ روُح القدس دے وسیلے نال جو ساڈے وِچ راہندے اِیں چنگی امانت دی حفاظت کر۔
15
۱۵۔ تُوں ایہہ جان دا ہئیں کہ آسیہ دے سارے لوگ میڈے توں پھر گئے ہِن۔ جنہاں وِچوں فُوگلُس تے ہر مُگِنیُس ہِن۔
16
۱۶۔ خداوند اُنیسفرُس دے گھرانے تے رَحم کرے کیونکہ اوُں نے بہوُں واری میکوُ تازہ دَم کیتے اَتے میڈی قید توں شرمندہ نہ تھیا۔
17
۱۷۔ بلکہ جڈاں اوہ روما وِچ آیا تاں کوشش نال لبھ کے میکوُ مِلے۔
18
۱۸۔ ( خداوند اوُں کوُ ایہہ بخشے جو اوُں ڈِیں تے خداوند دا رَحم تھیوے ) اَتے اوُں نے اِفسس اِچ جو جو خدمتاں کیتیا ہِن تُوں اُنہاں کوُ چنگی طرح جان دا ہئیں۔