¹ ۱۔ میں آپنے باغ وچ آیا ہاں ائے میری سوہنی! میری ووہٹی! میں آپنا مر آپنے بلسان سنھے کٹھا کیتا میں آپنا شہد چھتے سنھے کھا لئیا میں آپنی مئے دُدھ سنھے پی لئی اے ائے سجنو! کھاؤو پیؤو پیؤو! ہاں ائے پیاریو! چنگا جی بھر کے پیؤو ² ۲۔ میں سُتی ہاں پر میرا من جاگدا اے میرے سوہنے دی واج اے، جہڑا کھڑکاؤندا اتے آکھدا اے میرے جوگی بوہا کھول میری سوہنی! میری پیاری! میری کبوتری! میری پاکیزہ! کیوں جو میرِیاں لِٹاں رات دی تریل نال بھریاں نیں ³ ۳۔ میں تاں کپڑے لاہ بیٹھی، ہون فیر کِویں پاؤاں؟ میں تاں آپنے پیر دھؤ بیٹھی، ہون اوہنوں کِویں میئلا کراں؟ ⁴ ۴۔ میرے سوہنے نے آپنا ہتھ موری وچوں اندر واڑیا اتے میرے دل اتے جگر وچ اوہدے جوگی تھرتھل ہوئی ⁵ ۵۔ میں آپنے سوہنے جوگی بوہا کھولن اُٹھی اتے میرے ہتھوں مُر ٹِپیا اتے میرِیاں اُنگلاں وچوں گھاڑا مُر ٹِپیا اتے جندرے دے دستانیاں اُتے پئیا ⁶ ۶۔ میں آپنے سوہنے جوگی بوہا کھولیا پر میرا سوہنا پچھاں نوں مُڑ کے ٹر گئیا جدوں اوہ بولئیا تاں میرے ہوش گُم ہو گئے میں اوہنوں لبھیا پر اوہ نا مِلیا ⁷ ۷۔ پۂرے جہڑے شہر وچ پھردے نیں، مینوں مِلے اوہناں مینوں ماریا اتے پھٹڑ کیتا لُکن دے شہر دے راکھیاں نے میری چُنی میتھوں کھو لئی ⁸ ۸۔ ائے یروشلیم دی دِھیؤ! میں تہانوں سونھ دینی ہاں پئی جیکر میرا سوہنا تہانوں ملے تاں اوہنوں آکھنا پئی میں عشق دی ماری ہاں ⁹ ۹۔ تیرے سوہنے نوں دوجے سوہنے اُتے کیہ اُچیچ اے؟ ائے بیبیاں وچوں سبھناں تھوں سوہنی! تیرے سوہنے نوں کسے دوجے سوہنے اُتے کیہ اُچیچ اے؟ جہڑا توں سانوں سونھ دینی ایں؟ ¹⁰ ۱۰۔ میرا سوہنا سُوہا اتے چٹا اے اوہ دس ہزاران وچوں وکھرا اے ¹¹ ۱۱۔ اوہدا سر خالص سونا اے اوہدِیاں لِٹاں کُنڈلیاں اتے کاں وارگی کالیاں نیں ¹² ۱۲۔ اوہدیاں اکھاں اوہناں کبوتراں وانگ نیں جہڑے دُدھ وچوں نھا کے دریا دے کنڈے سج کے بیٹھے ہون ¹³ ۱۳۔ اوہدیاں گلھاں پھُلاں دے باغ اتے بلسان دیاں کھلوتیاں کیاریاں نیں اوہدے بُلھ سوسن نیں، جنہاں وچوں گھاڑا مُر ٹِپدا اے ¹⁴ ۱۴۔ اوہدے زبرجد نال سجے سونے دے گپھے نیں اوہدا ڈڈھ ہاتھی دنداں دا کم جاپدا اے، جہدے اُتے نیلم دے پھُل بنے ہون ¹⁵ ۱۵۔ اوہدیاں لتاں کندن دے پاؤیاں اُتے مرمر دے پتھر دے تھم نیں اوہ ویکھن وچ لبنان اتے چنگیائی وچ سرو دے رُکھ جہیا اے ¹⁶ ۱۶۔ اوہدا مونھ چوکھا مِٹھا اے۔ ہاں اوہ سِر تھوں پیراں تیکر عشق اے ائے یروشلیم دی دِھیؤ! ایہہ وے میرا سوہنا۔ ایہہ وے میرا پیارا۔