¹ ۱۔ ویکھ! توں سوہنی ایں، ائے میری پیاری! ویکھ توں سوہنی ایں۔ تیری اکھاں تیرے اوہلے دے تھلے دو کبوتر نیں۔ تیرے وال بکریاں دے گلے وانگ نیں جہڑی جلعاد دے پہاڑ اُتے بیٹھیاں ہون ² ۲۔ تیرے دند بھیڈا دے ریوڑ وانگ نیں جنہاں دے وال کُترے گئے ہون اتے جنہاں نوں نھؤایا گئیا ہؤے۔ جنہاں وچوں ہر اک نے دو بچے دِتے ہون اتے اوہناں وچ اک وی بانجھ نا ہؤے۔ ³ ۳۔ تیرے بُل قرمزی ڈورے نیں تیرا مونھ دل نوں لبھاندا اے تیرے کناں دے حالے تیرے نقاب دے تھلے انار دے دو ٹوٹے لگدے نیں۔ ⁴ ۴۔ تیری دھؤن داؤد دا برج اے، جہڑا توپ خانے جوگی بنیا جہدے اُتے ہزار سِپراں لمکائیاں گئیاں نیں۔ اوہ سبھے پہلواناں دِیاں سِپراں نیں ⁵ ۵۔ تیری دونوِیں چھاتِیاں دو جُڑواں ہِرنی دے بچے نیں جہڑے سوسناں وچ چردے نیں ⁶ ۶۔ جدوں تیک دھمی ویلا نا ہؤے اتے پرچھانواں نا ودھے میں مُر دے پہاڑ اتے لُبان دے ٹِبے اُتے جا کے رہؤاں گا ⁷ ۷۔ ائے میری پیاری! توں سر تھوں پیر تیکر حسین ایں تیرے وچ کوئی عیب نئیں۔ ⁸ ۸۔ لبنان تھوں میرے نال ائے ووہٹی! توں لبنان تھوں میرے نال ٹری آ اماناؔ دے سِر اُتوں سنیرؔ اتے حرمونؔ دی سِر اُتوں شیراں دی کھوہ وچوں اتے چیتیاں دے پہاڑاں اُتے نگاہ پھیر ⁹ ۹۔ ائے میری پیاری! میری ووہٹی! توں میرا دل لُٹ لئیا اے آپنی اکو نگاہ نال۔ آپنی دھؤن دے اک ہار نال توں میرا دل ناس کر چھڈیا ¹⁰ ۱۰۔ ئے میری پیاری! میری ووہٹی! تیرا عشق کجہیا ودھیا اے تیری محبت مئے نالوں ودھ کے سوادی اے اتے تیرے عطراں دی مھک سبھناں قِسماں دی خشبو نالوں ودھیا اے ¹¹ ۱۱۔ ائے میری ووہٹی! تیرے بُلھاں تھوں شہد ٹِپدا اے شہد اتے دُدھ تیری جیبھ تھلے نیں تیرے لباس دی خشبو لبنان ورگی اے ¹² ۱۲۔ میری سوہنی! میری ووہٹی اک بند بغیچا اے اوہ محفوظ سوتا اتے مہر لگئیا چشما اے ¹³ ۱۳۔ تیرے باغ دے بوٹے سوادی انار نیں مہدی اتے سنبل وی نیں ¹⁴ ۱۴۔ جٹا ماسی اتے زعفران بید مُشک اتے دار چینی اتے لبنان دے سبھے رُکھ۔ مُر اتے عود اتے سبھناں قِسماں دی خشبو ¹⁵ ۱۵۔ توں باغاں وچ اک منبع جیون جل دا چشما اتے لبنان دا جھرن اے ¹⁶ ۱۶۔ ائے شمالی واء ہوش کر! اے جنوبی واہ ٹری آ! میرے باغ وچوں لنگھ تاں جو اوہدی خشبو کھِلرے میرا سوہنا آپنے باغ وچ آؤے اتے آپنے سوادلے میوے کھاؤے۔