1
۔تے خُداوند نے مُوسیٰؔ نُوں کلام کرکے آکھیا۔
2
۔بنی اسرائیل ؔ نُوں حُکم کَر پئی ہَر اِک کوڑھی تے ہَر اک جریان دے مریِض نُوں تے ہَر اِک نُوں جیہڑا لاش دے سببوں پلیت نیں اوہ خیمے گاہ توں باہر کڈھ دین۔
3
۔مَرد ہوے یا عورت اوہ باہر کڈھ دِتی جاوے ۔ تُوں اوہنوں خیمے گا ہ چوں باہر کڈھ دیو۔کیوں جو اوہ اَپنے ڈیریاں نُوں جِتھے میں رِہنا واں پلیِت ناں کرن ۔
4
۔ تے بنی اسرئیل ؔ نے اینج ای کیِتا ۔ تے اوہناں نُوں خیمہ گاہ چوں باہر کڈھ دِتا ۔جِس طراں خُداوند نے مُوسیٰؔ نُوں حُکم دِتا سی ۔ بنی اسرائیل ؔ نے اونج ای کیِتا ۔
5
۔تے خُداوند مُوسیٰ ؔ نُوں کلام کرکے آکھیا ۔
6
۔ بنی اسرائیلؔ نُوں آکھ جیکر کوئی مَرد یا زِنانی کوئی پاپ کرے ۔ جیہڑے لوکی کردے نیں تے خُدادے حَکم نُوں ناں مَنّے تے او ہ بندہ قصوُر وار ہووے گا ۔
7
۔ اوہ اَپنے پاپ دا جیہڑا اوہنے کیِتامَنّے تے اَپنے پاپ دا پُورا ہدیہ کڈھے تے اوہدے تے پنجواں حِصہ بوہتا دیوے ۔ تے جیہدا اوہنے قصوُر کیِتا اے اوہنوں دے دیوے ۔
8
۔ جے کر اوس بندے دا کوئی والی وارث ناں ہووے جیِہدے قصُور دا ہدیہ دِتا جاوے تے خطا دا ہدیہ خُداوند نُوں دِتا جاوے ۔ تے اوہ کاہن دا ہووے گا ۔ کفارے دے سِوا اوس دُنبے دے جیہدوں توں خطا دا خطا دا کفارہ دِتا جاوے ۔
9
۔ تے بنی اسرائیل ؔدیاں ساریاں شیواں توں جیہڑیاں چُکن دی قُربانی دے طور تے نیں اوہ کاہن دے کول لیان اوہ اوہدی ہون گئیاں ۔
10
۔ تے ہَر اِک آدمی دیاں پاک کیِتیاں ہوئیاں شیواں اوہدیاں ہون گئیاں ۔ تے جیکر کوئی بندہ کاہن نُوں کوئی شے دیوے تے اوہ اوہدی ہووے گی ۔
11
۔ تے خُڈاوند نے مُوسیٰؔ نُوں کلام کرکے آکھیا ۔
12
۔بنی اسرائیلؔ نال خِطاب کَر تے اوہناں نُوں دَس ۔ تے جیکر کِسے دی زنانی غلط راہ تے جاوے تے اَپنے بندے دی وفادار ناں رہوے ۔
13
۔ تے ہور کوئی بندہ اوہدے نال سُتا ہو وے تے ایہہ گَل اوہدے بندے تُوں لُکی رہوے ۔ تے اوہدی پلیتی لُکی رہوے تے اوہدے تے کوئی گواہ ناں ہووے تے اوہ پھَڑی ناں گئی ۔
14
۔ تے بندے نُوں غیرت دا خیال آوے تے اوہنوں اَپنی زِنانی تے شَک ہووے یا اوہ غیرت دے سببوں اَپنی زِنانی تے شَک کرے بھاویں سچی مُچی پلیِت اے ہوئی اے یا نئیں ۔
15
۔ تے اوہ مَرد اَپنی زِنانی نُوں کاہن کول لَے جاوے تے اوس زِنانی دی قُربانی لئی جَو دے آٹے دا اِک ایفے دا دسواں حِصہ لیائے ۔ اوہدے تے تیل ناں سُٹے تے ناں ای اوہدے تے لُبان رَکھے کیوں جو ایہہ غیرت دی نذر اے کیوں جو ایہہ دھیان دین دی نذر اے ۔ جیِہدے نال گُناہ یاد کریا جاندا اے ۔
16
۔ تد کاہن اوس زِنانی نُوں اَگے لیاوے تے خُداوند دے اَگے کھلارے ۔
17
۔ تے کاہن اِک مِٹی دے بھانڈے چہ پاک پانی لوے تے مِسکن دے فرش دی خاک لے کے او س پانی چہ رلاوے ۔
18
۔ تے کاہن اوس زِنانی نُوں خُداوند دے اَگے کھلارے ۔ تے اوہدا سِر ننگا کرے تے یاد کران دی قُربانی جیہڑی غیرت دی نذر دی قُربانی اے ۔ اوہدے ہَتھاں تے رَکھے تے کاہن دے ہَتھ تے کوڑا پانی ہووے ۔ جیہڑا لعنت دا سبب اے ۔
19
۔ تے کاہن اوس زِِنانی نُوں سونہہ دے کے آکھے پئی جیکر کوئی بندہ تیرے نال نئیں سُتا ۔ تے تُوں اپنی بندے دی ہُندی ہوئی کِسے ہور دے نال پلیت نئیں ہوئی ایس کوڑے پانی دے اَثر توں جیہڑا لعنت دا سبب اے تُوں بچی رہویں گی ۔
20
۔ پَر جیکر رتُوں اَپنے بندے دی ہُندی ہوئی کِسے نال دِل لایا اے تے اوہدے نال پلیِت کم کیِتا اے تے اوپرے نے تیرے نال بُرا کم کیِتا اے ۔
21
۔ تد کاہن زِنانی نُوں لَعنت دی سونہہ دے کے آکھے ۔ پئی تیرے لوکاں چہ خُداوند تینوں لعنت دیوے ۔ تے خُداوند اینج ای کرے ۔ پئی تیرے پَٹ سَڑ جان تے تیرا ڈھڈ سُج جاوے ۔
22
۔ تے ایہہ پانی جیہڑا لَعنت والا اے ۔تیری آندرا ں چہ جاوے تے تیرے پٹاں نُوں ساڑ دیوے ۔ تو زنانی آکھے ۔ اینج ای ہووے ۔ اینج ا ی ہووے ۔
23
۔ فیر کاہن ایہناں لعنتاں نُوں لِکھے تے کوڑے پانی نال اوہنوں دھووے ۔
24
۔ تے کاہن ایہہ کوڑا لعنت لان والا پانی اوس زنانی نُوں پیاوے تے ایہہ لعنت لان والا پانی کَوڑ پیدا کرن لئی اوہدے اَند لنگ جاوے ۔
25
۔ پَر اوہدے توں پہلوں کاہن اوہدے ہتھوں غیرت دی نذر دی قُربانی لَے کے خُداوند دے اَگے اوہنوں ہلاوے تے اوہنوں مذبح دے نیڑے لیاوے ۔
26
۔ تے اوہدی یاد دہانی دی نذر دی قُربانی چوں کاہن اِک مُٹھ لوے تے اوہنوں مذبحے اُ تے ساڑےایہدے مگروں اوہ پانی اوس زنانی نُوں پیاوے ۔
27
۔ تے جیہدوں اوہ اوہنوں پانی پیا لوے تے جیکر اوہ پلیِت سی اوہنے اپنے بندے دی وفادار نئیں رہی تے اوہ لعنت دا پانی اوہدے اَندر جا کے کوڑ پیدا کرے گا ۔ تَد اوہدا ڈھڈ سُج جاوے گا تے اوہدا پَٹ سڑ جاوے گا تے اوہ زنانی اَپنے لوکاں چہ لعنت دا نشان ہووے گی ۔
28
۔ تے جے اوہ زنانی پلیِت نئیں ہوئی سی سگوں پاک سی تے اوہ چنگی بھلی رہوے گی ۔ تے اوہدے چوں بچے ہون گے ۔
29
۔ ایہہ غیرت دی شریعت اے ۔ جیِہدوں کوئی زِنانی اَپنے بندےدے ہُندے ہوئیاں پُٹھے راہ تے جاوے تے پلیِت ہو جاوے ۔
30
۔ یاں بندے نُوں غیرت دا جوش آوے تے اَپنی زِنانی تے شَک کرے تے اوہنوں خُداوند دے اَگے کھلارے تے اوس ساری شریعت دے حساب نال کاہن اوہدے نال ایہہ کم کرے ۔
31
۔ تے مَرد اَپنے پاپ توں بَری ہووےگا تے پاپ اوس زِنانی دے سِر ہووے گا ۔