1
۱۔ جد داودؔ بادشاہ بُڈھا تے بوہتے وریاں دا ہو گیا تے اوہ اوہدے تے گرم کپڑے دیندے سن پر اوہ گرم نئیں سی ہوندا۔
2
۲۔ سو اوہدے کامّیاں نے اوہنوں آکھیا پئی ساڈے مالک بادشاہ لئی اِک اَ لّڑ مُٹیار لبھی جاوے ۔ جیہڑی بادشاہ دی سیوا لئی حاضر رہوے تے اوہدی ٹہل سیوا کرے تے جیہڑی اوہدے نال لیٹ کے ساڈے مالک بادشاہ نوں گرمی پہنچاوے۔
3
۳۔ تد اوہ اسرؔائیل دے سارے ملک وِچّ اِک اَلّڑ مُٹیار لبھن لگ پئے۔ اوہناں نوں اِک کُڑی ابی شاگؔ شَو نیؔمی لبھ گئی تے اوہ اوہنوں بادشاہ دے کول لے آئے۔
4
۴۔ اوہ مُٹیار بڑی سوہنی سی اوہ بادشاہ دی سیوا تے خبر گیری کرن لگ پئی پَر بادشاہ دا اوہدے نال کوئی جنسی رشتہ نئیں سے۔
5
۵۔ تے اینج ہویا پئی ادُوؔنیّا جِدی ماں دا ناں حجّیت سی، اُٹھ کھلوتا تے اوہنے اپنے بادشاہ ہون دا پرچار کر دِتّا۔ اوہنے اپنے لئے رتھ تے گھوڑے تے پنجاہ بندے تیار کیتے پئی اوہدے اَگے دوڑن۔
6
۶۔ ( پَر اوہدے پئو نے اوہنوں نہ ڈَکیا تے کِدی اینا وی ناں پوچھیا پئی تُوں اینج دے کم کیوں کرنا ایں۔ اوہ بڑا سوہنا سی تے ابیؔ سلوم دے بعد جمّیا سی)۔
7
۷۔ تے ادُوؔنیاہ نے ضروؔیاہ دے پُتر یُوآبؔ تے ابیاتر کاہن نال صلاح کیتی تے اوہ اوہدے نال کھلون لئی راضی ہوگئے۔
8
۸۔ پر صُدؔوق کاہن ، بِنا ؔیاہ بِن یہویدؔع، ناؔتن نبی ، سِمعؔی اور ریعؔی تے داوؔد دے راکھے ادُوؔنیاہ نال نہ کھلوتے۔
9
۹۔ فیر ادُونیاہ نے راجل دے اُکّا نیڑے زحلت دے پتھر تے ، بھیڈاں ڈنگر تے موٹے موٹے وچھےقُربان کیتے تے اپنے کُک بھراواں یعنی بادشاہ دے پُتراں نوں تے یہوداہ دے کُل لوکاں نوں جہیڑے شاہی نوکر سَن سدّا دِتّا۔
10
۱۰۔ پَر اوہنے ناتن نبی یا بِنایاہ یاراکھی دے اُوچیچے عملے تے اپنے وِیر سلیمان نوں سَدّا نہ کھلیا۔
11
۱۱۔ تَد ناتن نے سلیمان دی ماں بت سبع نوں پُچھیا پئی کی تُوں اے نئی سُنیا کہ ساڈھے آکا دے حُکم دے بغیر ہی حجیت دا پُتر بادشاہ بَن بیٹھا اے۔
12
۱۲۔ کیہ مینوں اِجازت اے پئی میں تینوں صلاح دییاں پئی تُوں اپنی تے اپنے پُتر سلیمان دی جان کینج بچا سکنی ایں۔
13
۱۳۔ تُوں داود بادشاہ کول جا کے اوہنوں آکھ پئی اے میرے سائیں بادشاہ کی تُوں اپنی گولی ( کنیز)نال سونہہ نہیں سی کھادی پئی پکا تیرا پُتر سلیمان میرے بعد بادشاہ ہووے گا تے اوہو ہی میرے تخت تے بھہوے گا؟ فیر ادُونیاہ کیویں بادشاہ بَن گیا اے؟
14
۱۴۔ تے جَد تُوں اوتھے بادشاہ نال گل بات کردی ہویں گی تے میں اوتھے اَپڑ جاواں گا تے تیریاں گلاں دی تصدیق کراں گا۔
15
۱۵۔ سو بت سبع بُڈھے بادشاہ دے کول اوہدھے کمرے وِچّ گئی جِدھے انی شاگ شونیمی اودھی سیوا کر دی سی۔
16
۱۶۔ بت سبع نےبادشاہ اَگے سر نوایا ۔ بادشاہ نے پُوچھیا پئی تُوں کی چاہنی ایں؟
17
۱۷۔ اوہنے آکھیا میریا سائیاں تُوں آپ رَبّ اپنے خُداوند سونہہ چُک کے اپنے ایس گولی نُوں آکھیا سی پئی تیرا پُتر سلیمان میرے بعد بادشاہ ہووے گا تے اوہو ہی میرے تخت تے بہوے گا۔
18
۱۸۔ پر ہُن ادُونیاہ بادشاہ بیٹھا اے تے میرے بادشاہ سائیاں تینوں ایس گل دا پتا وی نئیں ۔
19
۱۹۔ تے اوہنے اَن گنت ڈنگر، موٹے وچھے تے بھیڈاں چڑاہیاں نیں تے بادشاہ دے کُل پُتراں ، ابیاتر کاہن تے لشکر دے آگُو یُوآب دی روٹی پکائی اے پر تیرے بندے سلیمان نُوں سَدا نیں کھَلیا۔
20
۲۰۔ اے میرے مالک بادشاہ سائیاں کُل اسرائیل دیاں اَکھاں اے بُجھن لئی تیرے وِل لگیاں نیں پئی میرے سائیں بادشاہ دے بعد اوہدے تخت تے کون بہوے گا۔
21
۲۱۔ نئیں تاں جیویں ہی میرے مالک بادشاہ نُوں اوہدے پئو دادے نال سدا دے آرا م لئی لٹا دِتّا جاوے گا، میرے نال تے میرے پُتر سلیمان نال چوراں ورگا برتاوٗ کیتا جاوے گا۔
22
۲۲۔ اوہ بادشاہ نال گلاں کر ہی سی پئی ناتن نبی اَپڑ گیا۔
23
۲۳۔ بادشاہ نوں دسّیا گیا پئی ناتن نبی حاضر اے۔ جَد اوہ بادشاہ دے حضُور اَپڑیا تو مُنہ پرنے بھو یئں تیک جُھکیا۔
24
۲۴۔ ناتن نے آکھیا، اے میرے مالک بادشاہ کی تُوں پرچار کیتا اے پئی ادُونیاہ تیرے بعد بادشاہ ہووے گا تے تیرے تخت اُتے بہوے گا؟
25
۲۵۔ کیویں جو اوہنے اَج جا کے اَن گنت ڈنگر ، موٹے موٹے وچھے تے بھیڈاں ہلال کیتیاں نیں تے اوہنے بادشاہ دے کُل پُتراں نوں، لشکر دے آگُوواں تے ابیاتر کاہن دی روٹی پَکائی اے تے ایس ویلے اوہ اوہدے نال کھا پی رہے نیں تے کہہ رہے نیں ادُونیاہ بادشاہ دی جے۔
26
۲۶۔ پَراوس سیوَک صدوق کاہن، یُہویدع دے پُتر بِنایاہ تے تیرے سیوَک سلیمان نئیں سَدیا۔
27
۲۷۔ اپنے سیوَکاں نوں دَسیاں بِناں پئی تیرے بعد کون بادشاہ ہووے گا، توں اے سب کُجھ کیوں ہون دِتّا؟
28
۲۸۔ فیر داود بادشاہ نے آکھیا ، بت سبع نُوں اندر سَدو ، سو بادشاہ دے حضور آئی تے بادشاہ دے اَگے کھلو گئی۔
29
۲۹۔ تد بادشاہ نے آکھیا، مینوں جیوندے رَبّ دی سونہہ جنہیں مینوں ہر مُصیبت توں بچائی رکھیا اے۔
30
۳۰۔ پئی میں اَجّ پکّا اوہو کراں گا جہدی میں تیرے نال اسرائیل دے رَبّ دے ناں تے سونہہ چُکی اے یعنی تیرا پُتر سلیمان ہی میرے بعد بادشاہ ہووے گاتے اوہو میری تھاں میرے تخت تے بہوے گا۔
31
۳۱۔ فیربت سبع مُنہ پرنے بھویئں تیک جُھکی تے بادشاہ اَگے گوڈے ٹیک کے آکھیا پئی میرا سایئں داود بادشاہ سَدا جیوندا رہوے گا ۔
32
۳۲۔ داود بادشاہ نے فرمایا پئی صُدوق کاہن ، ناتن نبی تے یہویدعؔ دے پُتر بِنایاہ نوں میرےکول سَدو۔ جد اوہ بادشاہ دے حُضور اَپڑے ۔
33
۳۳۔ تے بادشاہ نے فرمایا پئی تُسی اپنے مالک دے سیوَکاں اپنے نال لووٗ تے میرے پُتر سلیمان نُوں میرے ہی خچر تے بہاو تے اوہنوں جیحوُن لے جاو۔
34
۳۴۔ تاں جو اوتھے سدُوک کاہن تے ناتن نبی اوہنو مَسح کرن پئی اوہ اسرائیل دا بادشاہ ہووے تے تُسی نرسنگا پُھوکیا جے تے نعرے ماریا جے ، جے سلیمان بادشاہ دی ، بادشاہ جیوندا رہوے۔
35
۳۵۔ فیر تُسی اوہدے نال آجایا جے تے اوہ میرے تخت تے بہووے گا تے میری تھاں حُکومت کرے گا کیوں جو میں اوہنوں اِسرائیل تے یہوداہ تے حاکم لایا اے۔
36
۳۶۔ تد یہویدع دے پُتر بِنایاہ نے بادشاہ دی گَل دی جواب وِچّ آکھیا، آمین، خُداوند میرے مالک بادشاہ دا رّب وی اینج ہی کرے ۔
37
۳۷۔ خُداوند جیویں میرے مالک بادشاہ دے نال سی اونج ہی سلیمان نال وی ہووے تے اوہدے تخت نُوں میرے مالک بادشاہ دے تخت توں وی اُچّا کرے۔
38
۳۸۔ سو صدوق کہون، ناتن نبی یہویدع دا پُتر بِنایاہ تے کریتی تے فلیتی گئے تے سلیمان نُوں داود دے خُچر تے بہایا تے اوہنوں حفاطت نال جیحون لے آئے۔
39
۳۹۔ فیر صدوق کاہن نے پاک تنبو وِچوں تیل دا سِنگ پھڑیا تے سلیمان نوں مسَح کیِتا۔ تد اوہنا ں نے نرسنگا پُھوکیا تے کُل لوکاں نے نعرہ ماریا پئی سلیمان بادشاہ دی حیاتی لَمی ہووے۔
40
۴۰۔ تے کُل لوک وَنجلیاں وجاندے تے تے بڑا جشن مناندے ہووے اوہدے مگر مگر گئے تے اوہناں دے رولے دی آواز نال دھرتی گُو نج گئی۔
41
۴۱۔ ادُونیاہ تے کُل پِروہنیاں نیں ضیافت مُکدیاں ہی نرسنگیاں دی آواز سُنی ۔ یُوآب پُوچھیا پئی شہر وِچّ ایس رولے رَپے دا کی مطلب اے ؟
42
۴۲۔ تے اجہے گل یُواب دے منہ وِچّ ہی سی پئی ابی یاتر کاہن دا پُتر یونتن آ کھلوتا۔ ادُونیاہ نے اوہنوں آکھیا اندر لنگھ آ۔ تیرے جیہا لائق بندہ پَکا کوئی چَج دی خبر لے آیا ہووے گا۔
43
۴۳۔ یُونتن نے آکھیا پئی نہیں ، اجیہی گل نئیں سلیمان نُوں بادشاہ بنا دِتّا اے۔
44
۴۴۔ تے بادشاہ نے صدوق کاہن ، ناتن بنی ، یہویدع دے پُتر بِنایاہ ، کریتیاں تے فلیتیاں نُوں اوہدے نال گھلیا اے تے اوہناں نے اوہنوں بادشاہ دے خَچر تے بہا دِتّا۔
45
۴۵۔ تے صدُوق کاہن تے تاتن نبی نے اوہنوں جیحون وِچّ بادشاہ دے طور تے مسح کِیتا اے تے اوہ اوتھوں نچدے ، ٹَپ دے تے گاوندے ہوے آئے نیں۔ ایتھوں تیک پئی سارا شہر گُونج گیا اے۔ ایہہ اوہو رولا اے جہیڑا تُسی سُن رہے اوہ۔
46
۴۶۔ تےایہدے علاوہ سلیمان شاہی تخت تے بہہ گیا اے۔
47
۴۷۔ تے شاہی سیوَک ساڈے مالک داود نُوں ایہہ آکھدے ہووے ودھائیاں دین آئے نیں پئی تیرا رَبّ سلیمان نُوں تیتھوں ودھ مشہوری بخشے تے اوہدے تخت نُوں تیرے تخت توں وی اُچّا کرے ۔ تے بادشاہ اپنے پلنگ تے سجدے پے گیا۔
48
۴۸۔ تے آکھن لگا پئی رَبّا، اسرائیل دے خُدا دی وڈیائی ہووے جہنے اَج میریاں اَکھاں نُوں اپنے تخت تے اِک جان نشین ویکھنا نصیب کِیتا اے۔
49
۴۹۔ ایہہ سُن کے ادُونیاہ دے پَرونے ڈر کے اُٹھ کھلوتے تے ایدھر اوہدھر ہو گئے۔
50
۵۰۔ پَر ادُونیاہ سلیمان دے ڈر گھونوں نسّیا تے مذبحے دے سِنگ نُوں جپھا پا لیا۔
51
۵۱۔ تد سلیمان بادشاہ نُوں دَس پئی پئی ادُونیاہ سلیمان بادشاہ دے ڈر گھونُوں مذبحے دے سِنگاں نال چمڑیا ہوویا تے آکھدا اے پئی سلیمان بادشاہ اَج میرے نال سونہہ کھاوے پئی مینوں تلوار نال قتل نئیں کرے گا۔
52
۵۲۔ سلیمان نے جواب دِتّا پئی جے اوہ اپنے آپ نُوں لائق ثابت کرے گا تے اوہدا وال وی وِنگا نہ ہووے گا تے جے اوہدے وِچّ شرارت لبھی تے اوہ ماریا جاوے گا۔
53
۵۳۔ تد سلیمان نے بندے گھلے تے اوہ اوہنوں مذبحے تُوں تھلے لَے آئے تے ادُونیاہ آیا تے سلیمان بادشاہ دے اَگے جُھکیا تے سلیمان نے اوہنوں آکھیا پئی اپنے گھر جا۔ ٍ