¹ ۱۔پچھے آتماں یسوع ناں جھنگ میں لے گی کہ شیطان اوے نہ آزماوے۔ ² ۲۔ڄݙے یسوع چاݪیخ ݙیھن آݨ چاݪیخ راتاں رو ورت راکھیو پچھے اُوے ناں بکھ لاگݨ لاگی ³ ۳۔ازماؤݨ آݪو شیطان اُوے کوڈھی آیو آݨ کہیو، کہ تو ایشور رو ݙیکرو ہے، تو پتھراں ناں کہے تاجے خارو ٻاٹی بݨ جاوے۔ ⁴ ۴۔ یسوع اوے ناں جواب ݙنھو کہ لکھیوڑو ہے کہ انخان صرف ٻاٹی خاں جیوتو کونی رہتو پݨ ہر اوے بات خاں جکو ایشور رے مھانݙے خاں نخری۔ ⁵ ۵۔ پچھے شیطان یسوع ناں پویتر شہر لے گیو آؐݨ بھگتی گھر رے ماتھے ابھیجاݨ رو کہیو۔ ⁶ ۶۔جے توں ایشور رو ݙیکرو ہیں تو آپ چھت خاں ہیتھو کھر۔ کیانکہ اے لکھیوڑو ہے کہ او آپ رے ݙوتاں (فرشتاں) ناں حکم ݙیخے کہ او تاجی حفاظت کرخے۔ آؐݨ تناں آپ رے ہاتھاں تے کھݨیخے۔ کیانکہ تاجے پگاں ناں پتھراں خاں تھُݙو نی لاگے۔ ⁷ ۷۔یسوع اوے ناں کہیو ہے توں آپ رے ایشور ناں نی آزما۔ ⁸ ۸۔پچھے شیطان یسوع ناں اونچی جگہ ماتھے لے گیو آݨ پورے جُگ (جگت) ری راجائی بتائی ۔اݨ اوے ری شان مان بتائی۔ ⁹ ۹۔ آݨ اوے ناں کہیو، کہ جے توں مانجے اگ جھکیخ تو اے شان مان تناں ہوں ݙئیخ ری۔ ¹⁰ ۱۰۔ پچھے یسوع اوے ناں کہیو، توں صرف ایشور ری پوجا آݨ بھگتی کر۔ ¹¹ ۱۱۔پچھے شیطان اوے خاں بوہو گیو۔ آݨ فرشتہ (ݙوت ) اوے ری خیوا کرݨ لاگا۔ ¹² ۱۲۔ پچھے جݙے یسوع ناں خٻر لاگی کہ یوحنا ناں حکومت جھالیورو تو یسوع گلیل میں پاچھو گیو۔ ¹³ ۱۳۔ آݨ ناصرۃ خاں کفرنحوم گیو۔ آݨ اُتھے رہیو۔ جکو گلیل رے سمندر کوڈھیا ہتو۔ جکو ذبلون آݨ نفتالی رے علاقے میں ہے۔ ¹⁴ ۱۴۔ اے ائیے خارو ہوؤ کہ اے بات خیچی ہووے کہ جکو یسعیاہ سنت رے وسیلے کہیو گیو ہتو او پورو ھئیے۔ ¹⁵ ۱۵۔ذبولون آݨ نفتالی ری دھرتی یردن دریاہ رے پارسمندر رے پاخے گلیل رے غیرقوماں۔ ¹⁶ ۱۶۔ جکے منکھ اندھارے میں ٻیٹھاتا خاراں (تمام) گھݨو اوجاڑو (نور) ݙیٹھو، آݨ او منکھ جکو آپ رے علاقے میں مرݨ تے ٻیٹھا ہے اُوئاں تے اوجاڑو(نور) چمکیو۔ ¹⁷ 17 اوے ݙن خاں یسوع پرچار کرݨ شروع کیو، کہ تھاں ٻہیا کرو کیانکہ ایشور ری راجائی نیݪی آوݨ آݪی ہے۔ ¹⁸ ۱۸۔جاں ہی او گلیل رے سمندر رے کنارے گیو، تو اوے ٻہیاں بھائیاں نا ݙیتھا۔ شمعون جکوپطرس کہووی آݨ اوے رو بھائی اندریاس جکو سمندر میں جاݪ ناکھتا پیا کیانکے او موھݨاں ہتا۔ ¹⁹ ۱۹۔یسوع اوئاں ناں کہوکہ تھیں مانجے لارے آؤتوہوں تھاناں آدم گیر بݨائخ۔ ²⁰ ۲۰۔اوواں جھٹ میں آپ را جاݪ چھوڑیا آݨ یسوع رے لارے بوہا۔ ²¹ ۲۱۔جاں ہی یسوع اتھوں خاں جاؤݨ لاگو، اوے ٻہیاں بھائیاں زبری رے ݙیکرے یعقوب آݨ اُوے رو بھائی یوحنا ناں ݙیھٹو۔ او آپ رے ٻاپ بھیݪا ٻیڑی میں ہتا،آݨ آپ را جاݪ ٹھیک کرتا پیا یسوع اوئاں ناں ہیلو کیو۔ ²² ۲۲۔ آݨ اوئاں جھٹ میں (جلدی میں) آپ ری ٻیڑی آݨ آپ رے ٻاپ ناں چھوڑرو یسوع رے لارے ٻوہا۔ ²³ ۲۳۔یسوع گلیل رے خارے علاقے میں جاتو اوئاں رے بھگتی گھراں میں تعلیم ݙیتوآݨ ایشور ری راجائی ری خوشی ری خٻر رو پرچارکرتوآݨ منکھان ناں ہر بیماری خاں (بھلاں) خاجو خورو کرتو ہتو۔ ²⁴ ۲۴۔سوریہ رے خارے علاقے میں اوے ری خٻر کھنڈ گی، آݨ منکھ ہربیماراں نا اوے کوڈھی لے آیا، جکے بھونتاں میں پھاتھوڑا مرگھی آݪا آݨ فالج آݪا ہتا۔ یسوع اوئاں ناں (شفا ݙنی) خاجا خورا کیا۔ ²⁵ ۲۵۔گلیل،دُکپلس،یروشلیم،یہودیہ آݨ یردن رے پار خاں (تمام) گݨھے خاں گݨھا منکھ اوے رے لارے بوہو۔