باب۲۷
1
۱۔ جݙے خاکݪو تھی ماݨخاں رے خاراں سردارکاہناں آݨ بوڈھیاں پربھویسوع ناں مارݨ ری خلاہ کرئی۔
2
۲۔ اُواں اُوے ناں ٻادھو آݨ راجا پیلاطسؔ رے حوالے کریو۔
3
۳۔پچھے جݙے یہودہ جکے اُوے ناں جھلایو ہتو جݙے اُوے اُوے ناں جویو کہ پربھویسوع ناں سزا ݙھنی ری۔ اُو پچھتاوݨ لاگو آݨ سرادرکاہناں آݨ بوڈھیاں پوڑھیاں ماݨخاں ناں چاندی را تریخ روپیا اُچھلاہ ݙھنا۔
4
۴۔ آݨ کہیو میں ہیک نماݨے ناں دوکھے خاں جھلارو پاپ کریوھاں، پر اُواں کہیو، "مھاناں اِے خاں کی؟ اِے ناں توں ہی جاݨ۔
5
۵۔ پچھے اُو چاندی را سکہ بھگتی گھر میں ناکھ را بوھوگیو آݨ آپ رے آم ناں پھاخی ݙھنی۔
6
۶۔سردارکاہن چاندی را سکہ لھنا آݨ کہیو اِے دھرم رے مطابق کونی کے بگھتی گھر رے خزانے میں گھاتیا (راکھیا) جاوے۔ کیاں کے لوہی (خون) ری رقم ہے۔
7
۷۔اُواں آپس میں اِے بات تے خلاح کری آݨ اِئیے پئیخاں خاں کُمبھار ری دھرتی اُوپراں ماݨخاں ناں ٻورݨ رے خاروں مول لی۔
8
۸۔ اِے رے خاروں اِے دھرتی ناں اُوے ݙھیں خاں لوہی ری دھرتی کہیو جاوݨ لاگو۔
9
۹۔اِے رے خاروں جکو سنت یرمیاہ رے مُکھ خاں جکو کہیو گیو ہتو اُو پورو تھے۔ اُواں چاندی را تریخ روپیا لے لھنا جکو اسرائیل رے منکھاں اُوے ری رقم راکھی ھتی۔
10
۱۰۔ آݨ اُوے ناں کُمبھار ری دھرتی رے خاروں ݙھناں گیا جاں ایشور مناں خمجھایو۔
11
۱۱۔ ہمیں مسیح صوبیدار رے خامھوں اُبھوتو۔ آݨ صوبیدار اُوے خاں پوچھیو، کی توں یہودیاں رو راجا ہیں؟ مسیح اُواں ناں جواب ݙھنو، تیں آپ ہی کہیو۔
12
۱۲۔پݨ جݙی سردارکاہناں آݨ بوڈھیاں اُوے تے بکیا۔ (الزام لگایا) اُوے کہیں بݪتی کونی ݙھنی۔
13
۱۳۔ جݙے پیلاطس اُوے ناں کہیو کی توں کونی خُݨ تو جکو تاجے بارے میں کی کہیے جاوی پیا؟
14
۱۴۔ پݨ اُوے ہیک آخر رو بھی جواب کونی ݙھنو، صوبیدار اِے بات تے ݙاڈھی عبرت کری۔ (حیران تھیو) ۔
15
۱۵۔ عید تے رواج ہتو کہ صوبیدار ہیک قیدی ناں ماݨخاں رے خاروں چُگتو ہتو اِے خاروں کہ عید تے اُوے ناں آزاد کرے۔
16
۱۶۔ اُوے گھڑی ہیک مشہورقیدی ہتو جکے رو ناں برابا ہتو۔
17
۱۷۔ جݙے اُوے بھیݪا تھیا ، پلاطسؔ اُواں خاں کہیو، تھیں کے ناں چاہوی کی تھارے خاروں چھوڑیو جاوے ، برابا ناں یا پربھویسوع ناں جکے ناں تھیں مسیح کہیوئی۔
18
۱۸۔کیاں کے اُوجاݨتو ہتو کہ اُواں ناں ریخ خاں جھلایو ہے۔
19
۱۹۔ جݙے اُو عدالت رے تخت تے ٻیٹھو تو، اُوے ری لُوگائی اُوے ناں کہیہ بہیرکریو کہ اِے نماݨے ماݨخ خاں کہیں نی کرے۔ کیاں کے میں آج رات خپنیئے میں اِے ماݨخ رے کرے ݙاڈھو ݙُکھ کھݨیوھاں۔
20
۲۰۔ پچھے سردارکاہناں آݨ بوڈھیاں ماݨخاں، ماݨخاں رے ٹوݪے ناں بھݪکایو کہ برابا ناں چھوݪو آݨ مسیح ناں مرواؤ۔
21
۲۱۔صوبیدار اُواں ناں کہیو، ائیاں ٻہیاں میں تھیں کے ناں چاوہں کے تھارے خاروں چھوݪ ݙاں؟۔ اُواں کہیو برابا ناں۔
22
۲۲۔ پیلاطسؔ اُواں ناں کہیو، پچھے ہُوں پربھویسوع جکے ناں تھیں مسیح کہوی اُوے رو کی کراں؟ اُواں خاراں جواب ݙھنو اُوے ناں خوݪی تے چڑھاؤ۔
23
۲۳۔ آݨ اُوے کہیو۔ "کیاں؟ اِے کی ݙوھ کریو ہے؟ اُو بݪے بدھیک ݙاڈھے زور خاں کہݨ لاگا اِے ناں خوݪی تے چڑھایو جاوے۔
24
۲۴۔ آݨ جݙے پیلاطسؔ ݙٹھو کہ اُو کئہں کونی کرخگھتو پݨ شور آݨ اُدھماٹ شروع تھیورو، اُوے پاݨی لیوآݨ آپرا ہاتھ ماݨخاں رے ٹوݪے رے اِگیا دھویا۔ آݨ کہیو ھُوں اِے بے گناہ ماݨخ رے خون خاں آزاد ھاں، تھیں ہی اُوے ناں جوؤہ۔
25
۲۵۔خاراں منکھاں کہیو، اِے رو لوہی مھارے آݨ مھاری اُولاد رے ماتھے، پچھے اُوے برابا ناں اُواں رے خاروں چھوݪیو۔
26
۲۶۔ اُوے مسیح ناں کوڑا مروا آݨ خوݪی چاݪوݨ رے خاروں حوالے کریو۔
27
۲۷۔پچھے صوبیدار رے سپاہیاں اُوے ناں قلعہ میں لے جا تے خارے پلٹݨ ناں بھیݪا کریا۔
28
۲۸۔اُواں اُوے را گابھا اُتاریا آݨ اُوے ناں کرمچی رنگ را گابھا پہرایا۔
29
۲۹۔پچھے اُواں کانٹا رو ہیک تاج اُوے رے ماتھے تے راکھیو، آݨ ݙنڈی اُوے رے خاجݪی ہاتھ میں ݙے ݙھنی۔ اُو اُوے رے خامھے گوڈاں تے جُھک آݨ اُوے خاں مزاق کرتا پیا۔ اِے یہودیاں را راجا " نمشکار"
30
۳۰۔ آݨ اُوے رے ماتھے تھوکیو، آݨ اُواں ݙنڈی اُوے رے ماتھے تے ماری۔
31
۳۱۔ جݙے اُو اُوے خاں مزاق کرتا پیا۔ اُواں اُوے را گابھا لیا۔ آݨ آپرا گابھا اُوے تے ناکھیا۔ آݨ اُوے ناں خوݪی چاݪوݨ رے خاروں لے گیا۔
32
۳۲۔ جݙے اُو ٻاہر آیا، اُواں ناں ہیک منکھ خنٹیو جکے رو ناں شمعون کُرینی ہتو اُوے ناں مسیح رے بھیݪو جاوݨ تے مجبور کریو گیو جݙے کہ پݨ اُو اُوے ری خوݪی کونی کھݨ خگھیو۔
33
۳۳۔اُو اُوے جگہ آیا جکو گُلگتا کہلاوتی، جکے رو مطلب ہوتو "کھوپڑی ری جگہ"
34
۳۴۔ اُواں اُوے ناں پت میں ملی ہوئی مے پیئݨ رے خاروں ݙھنی، پݨ جݙے اُوے چُکھی، اُوے اُوے ناں کونی پیی۔
35
۳۵۔ جݙے اُواں اُوے ناں خوݪی چاݪہایو، اُواں اُوے رے گابھا پکھا گھتیا۔
36
۳۶۔آݨ اُو ٻیخ گیا آݨ اُوے ناں جووݨ لاگا۔
37
۳۷۔ اُوے رے ماتھے رے اُونچا اُواں تختی لکھی جکے تے لکھیو اِےیہودیاں رو رو راجا پربھویسوع ہے۔
38
۳۸۔ بئے ڈاکو اُوے بھیݪا خوݪی چہݪایا گیا ہیک اُوے رے خاجݪی پاخے۔
39
۳۹۔جکو اُوے رے بٹ خاں ٹپتا پیا آُوے خاں مزاق کرتا ہتا، آپ را ماتھا ہلاتا۔
40
۴۰۔ آݨ کہتا پیا، اِے بھگتی گھر ناں تباہ کرݨ آݪا، آݨ تیناں ݙھیاں میں بݨاوݨ آݪا، آپ رے آپ نا بچا! جے تو ایشور رو ݙیکرو ہے تو خوݪی خاں ہیٹھا آ!
41
۴۱۔ ائیاں ہی سردارکاہناں آݨ فقہیاں آݨ بوڈھیاں رے بھیݪا اُوے خاں مزاق کرتا پیا۔
42
۴۲۔ اِے ٻجاں ناں بچایا، پݨ آپ ناں کونی بچا خگھتو۔ توں اسرائیل رو راجہ ہے خوݪی خاں اُتر آ آݨ توپچھے مھیں تیں تے وشواس لاخاں۔
43
۴۳۔اُو ایشور تے وشواس راکھی، جوؤہ کہ ہمیں ایشور اُوے ناں بچاؤی۔ کیاں کے اِے کہئ وہ کہ ہوں ایشور رو ݙیکرو ہاں۔
44
۴۴۔ آݨ جکو ڈاکو اُوے رے بھیݪا خوݪی چہݪایا گیا تا، اُواں بھی اُوے خاں مزاق کرتا پیا۔
45
۴۵۔ چھیویں گھنٹے خاں ناوے گھنٹے تائیں خاری دھرتی تے اندھارو تھی گیو۔
46
۴۶۔ناوے گھنٹے رے مھیں پربھویسوع اُونچی رݪ کری تے کہیو، ایلی ایلی شبقتی؟ جکے رو مطلب ہے اِے مانجا ایشور اِے مانجا ایشور تیں مناں کیاں چھوݪ ݙھنو؟۔
47
۴۷۔ جکو نیݪا اُوبھا ہوتا اُواں خݨیو۔ اُواں میں کہنکاں کہیو، اِے ایلیاہ ناں ھیلوکرئی پیو۔
48
۴۸۔ اُواں میں خاں ہیک بیگو بیگو بھجتو آیو آݨ مے خاں بھیگوݪوپھووہ ݙنڈے تے لگا رو۔ اُوے ناں پیئݨ ناں ݙھنو۔
49
۴۹۔ٻیجے منکھاں کہو، اِے ناں اکیلو چھوݪ ݙو۔ مھیں جووئیں کہ ایلیاہ اِے ناں بچاوݨ آوی کہ کونی۔
50
۵۰۔ پچھے مسیح دوبارہ اُونچی ٻولی میں رݪ کی آݨ آپ ری جان ݙے ݙھنی۔
51
۵۱۔جووہ بھگتی گھر رو پردو اُونچاں خاں تھی ہٹھا تک ٻھیاں حخاں میں پھاٹ گیو۔ آݨ دھرتی کانپ اُٹھی۔ آݨ پہاڑ ٹکراٹکرا ہورا الگ الگ ہو گیا۔
52
۵۲۔قبراں کھل گیے آݨ گھݨے پوترمنکھاں را جسم جکو موؤݪا ہوتا جی اٹھیا۔
53
۵۳۔ آݨ اُو آپ رے جی اُٹھݨ رے بعد گاؤاں میں آیو پوتر شہر میں بݪیو تو۔ آݨ گھݨاں ناں نظر آیو۔
54
۵۴۔ ہیݨاں صوبیدار آݨ جکے مسیح ناں آݨ زلزلے ناں آݨ اِے باتاں ہوتے ݙیٹھے تے اُو گھݨاں ٻہیا تے کہیو، خچیلی اِے ایشور رو ݙیکرو ہے۔
55
۵۵۔گھݨے لُوگائے جکو گلیل خاں اُوے رے لارے ہوتے آݨ اُوے ری فکر کرتے ہوتے، جݙے اُواں اُوے ناں پرھےخاں ݙٹھو۔
56
۵۶۔ اُواں رے بیچ میں جتھے مریمؔ مگدلینی ہوتی، مریمؔ جکو یعقوب آݨ یوسفؔ ری ماں ہوتی۔ آݨ زبدیؔ رے ݙکراں ری ماں ہوتی۔
57
۵۷۔ جݙے انڈھے ہوئی۔ ہیک امیر منکھ جکو ارِمَتِؔیاہ میں رہتو۔ جکے ناں یوسف ہوتو۔ جکو پربھویسوع رو چیلوبھی ہوتو۔
58
۵۸۔ اِے پیلاطس تائیں گیو۔ موقل لی آݨ پربھویسوع رو موݪو جسم اُوے خاں مانگیو۔ پیلاطس اِئیاں ناں حُکم ݙھنو کہ لاش ائیے ناں ݙو ری۔
59
۵۹۔ یوسفؔ لاش لھنی آݨ اُوے ناں ہیک صاف مانگھے گابھے میں بھیݪی۔
60
۶۰۔آݨ اُوے ناں آپ ری بݨایݪی نوی قبر میں راکھیو۔ جکو پہاڑ(جبل) ناں کِٹ رو بݨائی گئی ہوتی۔ اُوے قبر تے ہیک گھݨو موٹو پتھر راکھیو آݨ بوہو گیو۔
61
۶۱۔ مریمؔ مگدلینی آݨ ٻیجوݪی مریمؔ قبر رے خامے ٻھٹے تے۔
62
۶۲۔ اگلے ݙن جکو تیاری رو ݙنھ ہوتو۔ سردارکاہن آݨ فریسی پیلاطسؔ رے کوڈھی جمع تھیا۔
63
۶۳۔اُواں کہیو، سردار مھاناں یاد ہے کہ اُوے دھوکے باز کہیوہوتو، تیناں ݙھیاں خاں ہُوں جی اُوٹھیخ رو۔
64
۶۴۔ اِئیے رے خاروں اِے حُکم ݙے کہ تیناں ݙھیاں تک قبرری رکھواݪی کرئی جاوے۔ ائیاں نی ہوے کہ اُوے را چیلا آوے آݨ اُو اُوے ناں چوری کر جاوے را۔ آݨ منکھاں خاں کہے ݙے، اُو موݪاں خاں جی اُٹھیو ہے۔ آݨ آخری دھوکو پہلی آݪے خاں بھی بُرو حوخے۔
65
۶۵۔ پیلاطسؔ اُواں ناں کہیو پہارے آݪاں ناں لے جا۔ آݨ جیتری حفاظت کر خگھی کرو۔
66
۶۶۔ اُوگیا آݨ قبر ری حفاظت کئ۔ آݨ ہیک موٹو پتھرراکھیو آݨ اوے تے مہر لگا ݙھنی آݨ جگہ ٻیخ گیا۔