باب۲۵
1
۱۔بݪے آکاش ری راجائی اُواں کنراریاں ری آݪی کر ہے جکو آپ را ݙیئا لے را بینݙ(دلہا) خاں خیٹݨ گئے۔
2
۲۔ائیاں رے مھیں پانچ بیوقوف ہوتے آݨ پانچ خمجھ دار ہوتے۔
3
۳۔ جݙے بے وقوف کنورایاں آپ را ݙیئا اُوکھݨیاں تو اُواں آپ رے بھیݪو تیل کونی اُوکھݨیو۔
4
۴۔پݨ خمجھ آݪیاں کنواریاں آپ رے ݙیئا بھیݪو تیل رے کپّے بھی اُوکھݨیے۔
5
۵۔ اجّاں بینݙ(دلہا) رے آوݨ میں دیر ہوتی، اُو خارے اونگھ میں خوؤݨ لاگے۔
6
۶۔ پݨ آدھی رات رو شور مچیو، بینݙ ناں جوؤݨ ٻاہر جاو آݨ اُوے خاں خنٹو۔
7
۷۔پچھے خارے کنوارے جاگئے آݨ آپ را ݙیئا ٹھیک کرݨ لاگے۔
8
۸۔بےوقوفاں خمجھ داراں ناں کہیو آپ رے تیل خاں کنئک تیل مھاناں ݙو کیاں کے مھارا ݙیئا ٻجھݨ آݪا ہے۔
9
۹۔ پݨ خمجھ آݪیاں جواب ݙھنو متاں (شاید) اِے مھارے آݨ تھارے خاروں پورو نی ھوے اِے رے بجائے تھیں بیچݨ آݪاں کوڈھی جاؤ آݨ آپ رے خاروں مول رو لے آؤ۔
10
۱۰۔ھیݨاں اُو لیوݨ رے خاروں گئے ہی ہوتے کہ بینݙ(دلہا)آیو پرو، جکو تیار ہوتے اُو اُوے رے بھیݪے بیھاں ری دعوت میں بوھے گئے۔ آݨ در بند تھی گیو۔
11
۱۱۔پچھے ٻجے کنوارے آئے، آݨ کہیو "مالک" مالک" مھارے خاروں در کھولو۔
12
۱۲۔پݨ اُوے جواب کونی ݙھنو، آݨ کہیو، ہُوں تھاں خاں خچ کہیں ، ہُوں تھاناں کونی اُوݪکھتو۔
13
۱۳۔ ائیے رے خاروں ہوشیار رہو کیاں کے تھیں اُوے ݙھیں یا گھڑی ناں کونی اُوݪکھتا۔
14
۱۴۔ اِئیے اُوے منکھ آݪی کر ہے جکو ٻیجے ملک جاؤݨ آݪو ہوتو۔ آݨ اُوے آپ رے نوکراں ناں ھیلو کیوآݨ آپ ری دولت ائیاں رے حوالے کی۔
15
۱۵۔ ائیاں میں خاں ہیکے ناں پانچ ٻورٹا ݙھنا۔ ٻجے ناں ٻئے ٻورٹا ݙھنا، آݨ ہیکے ٻجے ناں ہیک ٻورٹو ݙھنا۔ ہر ہیک آپ ری قابلیت رے حخاب خاں لیا، آݨ پچھے اُو منکھ آپ رے سفر تے بوھو گیو۔
16
۱۶۔ جکے ناں پانچ ٻورٹا ملیاتا اُو بیگو بیگو گیو اُوے اُواں خاں کاروبار شروع کیو آݨ اُواں خاں پانچ ٻورٹا ٻجا کمایا۔
17
۱۷۔ اِئیے آݪی کر ہیکے ٻجے جکے ناں ٻئے ٻورٹا لیاتا، اُوے اُواں خاں ٻئے ٻجا بݨایا۔
18
۱۸۔ پݨ اُو نوکر جکے ہیک ٻورٹولیوتو گیو آݨ دھرتی میں ہیک کھݙو کھٹیو آݨ آپ رے مالک رو روپیو لُکایو۔
19
۱۹۔ ہیکے گھݨے عرصے خاں پچھے اُواں نوکراں رو مالک پاچھو آیو آݨ اُواں خاں حخاب کتاب کرݨ لاگو۔
20
۲۰۔اُو نوکر جکے ناں پانچ ٻورٹا لھناں ہوتا اُوے کہیو۔ مالک تئیں مناں پانچ ٻورٹا ݙھناہوتا۔ "جو" میں پانچ ٻجا ٻورٹا کمایا ھاں۔
21
۲۱۔ اِے رے مالک کہیو شاباش۔ ٹھاوکا آݨ وفادار نوکرتوں تھوڑے میں وفادار رہیو۔ ہوں تناں گھݨیاں چیزاں رو مالک بݨایخ رو، آپ رے مالک ری خوشی میں بھیݪو تھی۔
22
۲۲۔ جکے نوکر ناں ٻئے ٻورٹا ݙھناتا۔ اُوے کہیو، "جو" میں ٻئے ٻورٹا ٻجا کمایا ھاں۔
23
۲۳۔ ائیے رے مالک اُوے ناں بھی کہیو، شاباش، ٹھاوکا آݨ وفادار نوکر توں بھی تھوڑے میں وفادار رہیو۔ ہوں تناں بھی گھݨیاں چیزاں رومالک بݨایخ۔ آپ رے مالک ری خوشی میں بھیݪوتھی۔
24
۲۴۔ جکے ناں ہیک رُوپیو جݪیوہتو اُو آیو آݨ کہیو، "مالک" ھُوں اُوݪکھئں کہ توں سخت منکھ ہیں۔ توں اتھ خاں باڈھی جتھی تئیں کونی بایو۔ آݨ اُتھ خاں بھیݪوکرئیں جتھے توں کونی کھنڈاتو۔
25
۲۵۔ ہُوں ٻیہوتورہیو، ائیے رے خاروں میں جا رو تاجو رُپیو دھرتی میں لُکایوھتورو ہیݨاں اَتھے ہے اُوتاجوہے۔
26
۲۶۔پݨ اِیے رے مالک اُوے ناں بݪتی ݙھنی آݨ کہیو۔ اِئیے چلاک آݨ سست نوکر۔ توں جاݨتو ہُتو کہ جتھے میں کونی بایو اُتھ خاں باڈھیئں آݨ جتھے میں کونی کھنڈایو اُتھ خاں بھیݪوکرئیں۔
27
۲۷۔ اِئیے رے خاروں تناں چاہیتوکہ توں مانجو رُپیو بپاریاں ناں ݙیونت آݨ جݙے ھوں آونت تو بیاج خودُھا آپرا رُپیا پاچھا لیونت را۔
28
۲۸۔ اِئیے رے خاروں اُوے خاں رُپیو لے رو اُوے نوکر ناں ݙو جکے کوڈھی ݙخ رُپیا ہے۔
29
۲۹۔کیاں کے جکے کوڈھی ہے اُوے ناں ٻیجو وی ݙھنو جاخے، پݨ اُو جکے کوڈھی کہیں کونی اُوے خاں اُو وی لے لیو جاخے جکواُوے کوڈھی ہے۔
30
۳۰۔نکمے نوکر ناں ٻہار اندھارے میں دھکوݙے چھوڑو۔
31
۳۱۔جݙے ابن آدم آپ رے فریشتاں بھیݪو پرتاٻ میں آخے پچھے اُو آپ رے پرتاٻ آݪے تخت تے ٻیخخے۔
32
۳۲۔اُوے رے خامھے خارے قوماں بھیݪے ھوخے آݨ اُو منکھاں ناں ہیکےٻیجے خاں دھارکرخے، جاں دھݨواݪ رڈھاں ناں ٻکریاں خاں دھارکوئیں۔
33
۳۳۔ آݨ اُو رڈھاں ناں آپ رے خاجݪی آݨ بکریاں ناں کھاٻݪی پاخے راکھخے (ٻیخاݨخے)۔
34
۳۴۔ پچھے راجا آپ رے خاجݪی پاخے آݪاں ناں کہیخے، آؤ مانجے پتا را بھلاں (دھن) منکھاں۔ اُوے راجائی ناں حخے (وراثت) میں لوجکو دنیا رے بݨݨ خاں ہی تھارے خاروں بݨائی گئی ہے۔
35
۳۵۔جݙے ھُوں بکھیوھتوتھاں مناں ٻاٹی ݙھنی، ھُوں ترخیوھتو تھاں پیئݨ رے خاروں پاݨی ݙھنو،ھُوں اجنبی (اُوپرو)ھتو تھاں مناں گھرمیں جگہ ݙھنی۔
36
۳۶۔ ھُوں اُوگھاݪوھتو تھاں مناں گابھا پہرایا، ھُوں بیمارھتوتھاں مانجو خیال کیو ھوں قید میں ھتو تھیں میں کوڈھی آیا۔
37
۳۷۔ پچھے بھلا منکھ جواب ݙیخے آݨ کہیخے "ایشور" مہاں کݙھے تناں بکھیو ݙٹھوآݨ ٻاٹی کھوݪائی جاں ترخیوݙٹھو آݨ تناں پاݨی پیاݪیو؟۔
38
۳۸۔ آݨ مھاں کݙھےتناں اجنبی (اُوپرو) ݙٹھو آݨ تناں جگہ ݙھنی؟ جاں اُوگاݪو ݙٹھو آݨ تناں گابھا پہرایا؟۔
39
۳۹۔مھاں کݙھے تناں بیمار ݙٹھو جاں قید میں آݨ تناں خٹیݨ آیا؟۔
40
۴۰۔ آݨ پچھے راجا اُواں ناں بݪتی ݙیخے، ھُوں خچی کہیں کہ جکوتھاں اِتھے مانجے گریٻ بھائیاں رے خاروں کیو اُوتھاں مانجے خاروں کیو۔
41
۴۱۔ پچھے اُو اُواں ناں جکو اُوے رے کھابݪی پاخے ھوخے اُواں ناں کہیخے، اِے لعنتیاں میں کاں اَݪگا جاؤ آݨ اُوے کݙھے نی ختم تھیݨ آݪی باخݙے میں جاؤ جکو شیطان آݨ اُوے رے فرشتاں رے خاروں بݨائی گی ہے۔
42
۴۲۔ کیاں کے ھُوں بکیھو ھتو تھاں مناں ٻاٹی کونی ݙھنی، ھُوں ترخیوھتو پݨ تھاں مناں پاݨی کونی پیاݪیو۔
43
۴۳۔ ھُوں اجنبی(اُوپرو) ھتو پݨ تھیں مناں گھر میں کونی لے گیا، ھُوں اُوگاݪو ھتو پݨ تھاں مناں گابھا کونی پہرایا، ھُوں بیمارآݨ قید میں ھتوپݨ تھاں مانجی فکرکونی کرئی۔
44
۴۴۔پچھے اُو وی بݪتی ݙیخے آݨ کہخے،کہ مھاں کݙھے تناں بکھیو، ترخیوآݨ اجنبی(اُوپرو) جو رو تیں خاں کونی پوچھیو؟۔
45
۴۵۔پچھے اُو اُواں ناں بݪتی ݙیخے آݨ کہخے، ھُوں تھاناں کہیں پیو جݙے تھاں آپ خاں چھوٹاں خاں اِے کونی کیو، تھاں اِے میں خاں بھی کونی کیو۔
46
۴۶۔ اہݪا ہیمشہ ری سزا را ھُک دار ھوخے، پݨ بھلے منکھاں رے خاروں امر جیوݨ ہوخے۔