1
۱۔اِیشوَر اَن پربھُو یسوع مسیح رے ٻانھے یعقُوب ری طرف خاں اُوئاں ٻارھے قبیلاں نا جکو جگہا جگہا کھِن٘ڈیوڑا ہے، سلام۔
2
۲۔اَے وشواسی بھائیاں، جَݙے تھاں تے فرق فرق اَزمائشاں آوے،
3
۳۔تو تھے اِیئاں خاں راضی ہویا۔کیان٘کے تھاں نا ٹھاء ہے کہ جَݙے تھان٘رو وشواس اَزمایو جاوئی، تو تھے صبر کرݨ خِیکھئی۔
4
۴۔ہر بات میں صبر کرتا رہو کہ تھان٘رو وشواس پَکو ہووے اَن تھے کامل بݨ جاؤ اَن تھاں میں کَئی وی بات رو گھاٹو نی رہ۔
5
۵۔پݨ جے تھاں مئیں خاں کَئی میں خَمجھ رو گھاٹو ہووے، تو او اِیشوَر خاں مانگے اَن او ݙیخے کیان٘کے اِیشوَر ہر کَئی نا بِنا تولے اَن خُوشی خاں ݙئی۔
6
۶۔ پجَݙے پراتھنا کرو، تو وشواس خاں مان٘گو اَن شک نی کرو کیان٘کے شک کرݨ آݪو سمندر رے چھَلاں آݪِیکار ہے جکو بائرے خاں اِیہا اُوہا بہوتے رہئی۔
7
۷۔ایَہڑو مِنکھ ایہ نی خَمجھے کہ پرمیشوَر اُوئے نا کئیں ݙیخے۔
8
۸۔ایَہڑے مِنکھ رو ٻے ٻیڑیاں تے پَگ ہے کیان٘کے او آپری کَئی بات تے قائم کونی رہتو۔
9
۹۔ جکو وشواسی غریب ہے، او اِیئے بات تے فخر کرے کہ اِیشوَر ری نظر میں او اَمِیر ہے۔
10
۱۰۔پݨ جکو وشواسی اَمِیر ہے، او اِیئے بات تے فخر کرے کہ اِیشوَر اُوئے نا نِوڑت ݙِنی ہے۔ اَمِیر ری دولت گاخ رے پھُول آݪِیکار ہیک ݙن ختم ہو جاخے ری
11
۱۱۔کیان٘کے جَݙے خُورج نِخرئی، تو تِکھے تاوڑ خاں گاخ خُوک جاوئی، اُوئے را پھُول کھِر جاوئی اَن اُوئے رو پھُوٹراپ ختم ہو جاوئی۔ اِیئان٘ج اَمِیر وی دولت کماوتے کماوتے مَر جاخے رو۔
12
۱۲۔ دھَن ہے او جکو اَزمائشاں نا برداشت کرئی کیان٘کے وشواس میں پَکو رہوݨ ری وجہ خاں اُوئے نا اِنعام میں اَمر جِیون لابھخے۔ ایہ اِنعام اِیشوَر ہر ہیک نا ݙئی جکو اُوئے خاں پریم راکھئی۔
13
۱۳۔جَݙے کَئی تے اَزمائش آوے، تو او بُرائی کر ری اِیشوَر تے اِلزام نی لگاوے کیان٘کے نی اِیشوَر کَئی نا بُرائی کرݨ رے خارُو اَزماوئی اَن نِیج کوئی بُرائی کر ری اِیشوَر نا اَزما خَگئی۔
14
۱۴۔پݨ ہر کوئی اُوئے گھڑی اَزمائش میں پڑئی جَݙے او آپرے مَن ری مرضی رے لارے بَہی اَن پَچھے اَزمائش رے جاݪ میں جا پھاخئی۔
15
۱۵۔ایہ مرضی پاپ کراوئی اَن جَݙے پاپ بَدھئی، تو موت لے آوئی۔
16
۱۶۔اَے مھارے پریمی بھائیاں، ٹھَگیجو نی۔
17
۱۷۔ہر بھَلی اَن بے عیب نعمت اَکاش خاں یعنی اَپݨے اَکاشی ٻاپ خاں لابھئی۔ خُورج، چان٘د اَن تارا بدلتا رہئی اَن کَݙے اُجاݪو ݙئی اَن کَݙے اَندھارو پݨ اِیئاں نا بݨاوݨ آݪو اِیشوَر کَݙے کونی بدلتو۔
18
۱۸۔اُوئے آپری مرضی خاں خَچائی رے شٻد رے وسیلے آپاں نا بھَݪے جَنم ݙِنو کہ آپاں نا اُوئے رے بݨایوڑے چیزاں میں خاراں خاں گھݨی عزت لابھے۔
19
۱۹۔اَے مھارے پریمی بھائیاں، ایہ بات یاد راکھو کہ ہر مِنکھ خُݨَݨ میں تِکھو، ٻولݨ میں گھٹ اَن رِیخ کرݨ میں ٹھاڈو ہووے۔
20
۲۰۔کیان٘کے رِیخ کر ری اِنسان اِیشوَر ری نیک مرضی پُوری کونی کر خَگتو۔
21
۲۱۔اِیئے خارُو تھے گندے عادتاں اَن بُرا کام کرݨ چھوڑ ݙو اَن اُوئے شٻد نا نِوڑت خاں منو جکو تھاں خُݨیو ہے کیان٘کے ایہ تھان٘ری آتما نا بَچاوݨ ری قُدرت راکھئی۔
22
۲۲۔ تھے اِیشوَر رے شٻد نا نی چھَڑو خُݨو پݨ اُوئے تے بَہو وی خئی۔ جے کوئی اِیئاں کونی کرتو تو آپرے آپ خاں ٹھَگی کرئی۔
23
۲۳۔کیان٘کے جکو وی شٻد نا خُݨئی پݨ اُوئے تے بہوتو کونی، او اُوئے مِنکھ آݪِیکار ہے جکو کاچ میں آپرو ماہن٘ݙو جووئی۔
24
۲۴۔جَݙے آپرے آپ نا جو رو، او جاوئی رو تو بیگو بھُول جاوئی رو کہ اُوئے رو ماہن٘ݙو کیَہڑو ہَتو۔
25
۲۵۔پݨ دھَن ہے او جکو اُوئے دھَرمی قانُون تے بَہی جکے خاں پاپاں ری معافی اَن موت خاں اَزادی لابھئی کیان٘کے او خُݨَݨ خاں پَچھے بھُولتو کونی پݨ اُوئے تے بَہی۔
26
۲۶۔جے کوئی آپرے آپ نا دھَرمی خَمجھئی پݨ آپری زبان نا قاٻُو میں کونی راکھتو، تو آپرے آپ خاں ٹھَگی کرئی اَن اُوئے رو دھَرمی ہووݨ کَئی کام رو کونی۔
27
۲۷۔اَپݨے ٻاپ اِیشوَر ری نظر میں بے عیب اَن بے داغ دھَرم ایہ ہے کہ تھے یتیماں اَن بیوہ لُگائیاں رو مُصیبت میں خیال راکھو اَن آپرے آپ نا دُنیا ری لالچ خاں اݪگا راکھو۔