1
۱۔ اَے بھائیاں، تھے جکو اَپݨے شان آݪے پربھُو، یسوع مسیح تے وشواس راکھئی، کَئی ہیکے رے پاخے نی ہووو۔
2
۲۔فرض کرو، جے ہیک مِنکھ خونے ری بین٘ٹی اَن بھَلا گابھا پہر تے بھَگتی گھر میں آوے اَن ہیک غریب پھاٹوڑا گابھا پہر تے آوے۔
3
۳۔اَن تھے بھَلے گابھاں آݪے رو خاص خیال راکھ رو کَہو کہ، ”ایتھ بھَلی جگہا تے آ ٻیخو۔“ پݨ غریب مِنکھ نا کَہو کہ، ”اوتھ اَبھو رہ جاں ایتھ آ رو اَن ہین٘ٹھا مھارے پَگاں کَڈھے ٻیخ۔“
4
۴۔تو کی اِیئاں کرݨ خاں تھے کَئی ہیکے رے پاخے کونی ہویا اَن کی تھاں ایہ فیصلو بُری نیت خاں کونی کریو؟
5
۵۔اَے مھارے پریمی بھائیاں، خُݨو، کی اِیشوَر اُوئاں نا کونی چُگیا جکو دُنیا ری نظر میں غریب ہے کہ او وشواس میں اَمِیر بݨ جاوے؟ ایَہڑا جِی اُوئے بادشاہی را بارَخ بݨخے جکے رو وعدو اِیشوَر آپرے پریم راکھݨ آݪاں خاں کریو ہے۔
6
۶۔پݨ تھاں تو اُوئے غریب ری عزت کونی کی۔ کی اَمِیر تھاں تے ظُلم کونی کرتا اَن تھاں نا زوری عدالتاں میں کونی لے جاوتا؟
7
۷۔ کی ایہ اوج مِنکھ کونی جکو اُوئے عزت آݪے ناں یعنی پربھُو یسوع رے خِلاف باتاں کرئی، جکے نا تھے منئی؟
8
۸۔تَورَیت شاستر میں لِکھیوڑو ہے کہ،”آپرے پاڑے آݪے خاں آپ جیَہڑو پریم راکھ۔“جے تھے اِیشوَر رے اِیئے شاہی حُکم تے بَہی، تو بھَلو کرئی۔
9
۹۔پݨ جے تھے کَئی ہیکے رے پاخے ہووئی، تو اِیئاں تھے پاپ کرئی اَن دھَرمی قانُون تے کونی بہوتا۔
10
۱۰۔ کیان٘کے جکو کوئی دھَرمی قانُون تے بَہی پݨ اُوئے رے کَئی ہیکے حُکم نا توڑئی، تو خَمجھو او پُورے دھَرمی قانُون نا توڑئی۔
11
۱۱۔اِیشوَر جکے ایہ کَہیو کہ، ”زنا نی کر۔“ اُوئے ایہ وی کَہیو کہ، ”قتل نی کر۔“ جے تھاں مئیں خاں کَئی زنا تو نی کریو ہووے پݨ قتل کریو ہووے، تو پَچھے او دھَرمی قانُون نا توڑݨ ری وجہ خاں قصُوروار ہے۔
12
۱۲۔اِیئے خارُو تھے جکو وی کَہو جاں جکو وی کرو، تو یاد راکھو کہ تھان٘رو فیصلو اُوئے دھَرمی قانُون رے مطابق ہوخے جکو تھاں نا اَزاد کرئی۔
13
۱۳۔کیان٘کے عدالت رے ݙن اِیشوَر اُوئے تے وی دَیا کونی کرے جکو کَئی تے دَیا کونی کرتو پݨ جکو ٻِجاں تے دَیا کرئی اُوئے تے اِیشوَر وی دَیا کرخے۔
14
۱۴۔اَے وشواسیاں، جے کوئی کَہے کہ، ”ہُوں وشواسی ہاں۔“ پݨ اُوئے را کام بُرا ہووے، تو اِیئے رو کی فائدو؟ کی ایَہڑو وشواس اُوئے نا بَچا خَگئی؟
15
۱۵۔فرض کرو کہ جے کَئی وشواسی بھائی جاں ٻہن نا گابھاں اَن ٻاٹی ری لوڑ ہووے۔
16
۱۶۔اَن اُوئے نا جو رو تھاں مئیں خاں کوئی اُوئے نا ایہ چیزاں نی ݙے جکو پہرݨ اَن کھاوݨ رے خارُو ضروری ہے پݨ ایہ کَہہ کہ، ”جا اِیشوَر تھناں خُکھی راکھے۔ خِی خاں بَچے اَن پیٹ بھر ٻاٹی کھا لَئے۔“ تو پَچھے اِیئاں کَہوݨ رو کی فائدو۔
17
۱۷۔بات ایہ ہے کہ چھَڑو وشواس جِی نی ہووے۔ جے وشواس بھیݪا بھَلا کام کونی، تو اِیئے رو کوئی فائدو کونی۔
18
۱۸۔ہو خَگئی کہ کوئی ایہ کَہہ کہ، ”تُوں وشواس راکھئیں اَن ہُوں بھَلا کام کرئیں۔“ ہُوں اُوئے نا کَہیخ کہ، ”تُوں بھَلے کاماں خاں ٹاݪ آپرو وشواس کوکر بتائیخ پݨ ہُوں بھَلے کاماں خاں آپرو وشواس بتا خَگئیں۔“
19
۱۹۔جے کوئی اِیئے بات تے وشواس راکھئی کہ اِیشوَر ہیکج ہے، تو ایہ بھَلی بات ہے۔ ایہ بات تو بھُون٘ت وی منئی اَن ٻِیہی خاں کان٘پئی۔
20
۲۰۔اَے بیوقوف، کی تھناں اِترو وی کونی ٹھاء کہ بھَلا کام کرݨ خاں ٹاݪ وشواس راکھݨ بیکار ہے؟
21
۲۱۔ جَݙے اَپݨے ݙاݙے اَبرہام آپرے ݙِیکرے اِضحاق نا ٻلِیدان کرݨ ری جگہا تے راکھیو، تو کی او اُوئے بھَلے کام ری وجہ خاں نیک کونی بݨایو گیو؟
22
۲۲۔ہمے تھاں جو لِنو رو کہ اَبرہام وشواس راکھ رو ایہ کام کریو اَن اِیئے کام اُوئے رے وشواس نا پُورو کریو۔
23
۲۳۔اِیئاں تَورَیت شاستر ری ایہ بات پُوری ہوئی کہ،”اَبرہام اِیشوَر تے وشواس لے آیو اَن اِیئے بات اُوئے نا اِیشوَر ری نظر میں نیک بݨایو۔“اِیئے وجہ خاں او اِیشوَر رو دوست خَݙایو۔
24
۲۴۔تھاں ݙِٹھو کہ اِیشوَر اِنسان نا چھَڑو وشواس راکھݨ خاں کونی پݨ وشواس رے بھیݪا بھَلے کام کرݨ ری وجہ خاں نیک بݨاوئی۔
25
۲۵۔اِیئان٘ج بُرو کام کرݨ آݪی راحب وی جَݙے اِسرائیلی قوم رے جاسُوساں نا آپرے گھر میں لُکایا اَن شہر رے ٻِجے مارگ خاں بئیر کر را بَچا لِنا، تو کی اِیشوَر اُوئے نا اِیئے بھَلے کام ری وجہ خاں آپری نظر میں نیک کونی بݨایو؟
26
۲۶۔جاں آتما خاں ٹاݪ ݙِیل رو کوئی فائدو کونی، اِیئان٘ج بھَلے کاماں خاں ٹاݪ وشواس رو وی کوئی فائدو کونی۔