1
۱۔اَے بھائیاں، آخری بات ایہ ہے کہ مھان٘رے خارُو پراتھنا کرو کہ پربھُو یسوع رے باتاں ہر جگہا اِیئاں کھِنڈے جاں تھاں مئیں کھِنڈیے ہے اَن اُوئے رے ناں ری بَݙائی ہووے۔
2
۲۔ایہ وی پراتھنا کرو کہ اِیشوَر آپاں نا اُوئاں بُراں اَن پاپیاں خاں بَچا راکھے جکو اُوئے تے وشواس کونی راکھتا۔
3
۳۔پربھُو یسوع رو وعدو خَچو ہے اِیئے خارُو او تھان٘رو وشواس پَکو کر رو تھاں نا شیطان خاں بَچاوتو رہخے۔
4
۴۔مھاں نا پربھُو یسوع میں تھان٘رے بارے میں پُورو بھروسو ہے کہ جکو حُکم مھے تھاں نا ݙئیں وا، تھے اُوئاں تے بَہی وا اَن بہوتا رہخو۔
5
۵۔پربھُو یسوع تھان٘ری مدد کرے کہ تھے اِیشوَر رے پریم اَن مسیح رے صبر رے بارے میں گھݨا خَمجھتا جاؤ۔
6
۶۔اَے بھائیاں، مھے پربھُو یسوع مسیح رے ناں خاں تھاں نا حُکم ݙئیں کہ اُوئاں وشواسیاں خاں اݪگا رہو جکو آݪخ میں زندگی گُزارئی اَن مھان٘رے خُݨایوڑے باتاں رے مطابق کونی بہوتا۔
7
۷۔تھاں نا آپ ٹھاء ہے کہ تھاں نا مھاں آݪِیکار کوکر زندگی گُزارݨ چاہیجے کیان٘کے جَݙے مھے تھاں کَڈھے ہَتا، تو بان٘دا کونی ٻیٹھا رہیا۔
8
۸۔مھاں مُفت میں کَئی ری ٻاٹی کونی کھادی پݨ ݙن رات کماوتا رہیا کہ تھاں مئیں خاں کَئی ماتھے بھار نی بݨاں۔
9
۹۔مھے تھاں تے بھار بݨ خَگتا وا پݨ مھاں اِیئاں کونی کریو اَن تھاں نا بھَلو نمُونو بݨ بتایو کہ تھے وی مھاں آݪِیکار بَݨو۔
10
۱۰۔جَݙے مھے تھاں کَڈھے ہَتا، تو اُوئے گھڑی تھاں نا حُکم ݙِنو تو، ”جکو کام کونی کرݨ چاہوتو، او ٻاٹی وی نی کھاوے۔“
11
۱۱۔ہمے مھاں نا ایہ ٹھاء لاگی ہے کہ تھاں مئیں خاں کئین٘ک مِنکھ آݪخ میں زندگی گُزارئی وا۔ او آپ کام کونی کرتا اَن ٻِجاں رے کاماں میں لَتاں اَڑاوئی۔
12
۱۲۔مھے پربھُو یسوع مسیح رے ناں میں ایَہڑے مِنکھاں نا حُکم ݙے خَمجھاوئیں کہ او چپ چاپ آپرو کام کرے اَن آپ کما کھاوے۔
13
۱۳۔اَے بھائیاں، تھے بھَلائی کرݨ میں ہمت نی ہارو۔
14
۱۴۔جے کوئی مِنکھ اِیئے خَط میں لِکھیوڑے باتاں تے نی بہہ، تو اُوئے نا دِید میں راکھو پݨ اُوئے خاں واسطو نی راکھو کہ او پچھتاوے۔
15
۱۵۔پݨ تھے اُوئے نا آپرو دُشمن نی خمجھو اَن بھائی خَمجھ رو خَمجھاؤ۔
16
۱۶۔ہمے پربھُو جکو مِنکھاں نا خُکھ ݙئی، او تھاں نا ہمیشہ اَن ہر طرح خاں خُکھا راکھے اَن تھاں بھیݪو ہووے۔
17
۱۷۔ہُوں پولُس آپرے ہاتھ خاں سلام لِکھئیں۔ مھارے ہر خَط میں مھارو ایہ جِی نِشان ہے اَن ہُوں اِیئان٘ج لِکھئیں۔
18
۱۸۔اَپݨے پربھُو، یسوع مسیح ری کِرپا تھاں خاراں تے ہووتی رے۔