1
۱۔اَے بھائیاں، پربھُو یسوع مسیح رے آوݨ اَن اَپݨو اُوئے کَڈھے بھیݪو ہووݨ رے بارے میں مھے تھان٘ری مِنتھ کرئیں
2
۲۔جَݙے مِنکھ ایہ کَہہ کہ پویتر آتما اُوئاں نا کَہیو ہے جاں اِیشوَر اُوئاں نا خُݨایو ہے جاں اُوئاں نا مھان٘ری طرف خاں کوئی خَط لابھو ہے کہ پربھُو یسوع پاچھو آ گیو رو، تو تھے ایہ بات خُݨ ری پریشان نی ہویا اَن نِیج گھٻرایا۔
3
۳۔تھے کَئی ری ٹھَگی میں نی آیا کیان٘کے پربھُو یسوع رے آوݨ خاں پہل گھݨا مِنکھ اِیشوَر رے خِلاف ہو جاخے را اَن اِیشوَر رو ہیک باغی ظاہر ہوخے جکے نا اِیشوَر ہمیشہ ری موت ری سزا ݙیخے۔
4
۴۔او ہر دیوی دیوتا اَن مُورتیاں رے خِلاف ہوخے اَن آپرے آپ نا اِیئاں خاراں خاں موٹو خَمجھخے، اِتری تک کہ او اِیشوَر رے گھر میں ٻیخ رو کَہخے، ”ہُوں اِیشوَر ہاں۔“
5
۵۔تھاں نا یاد ہوخے کہ جَݙے ہُوں تھاں کَڈھے ہَتو، تو مھیں ایہ خارے باتاں تھاں نا خُݨا ݙِنے تے۔
6
۶۔تھاں نا اُوئے بات ری ٹھاء ہے جکو حالی اُوئے باغی نا آوݨ خاں روکئی وی پݨ جَݙے ٹائیم آخے، پَچھے او ظاہر ہوخے۔
7
۷۔او باغی لُک رو آپرو کام کرئی وو پݨ کوئی ہے جکے اُوئے نا ظاہر ہووݨ خاں روکیوڑو ہے۔ جَݙے اِیشوَر اُوئے روکݨ آݪے نا اݪگو کرخے۔
8
۸۔پَچھے او باغی ظاہر ہوخے۔ پݨ جَݙے پربھُو یسوع آخے، تو اُوئے نا آپری پھُون٘ک خاں مار ناکھخے اَن آپرے درشن رے اُجاݪے خاں مِٹا ناکھخے۔
9
۹۔جَݙے او باغی آخے، تو شیطان را کام کرخے اَن ہر طرح را کُوڑا معجزا، عجیب کام اَن نِشان بتاخے۔
10
۱۰۔او اُوئاں نا ہر طرح رے پاپ میں پھَخاخے، جکاں نا ہمیشہ ری موت ری سزا ݙِنی جاخے کیان٘کے اُوئاں خَچ خاں پریم کونی راکھیو، جے او راکھن٘ت تو بَچ جاون٘ت۔
11
۱۱۔ اِیئے وجہ خاں اِیشوَر ایَہڑے بھَٹکیوڑاں نا اُوئاں رے حال تے چھوڑ ݙیخے کہ اُوئے کُوڑے ری بات رو یقین کرے۔
12
۱۲۔اِیئاں اُوئاں خاراں نا سزا ݙِنی جاخے جکو خَچ رو یقین کونی کرتا پݨ بُرائی میں راضی رہئی۔
13
۱۳۔پݨ اَے بھائیاں، اَے پرمیشوَر رے پیاراں، مھان٘رو فرض ہے کہ تھاں خاراں خارُو مھے ہمیشہ اِیشوَر رو شُکر کراں کیان٘کے اُوئے تھاں نا شرُوعات خان٘ج اِیئے خارُو چُگ لِنا را کہ تھے آتما خاں پویتر ہو را اَن خَچ تے وشواس لے آ را مُگتی لو۔
14
۱۴۔اُوئے مھان٘ری خُݨایوڑی خُوشی ری خبر رے وسیلے خاں تھاں نا اِیئے خارُو ہیلو کریو کہ تھاں نا مھان٘رے پربھُو، یسوع مسیح جیَہڑی شان لابھے۔
15
۱۵۔اَے بھائیاں، پَکو وشواس راکھو اَن اِیئاں باتاں ماتھے بَہو جکو مھاں خُݨائے جاں خَط میں لِکھ تھاں نا خِکھائے ہے۔
16
۱۶۔ہمے اَپݨو پربھُو یسوع مسیح آپ اَن اَپݨو ٻاپ اِیشوَر جکے آپاں خاں پریم راکھیو اَن آپاں نا آپری کِرپا خاں ہمیشہ خارُو تسلی اَن پَکی اُمید ݙِنی۔
17
۱۷۔تھان٘رے مَن نا تسلی ݙے اَن تھاں نا بھَلو ٻولݨ اَن بھَلائی کرݨ ری ہمت ݙے۔