1
۱۔پولُس، سِلوانُس اَن تِیمُتھِیُس ری طرف خاں تھِسلُنِیکے ری وشواسی منݙݪی رے ناں جکو اَپݨے ٻاپ اِیشوَر اَن پرمیشور، یسوع مسیح تے وشواس راکھئی۔
2
۲۔ ٻاپ اِیشوَر اَن پرمیشور یسوع مسیح ری کِرپا تھاں ماتھے ہووے اَن او تھاں نا خُکھا راکھے۔
3
۳۔ اَے بھائیاں تھارے خارو ایشور رو شُکر کرݨ مھاں تے فرض ہے۔ایہ بھَلی بات ہے کہ تھان٘رو وشواس بَدھئی وو اَن ہیکے ٻِجے خارُو تھان٘ری پریت وی بَدھئی وی۔
4
۴۔اِیئے وجہ خاں مھے اِیشوَر رے وشواسی منݙݪیاں میں تھان٘ری تعریف کرئیں کیان٘کے تھے ݙُکھ اَن مُصیبت میں وی صبر اَن وشواس راکھئی۔
5
۵۔ایہ اِیئے بات رو ثبوت ہے کہ اِیشوَر خَچائی خاں انصاف کرخے کہ تھاں نا آپری بادشاہی رے لائق بݨاوے جکے رے خارُو تھے ݙُکھ اُکھݨئی وا۔
6
۶۔ جکو تھاں نا ݙُکھ ݙئی، اِیشوَر اُوئاں رو انصاف کرخے اَن اُوئاں نا اِیئے رے بدلے میں ݙُکھ ݙیخے۔
7
۷۔ پرمیشور یسوع آپاں نا اِیئے ݙُکھ خاں چھُڑاخے، جَݙے او آپرے طاقت آݪے فرشتاں بھیݪو اَکاش خاں آخے۔
8
۸۔ پَچھے او اُوئاں نا ٻَݪتے باخݙے میں سزا ݙیخے، جکو نی اِیشوَر نا اوݪکھئی اَن نِیج اَپݨے پرمیشور یسوع رے بارے میں خُوشی ری خبر نا منئی۔
9
۹۔ او ہمیشہ خارُو پرمیشوَر رے آگے خاں اَن اُوئے ری شان آݪی قُدرت خاں اݪگا کریا جاخے۔
10
۱۰۔جکے ݙن پربھُو یسوع آخے، تو اُوئے را پویتر کریوڑا یعنی اُوئے تے وشواس لے آوݨ آݪا، اُوئے ری شان ظاہر کرخے اَن حیران ہوخے۔ تھے وی اُوئاں رے بھیݪا ہوخو کیان٘کے تھے مھان٘ری گواہی تے وشواس لے آیا۔
11
۱۱۔اِیئے خارُو مھے ہمیشہ تھاں خارُو پراتھنا کرئیں کہ اِیشوَر تھاں نا آپرا مِنکھ بݨاوے، جکے رے خارُو تھاں نا ہیلو کریو ہے۔ او تھان٘ری بھَلائی کرݨ ری ہر مرضی اَن وشواس رے ہر کام نا آپری قُدرت خاں پُورو کرے۔
12
۱۲۔اَپݨے اِیشوَر اَن پرمیشور یسوع مسیح ری کِرپا خاں اِیئاں ہووے کہ پرمیشور یسوع رے ناں نا تھاں میں عزت لابھے اَن تھاں نا اُوئے میں۔