1
۱۔اَے پریمی بھائیاں، ایہ ٻِجو خَط ہے جکو ہُوں تھاں نا لِکھئیں وو۔ مھیں ٻِنہے خَطاں میں گھݨے باتاں یاد کرا رے تھان٘ری خوچ نا صاف کرݨ ری کوشش کی ہے۔
2
۲۔ہُوں چاہوئیں کہ تھے او خارے باتاں یاد راکھو جکو پویتر نبیاں پہل خُݨائے ہَتے اَن او حُکم وی یاد راکھو جکو اَپݨے پربھُو اَن مُگتی ݙیوݨ آݪے رے سنتاں تھاں نا خُݨایو ہے۔
3
۳۔خاراں خاں پہل، ایہ بات خَمجھو ری کہ آخری ݙناں میں ایَہڑا مِنکھ آخے جکو خَچائی را ہاخا کرخے اَن ݙِیل ری مرضی رے مطابق زندگی گُزارخے۔
4
۴۔او کَہخے کہ، ”پربھُو یسوع کیتھ ہے جکے آوݨ رو وعدو کریو ہَتو؟ کیان٘کے مھان٘را ٻاپ ݙاݙا تو مَر گیا را اَن جَگت بݨَݨ خاں لے اَن آج تک خارو کُجھ اُوئاں رو اُوئاں ہے۔“
5
۵۔اُوئاں نا ٹھاء ہے، تو وی بھُول گیا را کہ اِیشوَر آپرے حُکم خاں ایہ اَکاش بݨایا اَن اُوئے پاݨی نا ہیک جگہا بھیݪو کر رو دھرتی نا اُوئے مئیں خاں بݨایو۔
6
۶۔اِیئے پاݨی رے سیلاب خاں اُوئے زمانے ری دُنیا ݙُوٻ ری تباہ ہو گی۔
7
۷۔اِیشوَر آپرے اِیئے حُکم خاں اَکاش اَن دھرتی نا باخݙے رے خارُو راکھیا ہے جَݙے اِیشوَر نا نی منَݨ آݪاں ری عدالت ہوخے، تو او ٻَݪ را تباہ ہو جاخے۔
8
۸۔ اَے پریمی بھائیاں، ایہ بات یاد راکھو کہ پرمیشوَر رے خارُو ہیک ݙن، ہزار سال رے برابر ہے اَن ہزار سال، ہیک ݙن رے برابر۔
9
۹۔ پرمیشوَر آپرو وعدو پُورو کرݨ میں دیر کونی کرتو، جیَہڑی دیر کئیں مِنکھ خَمجھئی پݨ تھان٘رے خارُو صبر کرئی کیان٘کے او کونی چاہوتو کہ کوئی ہمیشہ ری موت مَرے پݨ او چاہوئی کہ خارا توٻاں کرے۔
10
10۔پربھُو رو ݙن اِیئاں آخے کہ کَئی نا ٹھاء اِی کونی لاگے۔ اُوئے ݙن اَکاش گھݨے شور ری اَواز خاں ختم ہو جاخے را، اَکاشی چیزاں پِگھݪ جاخے اَن تباہ ہو جاخے رے، دھرتی اَن اُوئے ماتھے ہووݨ آݪا کام پرمیشوَر ری عدالت میں خامھا ہوخے۔
11
۱۱۔جَݙے ایہ خارے چیزاں اِیئاں ختم ہو جاخے رے، تو خوچو کہ تھان٘ری زندگی کیَہڑی ہووݨ چاہیجے؟ تھان٘ری زندگی پویتر اَن اِیشوَر نا منَݨ آݪی ہووݨ چاہیجے۔
12
۱۲۔اِیشوَر رے اُوئے آوݨ آݪے ݙن رے اِنتظار میں رہو کہ او ݙن بیگو آوے جَݙے اَکاش ٻَݪ را تباہ ہو جاخے اَن اَکاش رے چیزاں باخݙے ری تَپ خاں پِگھݪ جاخے۔
13
۱۳۔پݨ آپاں اُوئے نَویں اَکاش اَن نَویں دھرتی رے اِنتظار میں ہاں جکے رو وعدو اُوئے کریو ہَتو اَن جیتھ ہمیشہ نیکی ہوخے۔
14
۱۴۔اَے پریمی بھائیاں، کیان٘کے تھے اِیئیَج اِنتظار میں رہئی اِیئے خارُو تھان٘ری پرمیشوَر خاں خُلح ہووے اَن تھے اُوئے رے آگے بے داغ اَن بے گُناہ بݨَݨ ری کوشش کرو۔
15
۱۵۔یاد راکھو، پرمیشوَر اِیئے خارُو صبر کرئی کہ دُنیا نا مُگتی لیوݨ رو موقعو لابھے۔ مھان٘رے پیارے بھائی پولُس وی اِیشوَر ری ݙِنوڑی خَمجھ خاں تھاں نا آپرے خَطاں میں ایَج باتاں لِکھیے تے۔
16
۱۶۔ اُوئاں مئیں خاں کئیں باتاں ایَہڑے ہے جکاں نا خَمجھݨ مُشکل ہے۔ اَݨ خَمجھ اَن وشواس میں کمزور مِنکھ اُوئاں باتاں نا اِیئاں بِگاڑئی جاں او شاستر رے ٻِجے باتاں نا بِگاڑئی۔ اِیئاں او آپرے آپ نا ہمیشہ ری موت ری سزا ݙئی۔
17
۱۷۔مھارے پریمی بھائیاں، ہُوں تھاں نا ٹائیم خاں پہل ایہ باتاں خُݨاوئیں وو۔ اِیئے خارُو خبردار رہو کہ کیتھ اِیئاں نی ہووے کہ اِیشوَر نا نی منَݨ آݪے مِنکھاں ری غلط خوچ تھاں نا خِدھے مارگ خاں بھَٹکا ݙے اَن تھے آپرے وشواس نا چھوڑ ݙو۔
18
۱۸۔اِیئے ری جگہا اَپݨے پربھُو اَن مُگتی ݙیوݨ آݪے یسوع مسیح ری کِرپا اَن خَمجھ میں بَدھتا جاؤ۔ اُوئے ری بَݙائی ہیݨا خاں لے ہمیشہ تک ہووتی رہ۔ اِیئان٘ج ہووے۔