1
۱۔جاں پہل اِسرائیلی قوم میں کُوڑا نبی ہَتا اِیئان٘ج تھاں میں وی کُوڑا گرُو ظاہر ہوخے۔ تھاں نا ٹھاء اِی کونی لاگے کہ او تھاں نا ایَہڑے کُوڑے باتاں خِکھاخے جکو تھاں نا برباد کر ݙیخے۔ او اُوئے مالک نا اوݪکھݨ خاں اِنکار کرخے جکے اُوئاں رے خارُو آپرو پراݨ ݙے رو اُوئاں نا مول لِنا ہَتا۔ اِیئاں او آپرے آپ نا بیگا برباد کر ݙیخے۔
2
۲۔گھݨا اُوئاں ری بدکاری رے لارے بہخے، اِیئے وجہ خاں وشواس رے خَچے مارگ رے خِلاف باتاں ہوخے۔
3
۳۔ او آپری لالچ رے خارُو کُوڑے باتاں خِکھاخے اَن تھاں خاں ناجائز فائدو اُکھݨخے پݨ اِیشوَر اُوئاں رو فیصلو پہل خان٘ج کر لِنو رو اَن او اِیئے میں دیر کونی کرے کیان٘کے او خُوتوڑو کونی پݨ اُوئاں نا موت ری سزا ݙیوݨ رے خارُو تیار ہے۔
4
۴۔جووو، اِیشوَر اُوئاں فرشتاں نا وی سزا ݙِنی جکاں پاپ کریو اَن اُوئاں نا اَندھارے رے خان٘کݪاں میں ٻان٘دھ رو نرگ میں ناکھ ݙِنا جیتھ او عدالت رے ݙن تک قید رہخے۔
5
۵۔اِیئان٘ج نُوح رے زمانے میں وی اِیشوَر نا نی منَݨ آݪاں نا اُوئے طوفان میل رو مار ناکھیا، چھَڑو نیکی رو پرچار کرݨ آݪو نُوح اَن اُوئے رے خاندان را خات جِݨا بَچ گیا۔
6
۶۔اِیئان٘ج اِیشوَر سدُوم اَن عمُورہ رے شہراں نا سزا ݙیوݨ رو فیصلو کریو اَن اُوئاں نا باخݙے خاں ٻاݪ اَن راکھ بَݨا ݙِنا۔ اِیئاں آوݨ آݪے زمانے رے وشواس نی راکھݨ آݪاں رے خارُو ایہ مِثال بَݨا ݙِنی کہ اُوئاں خاں کی ہوخے۔
7
۷۔اِیشوَر لُوط نا بَچا لِنو جکو نیک ہَتو اَن اِیشوَر نا نی منَݨ آݪے مِنکھاں رے بُرے کاماں خاں تن٘گ ہَتو۔
8
۸۔کیان٘کے او نیک اُوئاں بھیݪو رہتو اَن روز اُوئاں رے بُرے کاماں نا جو اَن خُݨ رو آپرے مَن میں گھݨو پریشان ہووتو رہتو۔
9
۹۔ اِیئاں پرمیشوَر نا نیک مِنکھاں نا اَزمائش خاں بَچاوݨ اَن پاپیاں نا عدالت ری سزا رے خارُو راکھݨ ری ٹھاء ہے۔
10
۱۰۔خاص کر اُوئاں نا جکو ݙِیل رے بُرے خیالاں میں رہئی اَن اِیشوَر ری پرتاٻ آݪی قُدرت نا کئیں کونی خَمجھتا۔ او اِیشوَر رے خِلاف اَن اہن٘کار میں ہے اَن اَکاش رے اختیار رے خِلاف باتاں کرݨ خاں کونی ٻِیہوتا۔
11
۱۱۔فرشتا جکو طاقت اَن اختیار میں اُوئاں خاں گھݨا ہے، او وی پرمیشوَر رے آگے اُوئاں ہستیاں رے خِلاف بات کرݨ ری ہمت کونی کرتا۔
12
۱۲۔ اِیئے خارُو ایہ کُوڑا گرُو، اَݨ خَمجھ ہے جکاں جِناوراں آݪِیکار جھَلیجݨ اَن مَریجݨ رے خارُو جَنم لِنو ہے۔ او اُوئاں باتاں رے خِلاف ٻولئی جکاں رے بارے میں اُوئاں نا ٹھاء اِی کونی۔ ایہ آپرے بُرے باتاں خاں برباد ہو جاخے۔
13
۱۳۔ٻِجاں رو بُرو کرݨ رے بدلے، اِیئاں روج بُرو ہوخے۔ او خاراں رے خامھا عیش کر ری راضی ہووئی۔ ایَہڑا مِنکھ جکو تھاں بھیݪا کھاوئی پِیئی اَن آپری خُوشی رے خارُو دعوتاں کر رے عیش کرئی، ہیک داغ اَن عیب ہے۔
14
۱۴۔او زنا کرݨ رے خارُو ہر گھڑی بُرے لُگائیاں نا لابھتا رہئی اَن پاپ کرݨ کونی چھوڑتا۔ او گھٹ وشواس آݪاں نا بُرے کاماں میں پھخاوئی۔ اُوئاں را مَن لالچ خاں بھریوڑا ہے۔ او لعنت را ماریوڑا ہے۔
15
۱۵۔اُوئاں خِدھو مارگ چھوڑ ݙِنو رو اَن بھَٹک گیا را۔ او بعُور رے ݙِیکرے بِلعام رے مارگ ماتھے بَہی وا جکے پئیخاں رے لالچ میں بُرا کام کرݨ پسند کریا۔
16
۱۶۔اُوئے آپرے قصُور ری وجہ خاں آپ ماتھے لعنت لِنی۔ پݨ گَݙھی اِنسان آݪِیکار ٻول ری اُوئے نبی نا پاپ کرݨ ری بے وقوفی خاں روکیو۔
17
۱۷۔کُوڑا گرُو خُوکوڑے کھُوہ اَن بائرے خاں اُݙتے جھُڑ آݪِیکار ہے۔ اُوئاں ری اَخیر اَندھار گھور ہوخے۔
18
۱۸۔او اہن٘کار رے فضول باتاں کر رے بدکاری رے وسیلے ایَہڑے مِنکھاں نا ݙِیل ری مرضی رے بُرے کاماں میں پھخاوئی جکو بھَٹک جاوݨ آݪاں مئیں خاں بَچ گیا ہَتا۔
19
۱۹۔ایہ ٻِجاں خاں تو اَزادی رو وعدو کرئی پݨ آپ بدکاری را غُلام ہے کیان٘کے مِنکھ اُوئے روج غُلام ہے جکو اُوئے نا آپرے بَخ میں کر لئی۔
20
۲۰۔جَݙے کوئی اَپݨے پربھُو اَن مُگتی ݙیوݨ آݪے یسوع مسیح نا جاݨئی، تو او دُنیا رے بُرے کاماں خاں بَچ جاوئی۔ پݨ جَݙے او ہیک واری بھَݪے اِیئاں بُرے کاماں رو غُلام بݨ رو پھاخ جاوئی، تو اُوئے رو حال پہل خاں وی بُرو ہو جاوئی۔
21
۲۱۔جکو خَچائی رے مارگ نا اوݪکھݨ خاں پَچھے اِیشوَر رے ݙِنوڑے حُکم خاں پھِر گیا را، اُوئاں رے خارُو بھَلو ایہ ہَتو کہ او اِیئے مارگ نا اوݪکھن٘ت اِی نی۔
22
۲۲۔اُوئاں ماتھے ایہ کَہاترا پُورا ہووئی کہ،”کُتو پاچھو آ رو آپری اُلٹی کھاوئی۔“”خُوئر جھِلاوݨ خاں پَچھے پاچھو گپڑ میں جاوئی۔“