¹ Pawumalilo, wanyinane, zewelanji mu Mfumu. Amuno nene pakuwalika ivintu ivili vyonga kwakwe mwemwe swinya asantazi kwe nene, nga chiwa chinjilizya mwemwe. ² Chenjelanji nawa simbwa. Chenjelanji nawa wonvi wawo awawipe. Chenjelanji nuwuputulwa. ³ Amuno asweswe wano awuputulwe_wano wakusokowalila umuzimu we Leza, nukumeka mwe Kilisitu Yesu, nga wasi nanti asuwilo mumuwili. ⁴ Nanti awonye, nene nenga ndi nisuwilo mumuwili. Nge nati imba navyo ukulusya. ⁵ Naputuzilwe pawanda we kananimonsi, uwa wantu wawa Israyeli, awa luko lwe Benjamini, umuhebeli awawahebeli; ukulingana ni sundo, umufalisayi. ⁶ Vino muno ukuyipa, navwimile ikeleziya; vino awulungamane pansi pisundo, ntalinji nakampifya. ⁷ Ukuwa ivintu vino vyalinji amuzano kwakwe nene, navisenzile ukuwa avintamuzano umulandu ne Kilisitu. ⁸ Nakawuzyenye, kanonzi nkupenda ivintu vyonsi ukuwa asamuzano wawumanyinsanie wapapela uwe Kilisitu Imfumu yane. Amuno nati mbika ivintu vyonsi mwakwe weliwe_swinya nkuvisenda ukuwa avi swaswa_ukuti umuzano awe we Kilisitu ⁹ nga nukuzanwa mwakwe weliwe, asawulungamane wakwe nene nenga ukufuma kwisundo, kweni chino chili ukupitila mwisuwilo mwe Kilisitu_uwulungamane wakufuma kwe Leza wu no asuwilo. ¹⁰ Achino kanonzi kasi mumanye namaka yakuzyulupuka kwakwe nuwulilani wamatamyo yakwe, ukuwa vino weliwe mumfwa yakwe, ¹¹ achino munzila yimwi ninga manyinchisya ukuzyulupuka ukufuma mumfwa. ¹² Asakuti nati zana kali vyo ivintu, pamwi ne mutele kali, kweni nkutwalilila ukulemelela kwakwe chocho chino nalemile mwakwe Kilisitu Yesu. ¹³ wamunyina, ntakwelengania kuno nene nenga nati ndemelezya kwakwe chocho. kweni chonga chino nkuwomba: ukwiwilila chino chili kunsizi nukwelenganizya inkolelo chino chili kunkolelo, ¹⁴ Nkutwalilila kwe chino nkuluchila pakulolechesya pa chawila cha lwito lwapapela lwe Leza mwe Kilisitu Yesu. ¹⁵ Sweswe swensi wano awakule, zanji twelenganie munzila yoo; nga ndi ukwelengania umwakupusana pakwe chonsinye, eLeza aliwumbula swinya kwakwe wewe. ¹⁶ chingatenga, ponsi pano twati tufika, zanji tulemelele pakwe chocho. ¹⁷ Wanji awakusendela nene, wamunyina. Palamilani mulolechesye wawo wano wakupita muchikolanio chili mwakwe sweswe. ¹⁸ Awavule wano wakupita_wawo kuvye wino natalika nkawanena, nga kanonzi nkuwanena namansonzi_vino awalwani wawuchingane we Kilisitu. ¹⁹ Uwumalilo wawo awononi. Amuno kaleza kawo awula, nuwuchindami wawo ansoni zyawo. Wakwelengania kuvya munsi yapansi. ²⁰ Ukuwa uwikazi witu wuli mwiyulu, kuno swensi swinya tukulindilila katula, Imfumu Yesu Kilisitu. ²¹ Alipilula Imiwili yitu iyitonte kumiwili iyipangwe iyilingane nuwuchindami wamuwili wakwe, ayapangwe namaka yanzuto zyakwe pakuwika ivintu vyonsi kwakwe weliwe wenga.