¹ Amuno nkasi mumanye ukulwisya ukukulu ko ndinako pakwe mwemwe, nawawo wali kuladisiya, nga nawavule wano watani walole ichinsyo chane mumuwili. ² Nkuwomba ukuti imbomye imyenzo yawo pakuletwa ponga mulukundo nga nakunsawu zyonsi izyakusimichila infichilikwe iya kivwichisizye, mukumanyinchisya inkama ya chisinka iye Leza, wino, we Kilisitu. ³ Mwakwe weliwe mwati muvwama insawu zyonsi izya njilu nuwumanyinchisye. ⁴ Nkuvawnga choo ukuti patawa wumwi ukuwa chenjezya numuvwango uwa kuwazembeleka. ⁵ Chingatenga insi namwewmwe mumuwili, ukuwa ndi namwemwe muwuzimu. Nkuzewela pakulola umutantiko wuzima namaka yisuwilo lyinu mwe Kilisitu. ⁶ Pano mwapochelezile Kilisiltu I mfumu, pitani mwakwe weliwe. ⁷ Musimpe mwakwe weliwe, muzengwe pakwe weliwe, mwikalisye mwisuwilo ndivino mwasambilizizwe, nga muvuzye mukusalifya. ⁸ Lolechesyani kuno wumwi atakawapoke ukupitila mumano namuwufi uwavye, ukulingana nu mwata wawantu, pakukonka imizimu yakutalichila iyansi, nanti akukonka kwe Kilisitu. ⁹ Amuno mwe weliwe uwufichilikwe we Leza wukakwikala mumiwele yamuwili. ¹⁰ Mwati mwizulwa mweweliwe, wino amutwe wa cha maka chonsi ni nsambu. ¹¹ Mwakwe weliwe mwaputuzilwe nuwuputulwe wuno asawuwombwe nawantu mukufumya umuwili wamutande, kweni uwuputulwe we Kilisitu. ¹² Mwazisilwe naweliwe muwubatizo, nga mwakwe weliwe mwazyulupusilwe ukupitila isuwilo mumaka yakwe Leza, wino wamuzyulupusizye kuwufwe. ¹³ Pano mwazyulupusizwe mumawembuko yinu namuwuntaputulwa wa muwili winu, wawapanzile mwemwe awawumi ponga naweliwe nga nukutetela sweswe swensi uwononi witu. ¹⁴ Wakomile amawaliko yankongole yano yimilile ukususania naswe namasundo yakwe. Wayafumizye pakuyapamantila pawuchingane. ¹⁵ Wafumizye ivyanzo awamaka ninsambu nukuwapanga woliwo ukuloleka apatiswe, nukuchinvya pewoliwo pawuchingane. ¹⁶ Achino pawa wumwi uwakupanzya mwemwe mukulya namu pamwi mukung'wa, pamwi pawanda wakuzewela pamwi umwezi umupya, pamwi kuvye manda ya sabata. ¹⁷ Vyoo achizungwani cha vintu vino vikwiza, kweni umuwili awe Kilisitu. ¹⁸ Mutaleka wumwi wino akulonda ukuyichefya nuwakufukamila awangeli awapanzye ku chilambu chinu. Umuntu vino wenye akakwinjila muvintu vino aviweni nga ayitutuwalika nimelenganio yamuwili wakwe. ¹⁹ Atakulematila ku mutwe. Akumutwe kuno umuwili wonsi muminyepwa namunkole likapwa nukuwa ponga, likakula nukukula ukupwe ne Leza. ²⁰ Ndiwafwile ponga ne Kilisitu ukulekana nimizimu yansi yapansi ayantaliko, nga wuzye achani ukwikala vino awachinvwe kunsi yapansi: ²¹ Utalema, nanti akuwonja, nanti akukumya''? ²² Ivintu vyonsi vyo viliyononeka mumiwonvezye, ukulingana nakalinganizizye nivisambilizyo vya wantu. ²³ Insambu zyo zili ni njelu izipangwe zyonga izyawupepelo nukuyiochefya nukusita ukusayilila umuwili. Kweni yasi namaka ayakulesya ichakwikusya cha muwili.