¹ Lumipas ang dalawang buong taon, nagkaroon ng panaginip ang hari ng Ehipto. Sa panaginip, siya ay nakatayo sa tabi ng Ilog Nilo. ² Walang anu-ano ay pitong malulusog na matabang mga baka ang biglang lumitaw. Nagsimula silang kumain ng mga damo na nasa pampang ng ilog. ³ Maya-maya, may pitong baka, hindi malulusog at payat, ang lumabas sa likod nila galing sa Ilog Nilo. Tumayo sila sa tabi ng mga matabang baka na nasa pampang ng ilog. ⁴ Pagkatapos, kinain ng mga hindi malulusog na payat na mga baka ang pitong malulusog na matatabang mga baka. Pagkatapos, gumising ang hari. ⁵ Natulog ulit ang hari, at siya ay nagkaroon ng isa pang panaginip. Sa pagkakataong ito, nakakita siya ng pitong mga uhay ng butil na puno ng ubod ng butil at hinog, at lahat ay tumutubo sa iisang tangkay. ⁶ Kasunod niyon, nakita ng hari na may iba pang pitong mga uhay ng butil ang tumubo sa tangkay na iyon. Sila ay payat at tinuyo na ng init ng silangang hangin. ⁷ Pagkatapos, nilamon ng pitong payat na mga uhay na butil ang pitong hinog na uhay. Pagkatapos, nagising ang hari. Naisip niya na siya pala ay nananaginip. ⁸ Pero sa kinaumagahan siya ay nabagabag tungkol sa kahulugan ng panaginip. Kaya ipinatawag niya ang lahat ng mga salamangkero at mga matalinong lalaki na nakatira sa Ehipto. Sila ay sinabihan niya ng kaniyang napanaginipan pero wala sa kanila ang makakapagsabi sa kaniya ng kahulugan ng dalawa niyang mga panaginip. ⁹ Sinabi ng punong serbidor ng inumin sa hari, "Ngayon ay may natatandaan akong isang bagay na dapat sasabihin ko sa iyo! Nakagawa ako ng mali sa pamamagitan ng paglimot na sabihin ito sa iyo. ¹⁰ May panahon na ikaw ay galit sa aming dalawa. Kaya nilagay mo ako at ang punong panadero sa bilangguan sa bahay ng kapitan ng mga bantay ng palasyo. ¹¹ Habang kami ay naroroon, isang gabi ay bawat isa sa amin ay may panaginip, at ang mga panaginip ay may magkaibang kahulugan. ¹² Mayroong isang lalaking batang Hebreo na kasama namin doon. Siya ay isang lingkod ng kapitan ng mga bantay ng palasyo. Sinabi namin sa kaniya kung ano ang napanaginipan namin, at sinabi niya kung ano ang kahulugan ng mga panaginip. Sinabi niya sa bawat isa sa amin ang kahulugan ng aming mga panaginip. ¹³ Ang nangyari pagkatapos niyon ay pareho sa kahulugan ng sinabi niya sa amin: Sinabi mo na makakamit ko ulit ang dating kong gawain, pero ang isa ay pinatay sa pamamagitan ng pagbitay." ¹⁴ Nang marinig iyon ng hari, sinabihan niya ang ilan sa mga lingkod na dalhin si Jose sa kaniya at dali-dali nilang kinuha si Jose palabas ng bilangguan. Nag-ahit si Jose at nagsuot ng mas maayos na mga damit at siya ay pumunta at tumayo sa harapan ng hari. ¹⁵ Sinabi ng hari kay Jose, "Mayroon akong dalawang panaginip, at walang ni isa ang makakapagsabi sa akin kung ano ang kanilang kahulugan. Pero isang tao ang nagsabi sa akin na kung makarinig ka ng isang taong nagsasabi ng kaniyang napanaginipan, masasabi mo sa taong iyon kung ano ang mga kahulugan ng panaginip." ¹⁶ Pero sumagot si Jose sa hari, "Hindi, hindi ko iyan magagawa. Ang Diyos ang nakakaalam ng kahulugan ng mga panaginip, pero binigyan niya ako ng kakayanang sabihin sa iyo ang kahulugan nila at sila ay mangangahulugan ng isang mabuting bagay." ¹⁷ Sinabi ng hari kay Jose, "Sa una kong panaginip ako ay nakatayo sa pampang ng Ilog Nilo. ¹⁸ Agad-agad ay pitong malulusog na matabang mga baka ang biglang umahon sa ilog at nagsimula silang kumain sa damo na nasa pampang ng ilog. ¹⁹ Maya-maya ay may iba pang pitong mga baka, pangit at payat ang umahon sa likuran nila mula sa ilog. Hindi ako kailanman nakakita ng ganoong pangit na mga baka sa buong lupain ng Ehipto! ²⁰ Kinain ng payat na pangit na mga baka ang pitong matabang mga baka na naunang umahon. ²¹ Pero pagkaraan, walang ni isa ang makakaalam na sila ay kinain ng mga payat na mga baka dahil sila ay sadyang pangit gaya ng dati. Pagkatapos, ako ay gumising. ²² Pagkatapos, nagkaroon pa ako ng isa pang panaginip. Nakakita ako ng pitong mga uhay ng butil. Sila ay puno ng ubod ng butil at hinog at silang lahat ay tumutubo sa isang tangkay. ²³ Pagkatapos, sa aking pagkagulat, nakakita ako ng pitong mga uhay ng butil na tumutubo. Sila ay payat at tinuyo ng init ng silangang hangin. ²⁴ Nilamon ng pitong payat na mga uhay ang pitong mabubuting mga uhay. Sinabi ko ang panaginip na ito sa mga salamangkero pero wala sa kanila ang makapagpaliwanag sa akin kung ano ang kahulugan nila." ²⁵ Pagkatapos sinabi ni Jose sa hari, "Ang parehong panaginip mo ay mayroong parehong kahulugan. Pinapakita sa iyo ng Diyos sa mga panaginip mo kung ano ang kaniyang gagawin. ²⁶ Ang pitong malulusog na mga baka ay kumakatawan sa pitong mga taon. Ang pitong mabubuting mga uhay ng butil ay kumakatawan sa pitong mga taon. Ang dalawang mga panaginip ay mayroong parehong kahulugan. ²⁷ Ang pitong payat na pangit na mga baka na umahon sa likod nila at ang pitong walang halagang mga uhay ng butil na tinuyo ng mainit na silangang hangin ay kumakatawan sa bawat pitong taon ng taggutom. ²⁸ Iyon ay mangyayari gaya ng sinabi ko sayo dahil pinakita sa iyo ng Diyos kung ano ang gagawin niya. ²⁹ Magkakaroon ng pitong taon na kung saan magkakaroon ng maraming pagkain sa buong lupain ng Ehipto, ³⁰ pero pagkatapos niyan ay magkakaroon ng pitong taon ng taggutom. Pagkatapos, makakalimutan ng mga tao ang lahat ng mga taon kung saan mayroong maraming pagkain dahil ang taggutom ay darating pagkatapos masira ang lalawigan. ³¹ Makakalimutan ng mga tao kung gaano karami ang pagkain noong nakaraan dahil ang taggutom ay labis na nakakakilabot. ³² Ang dahilan na binigyan ka ng Diyos ng dalawang panaginip ay dahil napagpasyahan niya na ito ay mangyayari at idudulot niya ito na mangyari sa lalong madaling panahon. ³³ Ngayon minumungkahi ko na kailangan mong pumili ng taong matalino at makakagawa ng magagandang desisyon. Minumungkahi ko na itakda mo siyang tiyakin ang kapakanan ng buong lalawigan. ³⁴ Kailangan mo ring magtakda ng mga tagapangasiwa sa buong lalawigan para maihanda nilang maipon ang ikalima sa lahat ng mga butil na naani sa panahon ng pitong taon na ang pagkain ay masagana. ³⁵ Kailangan nilang ipunin ang ganitong karaming butil sa panahon nang pitong mga taong paparating nang sa ganoon ay mayroong maraming pagkain. Kailangan mo silang pangasiwaan habang iniimbak nila ito sa mga lungsod at habang binabantayan nila ito. ³⁶ Kinakailangan na maitago ang mga butil na ito para ito ay makain sa panahon nang pitong taong magkakaroon ng taggutom dito sa Ehipto, at upang hindi mamatay mula sa gutom ang mga tao sa lalawigang ito." ³⁷ Inisip ng hari at kaniyang mga opisyal na ito ay magiging magandang plano. ³⁸ Kaya sinabi ng hari sa kanila, "Makakakita kaya tayo ng taong katulad ni Jose, isang tao na binigyan ng Diyos ng kaniyang espiritu?" ³⁹ Pagkatapos, sinabi ng hari kay Jose, "Dahil pinakita ng Diyos ang lahat ng ito sa iyo, mukhang wala na ni isa na kasing talino mo at makakapagpasya ng maayos tungkol sa mga bagay. ⁴⁰ Kaya ilalagay kita bilang tagapamahala sa lahat ng nasa aking palasyo. Dapat ang lahat ng mga tao dito sa Ehipto ay susunod sa kung anong iuutos mo. Tanging ako ay hari kaya ako ay mas may karapatan kaysa sa iyo." ⁴¹ Pagkatapos, sinabi ng hari kay Jose, "Nilalagay na kita ngayon sa pamamahala sa buong bansa ng Ehipto." ⁴² Kinuha ng hari sa kaniyang daliri ang singsing na may selyo niya at nilagay niya ito sa daliri ni Jose. Nilagyan niya siya ng mga balabal na gawa sa pinong lino at naglagay siya ng gintong kuwentas sa palibot ng kaniyang leeg. ⁴³ Pagkatapos naghanda siya para kay Jose na nagpapakita na siya ang pangalawang napakahalagang tao sa lalawigan. Nang nakasakay si Jose sa karo, sumigaw ang mga lalaki sa mga tao na nasa daan sa harapan niya, "Yumuko kayo!" Kaya nilagay ng hari si Jose na tagapamahala sa lahat ng nasa lalawigan. ⁴⁴ Sinabi ng hari kay Jose, "Ako ang hari, pero walang ni isa sa buong lupain ng Ehipto ang gagawa ng kahit na ano kung hindi mo papayagan sila na gawin iyon." ⁴⁵ Binigyan ng hari si Jose ng bagong pangalan, Zafenat-panea. Binigay niya rin sa kaniya si Asenat na maging asawa niyang babae. Siya ay ang anak na babae ni Potifera, na isang pari ng templo na nasa lungsod ng On. Sa ganitong paraan ay naging tanyag si Jose sa buong lupain ng Ehipto. ⁴⁶ Si Jose ay tatlumpung taong gulang nang siya ay nagsimulang magtrabaho para sa hari ng Ehipto. Upang gawin ang kaniyang trabaho, iniwan niya ang palasyo ng hari at naglakbay sa buong Ehipto. ⁴⁷ Sa panahon ng kasunod na pitong mga taon, nagbigay ang lupain ng masaganang pananim kaya mayroong maraming pagkain. ⁴⁸ Habang si Jose ang nangangasiwa sa kanila, inipon ng kaniyang mga katulong ang ikalima sa lahat ng mga butil na binigay ng mga taong iyon, at inimbak ito sa mga lungsod. Sa bawat lungsod, mayroon siyang katulong na nag-iimbak sa mga butil na tumutubo sa mga lupain na pumapalibot sa lungsod. ⁴⁹ Inuutusan sila ni Jose na mag-imbak ng napakalaking bilang ng butil. Kasing dami ito ng buhangin sa dalampasigan. Nagkaroon ng napakamaraming butil na tumigil na sila sa pagtala kung ilang butil na ang kanilang naimbak dahil hindi na nila masukat ang bilang ng mga butil. ⁵⁰ Bago nagsimula ang pitong taong taggutom, nanganak ang asawa ni Jose na si Asenat ng dalawang anak na lalaki. ⁵¹ Pinangalanan ni Jose ang una na Manases na tunog gaya ng salitang Hebreo na ang kahulugan ay "kalimutan," dahil sinabi niya, "Pinalimot sa akin ng Diyos ang lahat ng mga gulo at ang pamilya ng aking ama." ⁵² Pinangalanan niya ang pangalawang anak niya na lalaki na Efraim na ang ibig sabihin ay "magkaroon ng mga anak," dahil sinabi niyang, "Binigyan ako ng Diyos ng mga anak dito sa lupain kung saan ako nagdusa." ⁵³ Sa wakas natapos na ang pitong taon na sagana ang pagkain. ⁵⁴ Pagkatapos, ang pitong taon ng taggutom ay nagsimula gaya ng nahulaan ni Jose. Mayroon ring taggutom sa lahat ng mga kalapit na mga lupain pero kahit na ang mga pananim ay hindi tumubo, mayroong pagkain sa buong Ehipto dahil sa mga butil na naimbak nila sa mga lungsod. ⁵⁵ Nang makain na ang lahat ng kani-kanilang mga pagkain ng lahat ng mga tao sa Ehipto at nanatili paring gutom, nanghingi sila sa hari ng pagkain. Kaya sinabi ng hari sa mga tao ng Ehipto, "Pumunta kayo kay Jose at gawin ang kung anong sabihin niya na gawin ninyo." ⁵⁶ Nang lumala ang taggutom sa buong lalawigan, inutusan ni Jose ang kaniyang mga katulong na buksan ang mga kamalig. Pagkatapos, ipinagbili nila ang mga butil sa mga kamalig sa mga tao ng Ehipto dahil napakalubha ng taggutom sa buong Ehipto. ⁵⁷ Ang mga tao mula sa mga kalapit na mga lalawigan ay pumunta sa Ehipto upang bumili ng butil galing kay Jose dahil kahit saan ay napakatindi ng taggutom.