¹ Kalpasan iti sumagmamano a tiempo, kinuna ti Dios kenni Jacob, "Sumang-atka idiay siudad ti Betel ket agnaedka sadiay. Mangbangonka iti altar a pagdayawan kaniak, a Dios a nagparang kenka idi itartarayam ti inauna a kabsatmo a ni Esau." ² Kinuna ngarud ni Jacob kadagiti bumalayna ken kadagiti amin a daduma pay a kakaduana, “Ibellengyo dagiti didiosen nga innalayo manipud idiay Mesopotamia. Agdiguskayo ken agkaweskayo kadagiti nadalus a kawkawes. ³ Ket agsaganatayo ket sumang-attayo idiay Betel. Agpatakderak idiay iti altar a pagdayawan iti Dios. Isuna ti nangtulong kaniak iti tiempo a marigrigatan ken mabutbutengak unay, ken kankanayon nga adda isuna kaniak iti sadinnoman a napnapanak." ⁴ Intedda ngarud kenni Jacob dagiti amin a didiosen nga intugtugotda, ken amin nga ar-aritosda. Inkali ni Jacob dagitoy ti daga iti sirok ti dakkel a kayo a lugo nga adda iti asideg ti siudad ti Sikem. ⁵ Idi nakasaganadan a pumanaw sadiay, pinagbuteng ti Dios dagiti tattao nga agnanaed kadagiti siudad iti aglawlawda, iti pamilia ni Jacob, tapno saanda ida a kamaten. ⁶ Napan ni Jacob ken dagiti amin nga adda kenkuana idiay Luz, a maawagan itan iti Betel, iti daga ti Canaan. ⁷ Nangipatakder isuna sadiay iti altar. Pinanagananna ti lugar iti El Betel, a ti kayatna a sawen ket "Dios ti Betel," gapu ta idiay nga inparangarang ti Dios ti bagina kenni Jacob idi itartarayanna ti inauna a kabsatna a ni Esau. ⁸ Ita, baket unayen ni Debora a nangay-aywan iti asawa ni Isaac a ni Rebecca idi ubing pay laeng ni Rebecca. Natay isuna ket naitabon iti sirok ti kayo a lugo iti abagatan ti Betel. Isu a pinanagananda dayta a lugar ti "Allonbacuth", a ti kayatna a sawen ket "lugo a nagsangitan." ⁹ Idi nakasublin ni Jacob ken ti pamiliana manipud Padan-aram, kabayatan nga addada pay laeng idiay Betel, nagparang manen ti Dios kenni Jacob ket binendissionanna isuna. ¹⁰ Kinuna manen ti Dios kenkuana, "Ti naganmo ket saanton a Jacob. Agbalinto nga Israel." Naawagan ngarud ni Jacob iti "Israel." ¹¹ Ket Kinuna ti Dios kenkuana "Siak ti Dios a Manakabalin-amin. Aganakka iti adu. Dagiti kaputotam ket agbalinto nga adu a nasion ken dagiti dadduma a kaputotam ket agbalinto nga ar-ari. ¹² Ti daga nga inkarik ken Abraham ken ni Isaac ket itedko kenka. Itedkonto met daytoy kadagiti kaputotam." ¹³ Kalpasan a nakisarita ti Dios kenni Jacob sadiay, pinanawanna ni Jacob. ¹⁴ Nangikabil ni Jacob ti dakkel a bato iti lugar a nakisaritaan ti Dios kenkuana. Binuyatanna daytoy iti arak ken lana nga olibo tapno idatonna daytoy iti Dios. ¹⁵ Pinanaganan ni Jacob dayta a lugar iti Betel, a ti kayatna a sawen ket " balay ti Dios," gapu ta nakisarita ti Dios kenkuana sadiay. ¹⁶ Pimmanaw ni Jacob ken ti pamiliana idiay Betel ket nagpaabagatanda nga agturong idiay ili ti Efrata. Idi addada pay laeng iti saan unay nga adayo manipud Efrata, nangrugi a nagpasikal ni Raquel. ¹⁷ Idi nakaro unayen ti ut-otna, kinuna iti agpapaanak kenni Raquel "Saanka nga agbuteng, gapu ta nagpasngayka iti maysa pay nga anak a lalaki!" ¹⁸ Ngem matmatayen isuna, ket iti maudi nga angesna kinunana, "Panaganam isuna iti Benoni," a ti kayatna a sawen ket "anak iti ladingitko," ngem pinanaganan isuna ti amana iti Benjamin, a ti kayatna a sawen ket "anak ti makanawan nga imak." ¹⁹ Kalpasan iti ipapatay ni Raquel, naitabon isuna iti igid ti dalan nga agturong idiay Efrata, a maawagan ita iti Betlehem. ²⁰ Nangikabil ni Jacob iti dakkel a bato iti rabaw ti tanemna, ket adda pay laeng dayta sadiay, a mangipakpakita iti nakaitaneman ni Raquel. ²¹ Ni Jacob nga addaanen iti baro a nagan nga Israel ket intuloyna ti nagdaliasat a kaduana ti pamiliana, ket impatakderna dagiti toldnaa iti abagatan a paset ti pagwanawanan a tore idiay Eder. ²² Kabayatan nga agnanaedda iti dayta a disso, kinaidda ni Ruben nga anak ni Jacob ni Bilha a maysa kadagiti assawa ti amana. Adda ti nangipakaammo iti daytoy kenni Jacob ket kasta unay iti pungtotna. Ita, addaan ni Jacob iti sangapulo ket dua putot a lalaki. ²³ Dagiti annak a lalaki ni Lea ket ni Ruben, nga inauna a putot a lalaki ni Jacob, ni Simeon, ni Levi, ni Juda, ni Issacar ken ni Zabulon. ²⁴ Dagiti annak a lalaki ni Raquel ket ni Jose ken Benjamin. ²⁵ Dagiti annak a lalaki ti babai a tagabu ni Raquel a ni Bilha ket ni Dan ken ni Naftali. ²⁶ Dagiti annak a lallaki ni Zilpa, a tagabu ni Lea ket ni Gad ken ni Aser. Amin dagidiay a putot a lallaki ni Jacob malaksid kenni Benjamin, ket naipasngay idi agnanaed pay laeng isuna idiay Paddan-aram. ²⁷ Nagsubli ni Jacob iti balayda tapno kitaenna ti amana a ni Isaac idiay Mamre, a maawagan met laeng iti Kiriatharba ken maawagan itan iti Hebron. Nagnaed met laeng ti ama ni Isaac a ni Abraham sadiay. ²⁸ Nagbiag ni Isaac agingga idi 180 ti tawenna. ²⁹ Lakay unayen isuna idi natay ken naitipon kadagiti kapuonanna nga immun-unan a natay. Da Esau ken Jacob ti nangitabon kenkuana.