¹ Maysa nga aldaw, napan sinarungkaran ni Dina nga anak da Jacob ken Lea, dagiti dadduma a babbai iti dayta a daga. ² Idi nakita isuna ni Sikem a maysa kadagiti putot ni Hamor a nagtaud iti kaputotan dagiti Heveo, innalana ni Dina ket pinilitna a makikaidda kenkuana. ³ Nakayawan unay ni Sikem kenkuana ket naiyasideg unay ti riknana kenkuana. Ket kinasaritana daytoy nga iti namnamaenna ket ayaten met isuna ti balasang. ⁴ Isu a kinuna ni Sikem iti amana a ni Hamor, "Pangngaasim ta alaem daytoy a babai para kaniak. Kayatko isuna nga agbalin nga asawak!" ⁵ Idi naammoan ni Jacob a rinames ni Sikem ti putotna a babai a ni Dina, adda pay laeng iti tay-ak dagiti putotna a lallaki a mangay-aywan kadagiti tarakenna, isu nga awan ti imbagbagana a maipapan iti daytoy inggana a nakaawidda ⁶ Kabayatanna, napan ni Hamor nga ama ni Sikem a makisarita kenni Jacob. ⁷ Bayat ti panagsarsaritada, simmangpet dagiti putot a lallaki ni Jacob manipud iti taltalon, gapu ta naammoanda iti napasamak, nakigtotda ket kasta unay ti pungtotda. Kinunada, "Nangaramid ni Sikem iti banag a nangiyeg iti nakaro unay a pannakaibabain kenni Israel gapu iti panangipapilitna iti bagina iti kabsattayo a babai, maysa a banag a saanna a rumbeng nga inaramid!" ⁸ Ngem kinuna ni Hamor kadakuada, "Pudno a kayat unay ni Sikem nga putotko daytoy a babai nga putotmo ken kabsatyo. Pangngaasiyo ta palubusanyo koma nga asawaenna. ⁹ Mangaramidtayo iti katulagan: Ipalubosyo a makiasawa dagiti babbaro nga annakmi kadagiti babbalasang nga annakyo, ken kasta met nga ipalubosmi a makisawa dagiti babbaro nga annakyo kadagiti babbalasang nga annakmi. ¹⁰ Mabalinkayo a makipagnaed kadakami ken agnaedkayo iti sadinoman a kayatyo iti dagami. Mabalinkayo a gumatang ken aglako. No makasarakkayo iti daga a kayatyo, mabalinyo a gatangen daytoy." ¹¹ Ket kinuna ngarud ni Sikem iti ama ken kadagiti kakabsat a lallaki ni Dina, "No nasayaat ti mariknayo kaniak ken aramidenyo ti dawdawatek, itedkonto ti aniaman a dawatenyo. ¹² Ibagayo kaniak dagiti kayatyo a sagut ken no ania ti kayatyo a gatad ti nobya, ket itedko ti aniaman a dawatenyo. Kayatko laeng nga itedyo kaniak ti babai tapno agbalin nga asawak." ¹³ Ngem gapu ta nangaramid ni Sikem iti nakababain unay a banag iti kabsatda a babai a ni Dina, inallilaw dagiti putot a lallaki ni Jacob ni Sikem ken ti amana a ni Hamor. ¹⁴ Kinunada kadakuada, "Saan, saanmi a maaramid dayta. Saanmi a mabalin nga ited ti kabsatmi a babai nga asawaen ti maysa a lalaki a saan a nakugit, gapu ta nakababain dayta a banag nga aramidenmi. ¹⁵ Aramidenmi laeng dayta no aramidenyo ti maysa a banag: masapul nga agbalinkayo a kas kadakami babaen iti panangkugityo kadagiti amin a lallaki nga adda kadakayo. ¹⁶ Ket ipalubosminto a makiasawa dagiti babbaro nga annakyo kadagiti babbalasang nga annakmi, ket kasta met a makiasawa kadagiti annakyo a babbai dagiti babbaro kadakami. Makipagnaedkaminto kadakayo ket agbalintayonto a maymaysa a bunggoy iti tattao. ¹⁷ Ngem no saankayo nga umanamong nga agpakugit, alaenmi ti kabsatmi a babai ket pumanawkami." ¹⁸ Naay-ayo ni Sikem ken ti amana a ni Hamor iti imbagada. ¹⁹ Kayat unay ni Sikem nga agbalin nga asawana ti putot a babai ni Jacob: kasta met nga agsipud ta isuna ti kangrunaan a mararaem a tao iti pamilia ti amana, dagus nga immanamong isuna a mangaramid iti insingasingda. ²⁰ Kimmuyog ni Sikem kenni Hamor nga amana iti paguummongan iti ruangan ti siudad, ket kinasaritada dagiti panguloen ti siudad. Kinunada, ²¹ "Mannakigayyem dagitoy a tattao kadatayo. Palubosantayo koma ida nga agnaed ken agpasyar ditoy. Kinapudnona, nalawa ti daga ken umdas daytoy kadakuada ken kadatayo. Mabalin a makiasawa dagiti annaktayo a babbaro kadagiti annakda a babbai, ken kasta met a mabalin a makiasawa dagiti annakda a babbaro kadagiti annaktayo a babbai. ²² Ngem umanamongto laeng dagitoy a tattao a makipagnaed kadatayo ken agbalin a kameng ti bunggoytayo no amin dagiti lallaki kadatayo ket nakugit, a kas kadakuada. ²³ Ngem no aramidentayo dayta, panunotenyo laengen daytoy! Kukuatayonto amin dagiti bakada, dagiti sanikuada, ken dagiti amin nga ayupda! Isu a masapul nga umanamongtayo a mangaramid ti isingsingasingda, ket makipagnaeddanto kadatayo!" ²⁴ Immanamong amin dagiti lallaki nga adda iti ruangan ti siudad iti insingasing da Hamor ken Sikem. Napakugit ti tunggal lalaki iti siudad. ²⁵ Iti maikatllo nga aldaw kalpasan dayta, idi agpapaut-ot pay laeng dagiti lallaki ti siudad gapu iti pannakakugitda, innala da Simeon ken Levi, a putot a lallaki ni Jacob ken kakabsat ni Dina, dagiti kampilanda ket simrekda iti siudad nga awan ti siasinoman a nanglapped kadakuada, ket pinatayda amin a lallaki. ²⁶ Pinatayda uray pay ni Hamor ken ti putotna a ni Sikem. Ket innalada ni Dina manipud iti balay ni Sikem ket pimmanawda iti siudad. ²⁷ Kalpasanna napan idiay ayan dagiti bangkay dagiti dadduma a putot a lallaki ni Jacob. Tinakawanda ti siudad tapno ibalesda ti nakababain a napasamak iti kabsatda a babai. ²⁸ Innalada dagiti amin a karnero ken kalding dagiti tattao, dagiti bakada, dagiti asnoda, ken amin a napateg a banbanag a kinayatda manipud iti siudad ket inruarda iti siudad. ²⁹ Innalada amin a banag a napateg, uray dagiti ubbing ken dagiti babbai. Innalada amin nga adda kadagiti babbalay. ³⁰ Kinuna ngarud ni Jacob kada Simeon ken Levi, "Inyegyo kaniak ti dakkel a pakaisagmakan! Ita, dagiti bunggoy dagiti tattao ti Canaan, dagiti bunggoy dagiti tattao iti Perez, ken tunggal maysa nga agnanaed iti daytoy a daga ket kaguradakton! Awan ti adu a tattaok a makiranget para kadatayo, isu a no agkakaduada amin nga umay a mangdarup kadatayo, dadaelendatayo ken ti amin a sangkabalayantayo." ³¹ Ngem simmungbatda, "Rumbeng kadi a binaybay-antayo lattan a pinagbalinda a kasla balangkantis ti kabsatmi a babai?"