¹ Nagtuloy ni Jacob iti panagdaliasatna, ket nadanunna ti daga nga adda iti daya ti Canaan. ² Sadiay, nakakita ni Jacob iti bubon iti tay-ak ket tallo nga arban dagiti karnero ti agin-inana iti asideg ti bubon. Isu ti bubon a kadawyan a pagal-alaan dagiti agpaspastor iti danum para kadagiti karneroda. Adda dakkel a bato a nakakalub iti rabaw ti bubon. ³ Inton maurnong amin dagiti arban idiay, agtitinnulong dagiti agpaspastor a mangitulid iti bato manipud iti rabaw ti bubon sadanto mangala iti danum nga ipainumda kadagiti karnero. Inton malpasda nga aramiden dayta, isublida manen ti bato iti rabaw ti bubon a sigud nga ayanna. ⁴ Iti dayta nga aldaw, sinaludsod ni Jacob dagiti agpaspastor nga agtugtugaw idiay, "Taga-anokayo?" Insungbatda, "Taga-siudad ti Haran kami." ⁵ Sinaludsodna kadakuada, "Am-ammoyo kadi ni Laban, nga apoko ni Nahor?" Insungbatda, "Wen, am-ammomi isuna." ⁶ Sinaludsod ni Jacob kadakuada, "Nasayaat kadi ti kasasaad ni Laban?" Insungbatda, "Wen, nasayaat ti kasasaadna. Kitaem! Adtoy ni Raquel a putotna agraman dagiti karnero!" ⁷ Kinuna ni Jacob, "Ngem nangato pay laeng ti init iti tangatang. Saan pay nga oras tapno maurnong dagiti arban para iti rabii. Apay a saanyo nga ikkan dagiti karnero iti danum kalpasanna ket isubliyo ida a mapan ipaarab kadagiti pagpasturan?" ⁸ Insungbatda, "Saan, saanmi a mabalin nga aramiden dayta inggana a maurnong amin dagiti arban ditoy ken maikkat ti bato manipud iti rabaw ti bubon. Kalpasan dayta, painumenminton dagiti karnero." ⁹ Kabayatan a makisarsarita pay laeng isuna kadakuada, dimteng ni Raquel agraman dagiti karnero ni tatangna. Isuna ti mangay-aywan kadagiti karnero ni tatangna. ¹⁰ Idi nakita ni Jacob ni Raquel, a putot ni Laban, a kabsat ti inana, ken dagiti karnero ni Laban, napanna intulid ti bato a naikalub iti rabaw ti bubon, ket nangala iti danum para kadagiti karnero ni ulitegna. ¹¹ Kalpasanna, inagkan ni Jacob ti pingping ni Raquel, ken nagsangit iti napigsa gapu iti napalalo a ragsakna. ¹² Imbaga ni Jacob kenni Raquel a maysa isuna kadagiti kabagian ti amana, ken anak isuna ni Rebecca nga ikit ni Rebecca. Isu a nagtaray ni Raquel ket napanna imbaga daytoy kenni tatangna. ¹³ Apaman a nangngeg ni Laban nga adda idiay ni Jacob, nga anak ti kabsatna, nagtaray isuna a napan nangsabat kenkuana. Inarakupna, ken inagkanna ti pingpingna. Ket inkuyogna iti pagtaenganna, ket imbaga ni Jacob kenkuana dagiti amin a napasamak kenkuana. ¹⁴ Ket kinuna ni Laban kenkuana, "Pudno a pasetka ti pamiliak!" Kalpasanna ket nagnaed ni Jacob idiay ken nagtrabaho para kenni Laban iti maysa a bulan, ¹⁵ Kinuna ni Laban kenkuana, "Saan a rumbeng nga agtrabahoka kaniak nga awan ti maganabmo gapu laeng ta kabagianka! Ibagam kaniak no mano ti kayatmo nga itangdanko kenka." ¹⁶ Itatta, addaan ni Laban iti dua nga annak a babbai. Ti inauna ket agnagan iti Lea, ken ti inaudi ket agnagan iti Raquel. ¹⁷ Napintas dagiti mata ni Lea, ngem makaay-ayo unay ti pammagi ni Raquel ken napintas. ¹⁸ Ay-ayaten ni Jacob ni Raquel, ket kinunana, "Agtrabahoak kenka iti pito a tawen. Daytanto ti bayadko para iti panangipalubosmo nga asawaek ti inaudi nga anakmo, a ni Raquel." ¹⁹ Insungbat ni Laban, "Nasaysayaat para kaniak a palubosanka a mangasawa kenkuana ngem ti mangasawa isuna iti sabali a lalaki! Rumbeng a makipagnaedka kadakami ditoy." ²⁰ Isu a nagtrabaho ni Jacob para kenni Laban iti pito a tawen tapno maasawana ni Raquel, ngem kasla bassit laeng nga aldaw dagitoy para kenni Jacob, gapu ta ay-ayatenna la unay ti balasang. ²¹ Idi nalpasen ti pito a tawen, kinuna ni Jacob kenni Laban, "Ipalubosmo koma nga asawaek ni Raquel ita, gapu ta nagpatinggan ti tiempo a nagnummoanta a panagtrabahok para kenka, ket kayatko nga asawaen isuna." ²² Inummong ngarud ni Laban dagiti amin a tattao nga agnanaed iti dayta a disso ket nagpaboda. ²³ Ngem iti dayta a rabii, imbes a ni Raquel ti maipan kenni Jacob, innala ni Laban ti inauna nga anakna a ni Lea, ket impanna kenkuana. Ngem gapu ta nasipngeten, saanna a makita a ni Lea daydiay a saan ket a ni Raquel, ket kinaiddana daytoy. ²⁴ (Inteden ni Laban ni Zilpa a tagabuna a babai kenni Lea a putotna tapno agbalin a tagabuna.) ²⁵ Iti kabigatanna, nakigtot ni Jacob idi makitana a ni Lea ti kaduana! Napan ngarud isuna kenni Laban ket sipupungtot la unay a nangibaga kenkuana, "Makaparurod daytoy nga inaramidmo kaniak! Nagtrabahoak para kenka tapno maasawak ni Raquel, saan kadi? Apay ngarud nga inallilawnak?" ²⁶ Insungbat ni Laban, "Iti daytoy a daga, saanmi a kaugalian nga ipaasawa nga umuna ti inaudi nga anak a babai sakbay nga ipaasawami ti inauna nga anakmi a babai. ²⁷ Kalpasan daytoy makalawas a panagrambaktayo, iplaubosmi nga asawaem met ti inaudi. Ngem kas kasukat, masapul nga agbayadka para kenni Raquel babaen iti panagtrabahom para kaniak iti pito manen a tawen." ²⁸ Ket kasta ngarud ti inaramid ni Jacob. Kalpasan ti makalawas a panagrambak, inted ni Laban kenkuana ni Raquel a putotna, tapno agbalin nga asawana. ²⁹ Inted ni Laban ti babai a tagabuna, a ni Bilha, kenni Raquel tapno agbalin a tagabuna. ³⁰ Nakikaidda met ni Jacob kenni Raquel, ket nalablabes ti panagayatna kenni Raquel ngem iti panagayatna kenni Lea. Nagtrabaho isuna kenni Laban iti pito manen a tawen. ³¹ Idi nakita ni Yahweh a saan unay nga ay-ayaten ni Jacob ni Lea, pinagsikogna isuna. Ngem saan a nagsikog ni Raquel. ³² Naganak ni Lea iti lalaki, a pinanagananna iti Ruben, a kas kadagiti sao a Hebreo a ti kayatna a sawen ket "kitaem, maysa nga anak a lalaki!" Kinuna ni Lea, "Nakita ti Dios nga agladladingitak, ket gapu iti dayta, inikkannak iti anak a lalaki. Ita, awan duadua nga ayatennakon ti asawak gapu ta naganakak iti maysa a lalaki para kenkuana." ³³ Saan a nagbayag ket nagsikog manen isuna ken naganak iti maysa pay a lalaki. Kinunana, "Gapu ta nangngeg ni Yahweh a saannak nga ay-ayaten ti asawak, intedna met kaniak daytoy nga anak a lalaki." Isu a pinanagananna iti Simeon, a ti kayatna a sawen ket "maysa nga agdengdengngeg." ³⁴ Saan a nagbayag ket nagsikog manen isuna, ken naganak iti maysa pay a lalaki. Kinunana, "Ita, kamaudiananna, ad-adda pay a maisinggalut kaniak ti asawak." Isu a pinanagananna iti Levi, a ti kayatna a sawen ket "maisinggalut." ³⁵ Saan a nagbayag ket nagsikog manen isuna ken naganak iti maysa pay a lalaki. Kinunana, "Idaydayawko ita ni Yahweh." Isu a pinanagananna iti Juda, a kas iti sao a Hebreo a ti kayatna a sawen ket idaydayaw." Kalpasan dayta, saanen isuna a naganak pay.