¹ Kalpasanna, pinaayaban ni Isaac ni Jacob ket binendisionanna. Kastoy ti kinunana kenni Jacob: "Saanka a mangasawa iti babai manipud kadagiti babbai a taga-Canaan. ² Ngem ketdi, mapanka a sigud idiay Padan-aram, iti balay ti ama ti inam a ni Betuel. Kiddawem iti maysa kadagiti babbalasang ti kabsat ti inam a ni Laban a makiasawa kenka. ³ Ikararagko a bendisionannaka ti Dios a Mannakabalin-amin, ken paaduenna koma dagiti kaputotam, tapno agbalinda nga adu a nadumaduma a bunggoy dagiti tattao. ⁴ Ikararagko met a bendisionannaka ken dagiti kaputotamto babaen iti panangtedna kadakayo iti kabaelan a mangtagikua iti daga a pagnanaedam ita a kas gangannaet, ti daga nga ingkari ti Dios nga itedna kenni Abraham ken kadagiti kaputotanna." ⁵ Imbaon ngarud ni Isaac ni Jacob idiay Padan-aram tapno makipagian iti kabsat a lalaki ni Rebecca a ni Laban a putot ni Betuel, a maibilang iti bunggoy dagiti tattao nga Arameo. (Daytoy a Rebecca ti nangiyanak kada Jacob ken Esau.) ⁶ Naduktalan ni Esau a binendisionan ni Isaac nga amana ni Jacob ket kalpasanna imbaonna isuna sadiay Padan-aram. Naduktalanna met nga idi binendisionan ti amana ni Jacob, kinunana kenkuana, "Saanka a mangasawa iti babai manipud kadagiti tattao a taga-Canaan," ⁷ ket tinungpal ni Jacob ti amana ken inana, ket pimmanaw a nagturong idiay Padan-aram. ⁸ Naamiris met ni Esau a saan a kayat ni Isaac nga amana dagiti babbai manipud kadagiti tattao a taga- Canaan. ⁹ Gapu iti dayta, napan kinita ni Esau ti kabagianna a ni Isamael ket inasawana ni Mahalat, a putot a babai ni Ismael. Ni Mahalat ket kabsat a babai ni Nabayot ken apoko ni Abraham. ¹⁰ Kabayatanna, pimmanaw ni Jacob idiay Beerseba ket napan idiay Haran. ¹¹ Idi nakadanun iti mays a lugar, nagsardeng isuna sadiay gapu ta limneken ti init. Nangala isuna iti maysa kadagiti bato sadiay, ket pinagpunganna daytoy. Kalpasanna, nagidda ket naturog sadiay. ¹² Kabayatan iti pannaturogna, nagtagtagainep ket nakitana ti maysa nga agdan. Ti puon ti agdan ket nakadisso iti rabaw ti daga ken ti tuktokna ket adda iti tangatang. Nakita met ni Jacob dagiti anghel ti Dios nga agpangato ken agpababa iti agdan. ¹³ Kalpasanna, nakitana ni Yahweh a nakatakder iti tuktok ti agdan, kunana, "Siak ni Yahweh a Dios, a nagrukbaban daydi apongmo a ni Abraham ken pagrukrukbaban ni Isaac. Itedkonto kenka ken kadagiti kaputotam ti daga a pagid-iddaam. ¹⁴ Nakaad-adunto dagiti kaputotam, kas kaadu dagiti tapuk nga adda iti rabaw ti daga, ken ti masakupanda ket nalawanto unay. Lumawanto iti amin a banda, agpadaya ken agpalaud, agpaammianan ken agpaabagatan. Bendisionakto amin a puli ken bunggoy ti tattao iti rabaw ti daga babaen kenka ken dagiti kaputotam. ¹⁵ Tulongankayto ken salaknibankayto iti sadinnoman a papananyo, ket isublikayto iti daytoy a daga. Saankayto a panawan; aramidekto amin kadakayo ti ingkarik nga aramidek." ¹⁶ Iti rabii, idi nakariing ni Jacob manipud iti pannaturogna, napanunotna, "Awan duadua nga adda iti daytoy a lugar ni Yahweh, ket itak laeng a naamiris daytoy!" ¹⁷ Nagbuteng isuna, ket kinunana, "Nakabutbuteng daytoy a lugar! Awan duadua nga daytoy ti lugar a pagigianan ti Dios, ken daytoy ti pagserkan nga agturong idiay langit. ¹⁸ Iti kabigatanna, nagriing ni Jacob, innalana ti bato a nagpungananna ket impasdekna ti pungto daytoy tapno agserbi a marka ti lugar a nagparangan ti Dios kenkuana. Nangibukbok iti lana ti olibo iti rabaw ti bato kas panangidatonna iti daydiay a disso iti Dios. ¹⁹ Pinanagananna dayta a lugar iti Betel, a ti kayatna a sawen ket "balay ti Dios." Ti immuna a naganna ket Luz. ²⁰ Sipapasnek a nagsapata ni Jacob iti Dios, kunana, "No tulungannak ken aywanannak kabayatan iti panagdaliasatko, ken no ikkannak iti umdas a taraonko ken pagan-anayko, ²¹ tapno makasubliak a sitatalged iti balay ti amak, ket sika, Yahweh, ti Dios a pagrukbabak. ²² Daytoy a bato nga ipasdekko ket markaanna ti lugar a nagparangam kaniak. Ket isublikto kenka ti apagkapullo ti amin nga itedmo kaniak."