¹ Pha-Li-si munh numđ lănv coong Zâu Yê-su tuz stâyb-sây năngx đungx têx, Yâuc ayx quaix womz nyăngz gâyf năngx đungx têx Giăng. ayx quaix womz nyăngz Gâyf. ² Seenz dlayc six max zâyf Zâu Yê-su ayx, Six cungb nănh nyăngz stâyb-sây buz stăngc ayx quaix womz nyăngz gâyf cungv. ³ Nănh pâyz songđ lênh dlih gâyh Yu-đê stengv phunb đangz lauf Ga-li-lê Stengv. ⁴ Nănh phunb đangz clangv quaix Sa-ma-li Stâyz-lhangz lauf.” ⁵ Jămc Sa-ma-li stengv ninyh tauv ah nomz muôngc bux hipđ ayx Si-ca. gâyh Ya-côpv Phunz nănh nyăngz toonz Yô-sepv woax cuyb nib tâyc max côz. ⁶ Ya-côpv nyăngz womz cangz yâuc yămz woa, Zâu Yê-su yăngh jau conv songđ sec woa womz cangz sah synh. Woax zanyf songđ đămx noib. ⁷ Naih ah tauh Sa-ma-li munh nzic ninyh woa womz cangz quab womz. Zâu Yê-su coong, “ô-lex, jođ mâyh phunz ah tix womz yaz hopb jađ.” ⁸ Toix woax zanyf stâyb-sây buz nzac caiz ninyh maif tax’ hungđ nhlync.” ⁹ woax tauh Sa-ma-li munh tauz coong, “Mâyh six Yiu-tai Munh, Săngh laix bix taih jođ Sa-ma-li đâuf womz hopb? Sa-ma-li đâuf cloon Yiu-tai six max tih zuc nef.” ¹⁰ Zâu Yê-su tauz, “Six coong mâyh năngđ pâyz tuz Tênb-Hungh nyăngz sâuđ nyâyc gongx, Yâuc pâyz tuz jođ mâyh phunz womz hopb woax tauh six toix laiv tauh têx, naih dlih mâyh six jođ nănh phunz yungf mengc nyăngz womz mâyh hopb. ¹¹ Woax tauh munh nzif coong, Mâyh lenf lôx max naih zuib quab womz. womz cangz yâuc đôz. mâyh lov laiv tix yungf mengc nyăngz womz nzâyz taih?” ¹² Buz nyăngz claof jex Ya-côpv. Zoz nâyx nomz womz cangz. njâuh phunz buz nongc, Cloon sây-stunz, cloon stanyb hauc hopb nâyx nomz womz cangz, mâyh zâyf ayx năngx lub têx Ya-côpv maz?” ¹³ Zâu Yê-su tauz, Toix laiv tauh hopb nâyx nomz womz cotb nyăngz womz, blătc nây quaix đangz lauf năngx hayh nyâuđ gatb. ¹⁴ Six toix laiv lanh hopb yaz phunz nyăngz womz, Săngh stâyv max hayh nyâuđ gatb, Yaz phunz nyăngz womz six năngđ wăngx sting nâyx yămz nănh nyăngz nyâuđ njaf đunh seetb taih, Phunz nănh tuz stâyv quâyx nyăngz mengc.” ¹⁵ Woax tauh munh nzif coong, “Tah lex! Jođ mâyh phunz woax hungđ ya womz yaz hopb gôh, Phunz yaz blătc nây max zuc nyâuđ gatb, Stâyv quâyx max zuc taih nây womz cangz.” ¹⁶ Zâu Yê-su bux nănh, “ô mâyh phanv muf êu cloon mâyh nyăngz langh taih nây. ¹⁷ Woax tauh munh nzif tauz, “Yaz max naih langh đêh, Zâu Yê-su coong, “Mâyh coong mâyh max naih langh seenz toix gôh.” ¹⁸ Mâyh nongc pyaz stâyv langh nzof gôh, six nâyx zanyf mâyh nongc lâyc tauh tauf ya lauf max zâyf mâyh nyăngz langh đêh.” ô lex mâyh coong seenz toix gôh.” ¹⁹ Woax tauh munh nzif tauz, “Yaz phătc mâyh six săngh ah tauh Stênz-stengb munh.” ²⁰ Buz nyăngz claof jex six yămz nâyx nomz zoongz zâyc canyx bongc Tênb-Hungh. six nyâuh đomc Yiu-tai Munh six yămz Yê-lu-sa-lem stengv canyx bongc Tênb-Hungh lec.” ²¹ Zâu Yê-su bux nănh coong, “ô lex! Phanv zeen yaz geh! Tauv săngx huđ, munh max zuc yămz zoongz zâyc congx Pha, mah six zuc yămz Yê-lu-sa-lem Stengv congx nzof gôh.” ²² Nyâuh Sa-ma-li Munh max pâyz tuz nyâuh congx toix tauh, Six buz Yiu-tai munh pâyz tuz buz congx toix laiv tauh. wâyc zuc njâuv pôz six tăng Yiu-tai Munh seetb taih.” ²³ Seenz tauv săngx huđ muif tauh munh canyx boongc seenz nyăngz nzangc Pha woax đomc, oix zuc nongc Singx-lingh yâuc nongc seenz gâyf congx nzangc Pha. Wâyc zuc nzangc Pha lov nâyx hungđ munh canyx-boongc nănh.” ²⁴ Tênb-Hungh six Singx-lingh, Toix laiv tauh congx nănh six zuc nongc Singx-lingh cloon seenz gâyf congx.” ²⁵ Woax tauh munh nzif coong bux nănh, “Yaz pâyz tuz Mê-si-ya oix taih, Mê-si-ya âyz gâyf six Njâuv Zâu, Tauv nănh taih lănv nzuf muif hungđ bux pănh.” ²⁶ Zâu Yê-su bux nănh, “Woax tauh six yaz gôh, Nâyx zanyf cloon ô coong woac nâyx tauh ya gôh. ²⁷ Woax zanyf, Stâyb-sây buz ninyh caiz lauf tauv phătc woax tauh munh nzif cloon nănh lănv woac. Nănh stiz nyâyh ganc lanh coong woac sapb ănz lanh, six nănh stiz max naih mănv nzađ naic nănh coong, 'stâyb Pha sămv lungđ? mah six naic mâyh cloon lâyc tauh munh nzif coong lungđ? ²⁸ Woax tauh munh nzif songđ quengx nănh nyăngz toongc ănz woa, Phunz đangz nzac stengv muf lănv bux munh coong.” ²⁹ Nyâuh ninyh mangc geh! Naih ah tauh munh nănh lănv tuz toix nzuf yaz ayx nyăngz muif hungđ dlayc. Lâyc tauh max pâyz six zâyf Njâuv Zâu mah six max zâyf gôh?” ³⁰ Wâyc nâyx songx munh songđ tinyh ênz seetb ninyh mangc Zâu Yê-su.” ³¹ Stâyb-sây buz bux Zâu Yê-su coong, “Stâyb-pha lex! Nhlync năngv gôh. ³² Zâu Yê-su tauz, Yaz naih ah hungđ nhlync hopb nyâuh max pâyz.” ³³ Stâyb-sây buz lanh naic lanh, Naih munh nzâyz năngv taih phunz nănh mah six loz? ³⁴ Zâu Yê-su tauz, Yaz nyăngz nhlync hopb, Six yaz ayx săngh paiđ yaz taih woax tauh nyăngz congz.” ³⁵ Nyâuh naih ah zâux woac coong, “Năngx naih pyâyz lav timb, Songđ tauv Săngx huđ sâub jengz zunb, Six yaz bux nyâuh, nyâuh mangc woa njăngx njaf geh! Zunb jengz suc săngh seetc nzof gôh.” ³⁶ Nâyx zanyf sâub jengz zongz nyăngz munh, Tuz nănh stiz nyăngz congz stynh, wâyc sâub jengz zunb nzac tuz stâyv quâyx nyăngz Mengc. Songx nyăngz munh cloon sâub nyăngz munh tinyh đoih songđ numđ nyađ. ³⁷ Wâyc zuc naih munh lănv câu coong, “Nâyx lanh songx, woax lanh sâub.” ³⁸ Yaz paiđ nyâuh ninyh sâub nyâuh max zuc seetb jab songx nyăngz zunb, pitc tauh songx, Six nyâuh cungb tuz nongc nănh nyăngz phănc.” ³⁹ Woax nomz Sa-ma-li stengv nyăngz munh zeen Zâu Yê-su đungx. Six wâyc woa tauh Sa-ma-li Munh nzif ayx zanyx manyf lănv coong, Zâu lănv seetb taih nyăngz toix nzuf yaz ayx nyăngz muif-hungđ dlayc, “ ⁴⁰ Sa-ma-li-Munh taih lov pongh Zâu Yê-su woax zanyf, Nănh stiz jođ nănh cloon nănh stiz yămz woa, Zâu Yê-su songđ nhlimc nzeetx cloon nănh stiz yămz woa tuz iz noib.” ⁴¹ Wâyc Yê-su coong nyăngz woac năngx naih munh đungx zeen nănh.” ⁴² Woax đomc munh coong ănz woax tauh munh nzif, Coonz taih buz zeen mâyh ayx zanyx manyf nyăngz woac, Six nâyx zanyf buz cănh tuz bah noomh numđ nănh coong nyăngz woac. Nâyx tauh ya munh seenz zâyf bamh munh nyăngz Njâuv Zâu gôh.” ⁴³ Blătc woa iz noib cah đangz, Zâu Yê-su gâyh woax nomz tync, Ninyh tauv Ga-li-lê stâyz-phangz. ⁴⁴ Zâu Yê-su coong, “Tâuc woac munh six max naih laiv tauh tuz cănh nănh nyăngz stâyz-phangz munh pâuh Nănh.” ⁴⁵ Nănh ninyh tauv Ga-li-lê stengv, Ga-li-lê Munh yâuc stipx Nănh, wâyc zuc Nănh stiz ninyh Yê-lu-sa-lem stengv quaix pyeenv mengc stêtz, Yâuc tuz phătc nănh ayx nyăngz muif hungđ dlayc. ⁴⁶ Zâu Yê-su phunb đangz lauf Ga-li-lê stengv, Ca-na njăngv, six lôx noib nănh pyênv womz pênx tyu woax tyuh njăngv, Naih ah tauh Hungh ayx quanz cun Ca-bê-na-um Muôngc, Nănh nyăngz toonz săngh gumc.” ⁴⁷ Nâyx tauh quanz numđ munh lănv coong, “Zâu Yê-su tăng Yu-đê stengv lauf tauv Ga-li-lê stengv, Nănh songđ ninyh lov Zâu Yê-su, Jođ nănh ninyh Ca-bê-na-um Muôngc zany gumc phunz Nănh nyăngz toonz. Nănh nyăngz toonz săngh gumc cayx tayc gôh.” ⁴⁸ Zâu Yê-su bux Nănh, “Săngh laix nyâuh cungb oix Phătc Jix-houc, cloon Jix-caox njingc nyăngz dlayc nzof nyâuh nzăngc zeen yaz?” ⁴⁹ Quanz coong, “Tah lex, Jođ mâyh lêpc yaz ninyh gôh! Sangx max đanyf woangb yaz nyăngz toonz hayh tayc.” ⁵⁰ Zâu Yê-su coong bux nănh, Mâyh phanv muf pyau gôh, Mâyh nyăngz sây gongx nzof gôh. Woax Tauh quanz zeen Zâu Yê-su nyăngz woac songđ phunb đangz muf.” ⁵¹ Muf tauv bah đămx jau phătc nănh nyăngz pâuz taih bux nănh coong, “Nâyx zanyf mâyh nyăngz sây gumc gongx nzof gôh.” ⁵² Tah claof naic nănh nyăngz pâuz, “Yaz nyăngz sây gumc gongx toix laiv săngx huđ?” Nănh Stiz tauz, “Cumh noib cox ah săngx huđ, bix gumc toiv.” ⁵³ Woax tauh toonz nyăngz Pha songđ săngx tauv Zâu Yê-su bux nănh coong mâyh nyăngz toonz tuz gumc gongx nzof gôh naz woax zanyf, Tah claof cloon nănh nyăngz pyau munh zeen Zâu Yê-su nzuf.” ⁵⁴ Nây six Zâu Yê-su tăng Yu-đê stengv lauf Ga-li-lê stengv ayx tah nyâyc hâyc Jix-caox njingc nyăngz dlayc.”