¹ Phi-latv songđ seetb lanyf phunz pengz nzâyz Zâu Yê-su ninyh bopc.” ² Pengz zoz Nzim saz ah nomh mouc đongx ănz nănh nyăngz pyây, Năngx zoz Gwuyz đao stib pâyb ănz Nănh. ³ Năngx êu woax đomc pengz quaix ninyh stătx nănh, Songđ coong, “Yiu-tai-Munh nyăngz Hungh lex! Săngh tuz banc stôix gôh! Yâuc beb Nănh nyăngz mynb.” ⁴ Phi-latv năngx seetb ninyh bux ayx lub nyăngz Yiu-tai Munh coong, “Mangc geh yaz nzâyz nănh seetb taih tauv nây phunz nyâuh, Yaz zah max seetb nănh naih toix laiv hungđ Stoif nef.” ⁵ Zâu Yê-su songđ seetb taih yâuc đongx nzim mouc, Zuz Gwuyz đao stib jaz, Phi-latv coong nhlex, Six nâyx tauh ya Munh gôh.” ⁶ Stayb-Munh pyây cloon jămđ layf paix pyau woax đomc pengz tinyh đoih hamv coong, “Nzâyz nănh tingz ănz săpc đăngc-zax zef! Nzâyz nănh ninyh tingz ănz săpc đăngc zax zef gôh!” Phi-latv bux nănh stiz coong, “ha nyâuh bix cănh nzâyz nănh ninyh tingz ănz săpc đăngc-zax geh! Yaz zah max phătc nănh naih toix laiv hungđ Stoif nef!” ⁷ Yiu-tai Munh tauz coong, “Buz naih ah tyuh lanyf, âyz Nâyx tyuh lanyf Nănh six zuc tayc, wâyc zuc nănh cănh zanyb nănh ayx Tênb-Hungh nyăngz toonz đev.” ⁸ Phi-latv Numđ zuc nâyx zâux woac, Nănh cangc cumh nzav năngx nzongf têx timb!” ⁹ Songđ năngx nzac Stămđ Stoif tync ninyh naic Zâu Yê-su coong, “Mâyh tăng laiv tix taih yeh? Six Zâu Yê-su Stingb njâuh max tauz laiv Zâu tiny stăngv.” ¹⁰ Phi-latv songđ coong, “Mâyh max cloon yaz Coong woac mah? Mâyh max pâyz tuz yaz naih lanyf pungx Mâyh, Yâuc naih lanyf tingz mâyh ănz săpc đăngc zax mah?” ¹¹ Zâu Yê-su tauz, “Six coong Tênb-Hungh năngđ max Phunz mâyh naih lanyf, Mâyh max hayh pob tuz yaz nyăngz dlayc đêh, Six woax tauh zoz yaz jaoz phunz mâyh, woax tauh nănh nyăngz Stoif năngx lub têx mâyh nyăngz Stoif gôh.” ¹² Tăng woa Phi-latv songđ nhlênh Jêux lov congv pungx Yê-su, Six Yiu-tai Munh hamv coong, “Six coong mâyh năngđ pungx nâyx tauh munh têx, Mâyh six max zâyf Lô-ma Nzêuh Hungh, Sê-sa nyăngz Yâuf, Toix laiv tauh cănh tanv nănh ayx Hungh, woax tauh six cloon Lô-ma Hungh săngh Yônz zaz.” ¹³ Phi-latv numđ nzuf nâyx đomc woac, Nănh songđ nzâyz Zâu Yê-su seetb ninyh, Songđ muf Stâyv nănh woa stămđ Stoif tync, woax nomz tync bux hipđ ayx njauz pyây tymc, Yiu-tai Munh hipđ ayx Ga-ba-tha.” ¹⁴ Woax noib six toix bênc quaix pyenv mengc stêtz nyăngz noib, anx têx woax zanyf, Phi-latv coong bux Yiu-Ttai Munh, Mangc geh! nyâuh nyăngz Hungh nhlef!” ¹⁵ Woax đomc Munh hamv coong, “Tayx nănh zef gôh! Mêtc nănh zef gôh! nzâyz nănh ninyh tingz ănz săpc đăngc zax zef lêđ.” Phi-latv naic coong, “ha nyâuh oix nongc yaz nzâyz nyâuh nyăngz Hungh ninyh tingz ănz Săpc Đăngc zax naz? Stayb munh pyây tauz coong, “Buz cungb Naih ah tauh Hungh, Six Lô-ma Hungh.” ¹⁶ Coong lauh Phi-latv Nzăngđ zoz Zâu Yê-su Jaoz Phunz Nănh stiz tingz jămz ănz săpc đăngc zax.” Pengz songđ nyopz zoz Zâu Yê-su nzâyz ninyh.” ¹⁷ Zâu Yê-su cănh đamz nănh nyăngz săpc đăngc zax ninyh tauv nomz tync, bux hipđ ayx pyây gongđ tync, Yiu-tai Munh nyăngz woac, Hipđ ayx Gô-gô-tha.” ¹⁸ Nănh zuc nănh stiz tingz jămz yămz woa, Lauf năngx naih iz lanh Munh zuc tingz yămz nănh iz lepz cah synh, Zâu Yê-su yămz mungh tongx.” ¹⁹ Phi-latv ja ah lepz payh phunz ninyh tingz ănz woa săpc đăngc zax, Bangz ja coong, “ Nây Six Na-sa-letv Muôngf nyăngz Zâu Yê-su, “Yiu-tai Munh nyăngz Hungh.” ²⁰ Naih đungx lanh Yiu-tai toc woax lepz bangz nyăngz woac, wâyc zuc Zâu Yê-su zuc tingz woax nomz tync gâyh Yê-lu-sa-lem stengv max côz. bangz ja naih pôz hungđ đăngc, Hipc-lu woac, La-tiny woac, Hi-lapc woac. ²¹ Stayb munh coong ănz Phi-latv, năngx gâyf ja hipđ ayx Yiu-tai munh nyăngz Hungh. ²² Phi-latv tauz, Yaz ja ayx laix bix ja, dluyh pyeenz gôh. ²³ Pengz zoz Zâu Yê-su tingz jămz nzuf, Songđ zoz nănh nyăngz Gwuyz taih tinyh phunz ayx pyâyz phănc, Năngx naih cah njaf woax yămc six dătx săngh gwuyz, Max naih tungh gonh.” ²⁴ Woax đomc pengz lanh bux lanh, nâyx byeenđ gwuyz pănh max zeb nzof gôh seb! tâu mangc jađ toix laiv lanh tuz, nâyx đomc dlayc seetb taih toix nzuf Canyx-stâub coong nyăngz woac. Canyx-stâub coong, "nănh stiz zoz yaz nyăngz gwuyz quav tinyh phunz, yâuc zoz yaz nyăngz đao taih tâu mangc jađ laiv lanh tuz. nâyx đomc six pengz ayx nyăngz dlayc. ²⁵ Stâuđ yămz săpc đăngc zax cah synh six naih Zâu Yê-su nyăngz Nzif, Cloon Nănh nyăngz nzif stayx, Cơ-lô-ba nyăngz au six Ma-li-ya, Năngx Cloon Makv-đô-len Muôngf nyăngz Ma-li-ya.” ²⁶ Zâu Yê-su phătc nănh nyăngz nzif, Cloon Nănh Stăngz woax đomc stâyb-sây stâuđ woa stătx Nănh, Nănh songđ bux coong, “Nzif lex! Nây six mâyh nyăngz sây.” ²⁷ Nănh năngx coong bux woax đomc stâyb-sây buz coong, “Lâyc tauh six nyâuh nyăngz Nzif, Tăng woax zanyf, staox ninyh woax đomc stâyb-Sây ênz Zâu Yê-su nyăngz Nzif muf Cloon nănh stiz songc pyau Yămz.” ²⁸ Blătc woa Zâu Yê-su pâyz tuz nănh ayx săngh nzuf muif hungđ dlayc, seetb taih toix nzuf Canyx-Stâub nyăngz woac, Nănh songđ coong, “Yaz nyâuđ gatb nzongf.” ²⁹ Naih ah nomz tungh Pengh ănz pong tyu stuib tăpx ănz woa nib, Pengz songđ zoz cah đâyv maoh yomf ănz tyu stuib tipb ănz lauđ tic queng clôc yăngc ănz tauv Yê-su nyăngz nzeetx.” ³⁰ Zâu Yê-su hopb tyu-stuib nzuf songđ coong, “Muif hungđ clakx clunh-nzuf nzof gôh. Coong stêtb, “Nănh nyăngz pyây nanyx nzac songđ siv seetc.” ³¹ Woax noib six toix bênc tingc congz noib nyăngz noib, Yiu-tai Munh max oix njâuh zuc tingz jămz woax đomc munh ănz woa Săpc đăngc zax, Songđ jođ Phi-latv phunz pengz ninyh bopc woax đomc Munh nyăngz staux nau, Songđ zoz nzac taih. Max oix njâuh zuc tingz woax đomc munh yămz săpc đăngc zax quaix tingc congz noib six nongc seen quaix.” ³² Pengz songđ ninyh bopc cloon Zâu Yê-su zuc tingz woax đomc munh staux nau nzuf, Bopc tuz tah yeetx tauh, Năngx bopc tauv tah nyâyc tauh Staux nau.” ³³ Tauv Zâu Yê-su woa phătc Nănh siv seetc nzof, Songđ max bopc nănh nyăngz staux nau, ³⁴ Six naih ah tauh pengz zoz wif nzopb Zâu Yê-su nyăngz lauđ tam plongx cotb, Phătc womz cloon samđ njâuc seetb taih.” ³⁵ Phătc nzuf nâyx đomc dlayc seetb taih woax tauh munh ayx zanyx jênx coong nâyx đomc woac six seenz nyăngz, Nănh cănh pâyz tuz nănh lănv nyăngz woac Six seenz nyăngz phunz nyâuh hayh zeen.” ³⁶ Nănh năngđ nâyx ayx wâyc phunz toix nzuf Canyx-Stâub nyăngz woac, Canyx-Stâub coong, “Nănh nyăngz Stung max naih laiv stynz nau.” ³⁷ Naih ah yămc Canyx-Stâub coong, “Nănh stiz oix zu mangc nănh stiz nzopb woax Tauh.” ³⁸ Nâyx đomc dlayc seetb taih nzuf, A-ti-ma-thê Muôngf nyăngz Yô-sepv ninyh jođ Phi-latv zoz Zâu Yê-su nyăngz stynb stayđ nzâyz ninyh, Nâyx tauh Yô-sepv Six ayx Zâu Yê-su nyăngz stâyb-sây, Six nănh max nzađ toongx songx ayx, wâyc zuc nănh cumh nzav Yiu-tai Munh, Phi-latv songđ goib nzeetx phunz nănh, Yô-sepv songđ ninyh zoz Zâu Yê-su nyăngz stynb stayđ. ³⁹ Six lôx noib đămx munf ninyh lov Zâu Yê-su woax tauh Ni-cô-đêm, Nănh cloon Yô-sepv ninyh, Nănh nzâyz ah loc muc-yoc Yâuh đangz ninyh, Cox naih ah pez sanz nâyx.” ⁴⁰ Nănh stiz zoz Zâu Yê-su nyăngz stynb Stayđ yâuc âyz Yiu-tai Munh nyăngz gâyf plopx munh tayc, Zoz buyx sênh cloon woax đomc yâuh đangz. ⁴¹ Zâu Yê-su zuc tingz woax nomz tync naih ah nomz lauđ wynb, woa lauđ wynb njaf naih ah nomz săngb stâu ngamh. max zengx ănz quaix munh tayc. ⁴² wâyc zuc woax noib, Six toix Yiu-tai Munh bênc quaix tingc congz nyăngz noib.” Nâyx nomz stâu ngamh yâuc yămz Stătx woa, Nănh stiz songđ nzâyz Zâu Yê-su nyăngz stynb stayđ ninyh plopx ănz woa.”