¹ Zâu Yê-su năngđ nâyx Clo-Zâu songf, “Nănh songđ cloon nănh nyăngz stâyb-sây buz clangv muf woax nganc Cêtv-lôn wăngx nof, Yămz woa naih ah nomz lauđ wynb, Nănh cloon stâyb-sây buz songđ nzac woa lauđ wynb njaf ninyh.” ² Oix maic Zâu Yê-su woax tauh Yu-đatc lauf Pâyz woax cuyb tync, wâyc zuc nănh stiz njynh leox ninyh nzomf yămz woax nomz lauđ wynb.” ³ Yu-đatc songđ ênz đomc Lô-ma pengz pyây, cloon stayb munh pyây, cloon Pha-li-si Munh paiđ taih jămđ layf paix pyau nyăngz pengz, Ninyh woa lauđ wynb, Nâyx đomc pengz ninyv toongz, Nzauf tâuf pa, Nzâyz tungh zăngc ninyh.” ⁴ Zâu Yê-su cănh pâyz tuz nănh six zuc pongh nâyx đomc dlayc, Songđ seetb taih naic nănh stiz, “nyâuh taih lov Mănv? ⁵ Nănh stiz tauz, “Buz taih lov Na-sa-letv Muôngf nyăngz Yê-su.” ⁶ Zâu Yê-su coong, “Six yaz gôh! Nănh stiz bănh toiv phunb đangz bomh tonf nzac niđ ninyh. ⁷ Nănh năngx naic ah hâyc timb, nyâuh taih lov Mănv?” Nănh stiz tauz, “Buz taih lov Na-sa-letv Muôngc nyăngz Yê-su.” ⁸ Zâu Yê-su tauz, “Yaz bêc coong bux nyâuh nzof, Six yaz gôh, Six coong nyâuh năngđ zayf taih lov Yaz, nyâuh six zuc pungx phunz nâyx đomc munh Ninyh.” ⁹ Nâyx đomc dlayc seetb taih wâyc phunz toix nzuf nănh cloon Nzangc Pha coong quaix đangc nyăngz woac. Nănh coong Pha lex! Yaz max bây Pha jaoz phunz yaz nâyx đomc Munh toix tauh dlêtc.” ¹⁰ Si-môn Phê-e-rơ naih ah zungz nzuc đao woa, Songđ lutz seetb taih baic zuc stayb munh nyăngz nâuh ah nomz byaoh bah noomh seetc tuih, Nâyx tauh munh bux hipđ ayx man-zu.” ¹¹ Zâu Yê-su bux Phê-e-rơ coong, “Zoz mâyh nyăngz nzuc đao pungx ănz nzac nuih ninyh gôh! Max zâyf six zuc hopb Pha jaoz phunz yaz woax nomz munz stymz nyăngz zan Mah?” ¹² Woax đomc Lô-ma pengz cloon jămđ layf paix pyau woax đomc pengz, cloon Yiu-tai Munh woax đomc quanz pengz taih nyopz zoz Zâu Yê-su stayb. ¹³ Nzâyz nănh ninyh tauv An-na nyăngz cah đangc, An-na six ayx cai-pha nyăngz claof taz, woax nyăngv toix Cai-pha ayx stayb munh pyây. ¹⁴ Six nâyx tauh Cai-Pha dlênh noib nănh coong bux ayx lub nyăngz Yiu-tai Munh, Phunz ah lanh munh tayc tayv ah stingx Munh six năngx gongx têx woax tauh.*” ¹⁵ Si-môn Phê-e-rơ cloon pitc lanh stâyb-sây buz lêpc Zâu Yê-su ninyh, Nâyx tauh stâyb-sây Si-môn six quênx stayb-Munh pyây, Nzăngđ tuz cloon Zâu Yê-su nzac stayb-Munh nyăngz singh cah njaf ninyh. ¹⁶ Six Phê-e-rơ stâuđ woa singh jengh cungh ngwoac Phanx, six quênx stayb munh pyây woax tauh stâyb-sây ninyh jođ woa tauh zu jengh nyăngz Munh nzif, Phunz Phê-e-rơ nzac singh cah njaf ninyh.” ¹⁷ Zu jengh woax tauh munh Nzif pâuz coong ănz Phê-e-rơ, mâyh lauf ayx woax tauh Munh nyăngz stâyb-sây mah?” Phê-e-rơ tauz, “max zâyf đêh!” ¹⁸ Pâuz buz cloon jămđ layf paix pyau woax đomc pengz cuyx ah lâuh tâuf, tinyh đoih poc woa siz tâuf, Phê-e-rơ lauf cloon Nănh stiz poc woa siz tâuf, wâyc zuc toix gungh song.” ¹⁹ Stayb munh pyây zah naic tauv Zâu Yê-su cloon Nănh nyăngz stâyb-sây buz cloon Nănh nzaox gâyf stênz-stengb. ²⁰ Yaz laiv zanyf coong woac, Yaz toongx songx Munh coong, “Yaz toix laiv zanyf lănv lungđ nhleenz, Yâuc yămz Huyđ-toongh, Mah six yămz layf paix toongh, Mah six yămz Yiu-tai Munh căpx dlonf nyăngz tync nzaox Munh.” Yaz nzaox toix lungđ Yaz six max pinyx munh nef! ²¹ Wâyc săngh laix nyâuh bix naic Yaz? six zuc naic tauv tuz numđ yaz coong quaix woax đomc Munh, Yaz coong toix laiv lungđ nănh stiz lauf pâyz lef!.” ²² Zâu Yê-su coong ayx naz songf, Naih ah tauh pengz puf beb nănh nyăngz mynb yâuc coong, “Săngh laix mâyh bix năngx nzađ coong nâyx ănz stayb munh pyây nâyx yeh?” ²³ Zâu Yê-su naic nănh, “Yaz năngđ coong longđ, Mâyh si phunz yaz Mangc jađ yaz sai toix laiv hungđ geh! Six coong yaz năngđ coong tuz hođ, ha săngh laix mâyh yâuc năngx panx Yaz?" ²⁴ An-na năngx stungx nănh ninyh Cai-pha stayb Munh woa, woax zanyf Nănh stiz năngx stayb nănh woa. ²⁵ Phê-e-rơ lauf năngx stâuđ woa siz tâuf, Yămz woa siz tâuf woax đomc Munh naic nănh coong, “Mâyh lauf ayx woax tauh Munh nyăngz stâyb-sây mah?” Phê-e-rơ pyenv coong max zâyf đêh.” ²⁶ Naih tauh stayb Munh nyăngz đayf,* six zuc Phê-e-rơ Cumh tuih ah nomz bah noomh woax tauh jeenb, “Songđ coong, “Yaz phătc mâyh cloon woax tauh munh yămz woa lauđ wynb max zâyf mah?” ²⁷ Phê-e-rơ năngx aox coong, “Seenz max Zâyf yaz nef! Lênh dlih zayz ayx caix.” ²⁸ Tah nyâyc đomz njâu, ayx lub nyăngz Yiu-tai Munh, Nzâyz Zâu Yê-su seetb Cai-Pha nyăngz nyau, ênz ninyh Lô-ma Hungh woa, woax đomc Yiu-tai Munh woangb hayh naih wâyx, Max hayh ninyh nhlinc quaix pyenv mengc stêtz.” ²⁹ Wâyc nâyx Phi-latv songđ seetb cungh ngwoaic taih naic nănh stiz coong, “nyâuh nzâyz toix laivf lungđ dlayc taih coux lâyc tauh munh neh?” ³⁰ Nănh stiz tauz, “Six coong nănh max ayx lungđ huđ dlayc, Buz six max hayh nzâyz nănh taih nây nef.” ³¹ Phi-latv bux nănh stiz coong, “ha nyâuh bix cănh âyz nyâuh nyăngz gâyf nzâyz nănh ninyh stămc geh!” Yiu-tai Munh tauz coong, “Buz max naih lanyf tayx toix laiv tauh Munh đêh.” ³² Nâyx đomc dlayc seetb taih wâyc Phunz toix nzuf lôx noib Zâu Yê-su coong nănh six zuc tayc năngđ laix toix nzuf woax đomc woac.” ³³ Phi-latv songđ nzac woa stămđ Stoif tync ninyh, êu ênz Zâu Yê-su ninyh woa Naic nănh coong, “Mâyh seenz Zâyf ayx Yiu-tai Munh nyăngz Hungh max?” ³⁴ Zâu Yê-su tauz, “six năngđ mâyh naic nyăngz woac nâyx gôh, Six mâyh cănh nyâyh seetb taih Coong, “Mah six naih Munh lănv yaz nyăngz jau bux mâyh yeh?” ³⁵ Phi-latv tauz, “Yaz six max zâyf Yiu-tai Munh nef? Six cănh mâyh nyăngz woax stingx Munh cloon stayb Munh pyây nzâyz mâyh taih nây phunz Yaz lef, ha mâyh ayx longđ toix laiv hungđ stoif yeh?” ³⁶ Yaz nyăngz côkz max zâyf yămz nây bamh canz đêh, Six coong yaz nyăngz Côkz năngđ toix yămz nây bamh canz têx, Yaz nyăngz munh six taih bopc zax max phunz yaz zuc zoz jaoz Phunz Yiu-tai Munh nec, Six yaz nyăngz Côkz yămz pitc đoif.” ³⁷ Phi-latv naic, “ha tah six ayx Hungh mah? Zâu Yê-su tauz, “Mâyh cănh hipđ yaz ayx Hungh, Yaz stengb stâyv yămz nây bamh canz six wâyc seenz gâyf ayx zanyx manyf, Toix laiv tauh săngh seenz gâyf cănh mungv yaz nyăngz woac.” ³⁸ Phi-latv năngx naic, “ha seenz gâyf six toix lungđ?” Phi-latv coong nzuf Nâyx đomc woac, Songđ seetb cungh ngwoaic ninyh bux Yiu-tai Munh coong, “Yaz zah max Phătc nâyx tauh Munh naih toix laiv lungđ Stoif đêh,” ³⁹ Six âyz nyâuh nyăngz gâyf zez, Tauv nyâuh quaix pyenv mengc stêtz nyăngz Săngx huđ, Yaz six zuc pungx ah tauh yămz nzauh Munh phunz nyâuh, ha nyâuh oix nongc yaz pungx Yiu-tai Munh nyăngz Hungh phunz nyâuh max?” ⁴⁰ Songx munh hamv nhlingz-nhlingz têx coong, Max tuz pungx lâyc tauh Ya, oix zuc pungx Ba-ra-ba phunz buz, Ba-ra-ba Six ah tauh pamf Stoif nyăngz Munh.”