¹ Kwene mwemo, mwavwanga vino vikulemelelana na malamulo. ² Sambilizyini yatatakulu ukuti yaye ayakutekanya, ayakwelenganya, ayasuma mwisuwilo, mulukundo, na mukujimba. ³ Sambilizyini ya mamakulu ukuti yaye nivichitwa visuma, ayawula uwufi nukuya ayazya kuwuchakolwa, kwene ukuya ayasambilizi ya vizima, ⁴ nukuti sabilizyini ayakazyana ukuti yakunde ayalume yawo nukukunda ayanawo, ⁵ ukuti yaye ayakwelenganya, ayaswepe, ayakusunga ningo ing'anda, nukuya ayakuvwila ayalume yawo, ukuti izwi lyakwe Leza litasumuka. ⁶ Munzila iyiliyimwi, wapanzyini ayalumendo ukuti yawomvya amelenganyo ayazima. ⁷ Munzila zyonsi yilanjizyini mwenga ngati ichilanjizyo cha milimo iyizima. Muchisambilizyo chinu, lanjizyini ukuyipa, uwuchindikwe, ⁸ nilandwe lyamolimo lino lili papela payakususya, ukuti wensi wino akususya mwemwe asonziwa insonyi amuno yasi nanthi chimwi ichiyipe ichakuvwanga kuli sweswe. ⁹ Sabilizyini ayazya ukuti yawuvwila ayakalamba yawo muli vyonsi, pakuwasechelesya nu kunthakanzinkhana nawo, ¹⁰ ukunthawiyila, kwene mumalo mwakwe pakulanjizya isuwilo lizima lyonsi, ukuti munzila yonsi yangaleta uwusuma ku chisambilizyo chakwe Leza umupususi witu. ¹¹ Pakuti uwila wakwe Leza walolechile ku wupususi wa yanthu wonsi. ¹² Chikatusambilizya ukuti twakana twaleza ngoza na makumbuchila ya vyamunsi, nukwikala umwa-kuyilema, umwakusimpha, nuwumi wawuleza munkhulo yii, ¹³ pano tukulola inkholelo pakupochelela ivilipwa vyitayilo litu, imilolechele ya wuchindame wakwe Leza witu umukalamba nu mupususi Yesu Kilisitu. ¹⁴ Yesu wayipile pamulandu na sweswe ukuti atupususye kumaluyembu wonsi nukuyiswefya wenga ayanthu ayapawulwe yano yakalonda sana ukuwomba imilimo iyizima. ¹⁵ Mwavwanga ivyavinthu vii, mwawakomya ayanthu ukuti yaviwomba, nukuti yanyini ninsambu. Mutaleka wumwi awasule.