¹ Munsita yilyakwene, Herodi kateka wamphanga wuvwile ululumbi lyakwe Yesu. ² Watili kuyawomvi yakwe ,'' Wi a Yohani kawatizya; wazyuka kuyafwe. Achino amaka yaa yali pakuwomba muli weliwe.'' ³ Muno Herodi wamunyefile Yohani, munyepini, mukamuyike mung'anda yaminyololo umulandu wakwe Herodiyasi, muka muto wakwe Filipu. ⁴ Muno Yohani watile kuli weliwe ,'' Chitalingine kuti wewe uye nawe ngati umuchi wako.'' ⁵ Herodi angamukoma , kweni watinyile ayanthu , umulandu yamusenzile ngati intchimi. ⁶ Kweni lino uwanda wakupapwa wakwe Herodi wiza , umwana umwanachi wakwe Herodiyasi wachinyile pakasi payanthu nga wamusechelesizge Herodi. ⁷ Pakumusalifya Herodi, wamulayile nichilapo ukuti alimupa chonsi chilya chino walenga . ⁸ Lino mama wakwe wamulinganya , watili, '' Mphini kuno , pitewulo, umutwe wakwe Yohani kawatizwa .'' ⁹ Mwene wachiluchile nachino umukazgana walenzile , kweni umulandu wakuti walafile numulandu wakwe yalya yano yalinji nawe palwamo lulya, wavwanzile ukuti chiwombwe. ¹⁰ Watumile nga yayile yaputula umutwe wakwe Yohani mung'anda yaminyololo. ¹¹ Apano umutwe wakwe yawulesile pitewulo nga yamupile umukazyana nga wawusenzile ukuya nawo kuli mama wakwe. ¹² Apano ayalondezi yakwe yizile , yasenzile umwili wakwe , nukuyawuzika. Lino chino chapita , yayile nukuyamunena Yesu. ¹³ Nomba lino Yesu wivwa chino , wizile wafumapo piwato nukuya kumalo yawuze. Lino iwumba lyuvwa chino , yamu,konsile pansi ukufuma kumusumba. ¹⁴ Apano Yesu wizile pali woliwo nga waweni iwumba ilikalamba . Walinji nuwila pali woliwo nga wapozizge nayalwale yawo. ¹⁵ Lino amanguzi yiza, ayalondezi yizile kuli weliwe nukuti, '' Amalo yano yali pali wonga sana , nga nuwanda wasila kali . Liwuzge iwumba lifume penepo, ukti yaye mumizi yawo nukuti yakale ivyakulya vyawo.'' ¹⁶ Kweni Yesu watili kuli woliwo , '' Yasi numulandu wakuti yawelele. Muwapele chimwi ichakuti yalye.'' ¹⁷ Yatili kuli weliwe . '' Tuli sile nivimba visano nutuswi twili .'' ¹⁸ Yesu watili , '' Letini kuli nene. '' ¹⁹ Apano Yesu walinenyile iwumba ukuti lyikale pansi pamasote . Wasenzile ivibama visano nutuswi twili. Ukulola kupela , wapefile ,nukumonyola ivibama nukuwapa ayalondezi, nga ayalondezi yalip[ile iwumba . Wonsi yalile nukwikuta. ²⁰ Wonsi yasenzile vino vyasyazile vyavimonyolwa vwavwakulya indupe ikumi lyonga navili ukuzula . ²¹ Wonsi yano yalile yalinji awonsi amazimbi yasano, ukupawula ayanachi nayantche . ²² Papokwene wawanenyile ayalondezi yakwe ukuti yaye mwiwato nukuti yapite nawe kumbali yuze, pano walizinganga iwumba . ²³ Lino walizinga iwumba , wayile wakwela pamwamba pakupepa . Lino amanguzi yiza , walinji kulyakwene wenga . ²⁴ Kweni uwato walinji apatali ninsi , lyatusilwe namawimbi, muno umuza paputanga u,ufuma kuno yayanga . ²⁵ Akatondo sana kumacho Yesu wayilw kuli woliwo, wapitanga pali yemba . ²⁶ Lino ayalondezi yamulola akupita pali yemba , yachulike nukuti yatile , '' Ichizguka ,'' apano yalizile sana ninthete . ²⁷ Kweni Yesu wavwanzile kuli woliwo papokwene nukuti ,'' Jimbini! mutatina .'' ²⁸ Peteli wamwaswike nukuvwanga ukuti , '' Mwene, nanthi awewe, mbuzga nene ukuti nize kuli wewe pa manzi .'' ²⁹ Yesu watili, ''zanga.'' Apano Peteli wafumile mwiwato nukupita pamanzi pakuya kuli Yesu. ³⁰ Kweni lino Peteli walola umuza , watinyile . Lino watalika ukukapila walizile nukuti , '' Mwene nthula !'' ³¹ Papokwene Yesu wizile wololosya ikasa lyakwe , wizile wamulema Peteli , watili kuli weliwe , '' Mwe yalusuwilo ulunono, ichani chino ute ukusuwila ?'' ³² Apano lino Yesu na Peteli yizile yaya mwiwato, umuza wizile wamyalala. ³³ Apano ayalondezi mwiwato yizile yapepa nukuti, '' Umolimo we mwana wakwe Leza .'' ³⁴ Lino yalamba , yizile pamulundu pa Genesaleti. ³⁵ Lino ayanthu palya yamumanya Yesu , yizile yatuma paliponsi pamizi yapapipi, apano yizile nawo wonsi yano yali ayalyale . ³⁶ Yamulenzile ukuti yakumye sile mumbali mwavivwalo vyakwe , kweni wonsi yano yakumyanga yapolanga .