¹ Nomba wonsi yakasotchesya yamisonkho na yayembu wonsi yizanga kuli Yesu ukuti yize yuvwichisye . ² Woyili aya Falisayi na ya kawalika yayilizinye wenga numuze , ukuti '' Umunthu wino akapochelela ayayembu, nupya akalya nawo .'' ³ Yesu wavwanzile ichili chi kuli woliwo ati, '' ⁴ Aweni pali mwemwe, wino nanthi ali ni ng'onzi umwanda wonga (100) waponzyapo yonga , wuzye atange azisye amakumi yasano na yani na tusano na tuni (99) umu mapoli , nukukonkha iyiponge yonga mphaka ayizane? ⁵ Alino pano wayizana, akuyiyika pa viye vyakwe nu kusechela . ⁶ Ndi akwiza ukung'anda , akwama iviwuza vyakwe naya palamani, nukuwanena , 'Tusechelele ponga , amuno nayizana ing'onzi yane yino yaponzile .' ⁷ Inkhuwanena ukuti ichilichimwi, kulaya ukusechela ukwiyulu pa ku lapa kwa muyembu wenga , ukuchila ayatele amakumi yasano na yani na tusano na tuni (99) yano yatakulonda ukulapa. ⁸ Wuzge chingaya wuli umwanachi wuno ali na makopala yako Siliva ikumi (10) , ndi angaponzya, atakukozya ulukozyo, ukupyela mung'anda , nukulondelezya mphaka ayizane? ⁹ Nanthi wayizana akwama iviwuza vyakwe nayapalamani nu kuti , ' Tusechele ponga , amuno nalizana ikopala lino ne mphonzizye.' ¹⁰ Ichilichimwi, inkhuwanena , kuli ukusechela pa manso ya Yangeli yakwe Leza pa kulapa kwa muyembu wenga .'' ¹¹ Apano Yesu watili , ''Umunthu wumwi wali na yana yayili, ¹² nga umwana umunono wavwanzile kuli yisi ati, Tata, njankhanyini ivyakwane pa chuma chinu .' Apano wawankhinye ichuma . ¹³ Patapisile amanda ayavule, umwana umunono wawunganike ponga ivyuma vyonsi vino wakweti nukuchonela ukunsi yakutali, nukuti kulya wonwine ichuma chakwe chonsi nuwikazi wa kunthayisayila . ¹⁴ Nomba lino wavyonona vyonsi, munsi mulya mwawile inzala iyikalamba , nukuti watalike ukupinoka . ¹⁵ Wayile nukuyilonda wenga ukuti ayikale nawumwi umweninsi, wuno wamutumile ukuvyalo vyakwe pa kuvunjila ya kapoli. ¹⁶ Nawe wakunzile ukuti angayikuta na mapapa yako chilemba yano yakapoli yalyanga amuno nawumwi wuno wamupanga chimwi. ¹⁷ Kweni lino umwana umonsi watalika ukwelenganya , watili , ' Ayantchito yanga yakwe tata yano yali nichakulya ichakukwana , nga nemo indi kuno , nkhufwa ninzala! ¹⁸ Nimafuma kuno nukuya kuli tata, nga nditi kuli weliwe , '' Tata, nayembuchila iyulu nga nawewe. ¹⁹ Nthazipile ukwama umwanako nakupya ; unsende ngati a wumwi wa yawomvi yako.''' ²⁰ Apano umwana wilya wakatwike nukwiza kuli yisi. Pano wachilinji ali apatali , Yisi wamuweni na malanda yamulemile , wutwike nukuya mukukula nu kumufyompha. ²¹ Umwana wamunenyile ati, 'Tata, nayembuchila iyulu na mwemwe . Nthazipile ukwamwa umwanako nakupya .' ²² ''Yisi wavwanzile kuyawonvi yakwe , 'Letini zuwa umwinjilo uwuzima, mumuzwike , mumuzwike nikoza pikasa, ni ndyato kwitamba . ²³ Mulete na ka mulama akine mukakome. tulye tusechele! ²⁴ Amuno umwanane wafwile, nomba ali nu wumi. Waponzile, nomba wazanwa, ' Alino yatalike ukusechela . ²⁵ '' Nomba umwanakwe umukalamba wali ukuchalo. Watili wiza nukupalamila pang'anda , wuvwile ukwimbila nu kuchina. ²⁶ Wamile umuwonvi ewumwi nu kukolowozya muno vyayela . ²⁷ Umuwonvi wavwanzile ati, ' umuto wako ayizile apano tata wako akomile umulama uwine umusango wakuti amupochelile umumi.' ²⁸ ''Umwana umukalamba swasosile nukuti atalondanga ukwinjila , apano yisi wafumile nukuyilizyana kuli weliwe . ²⁹ Kwene umwanakwe umukalamba waswike nukuvwanga kuli Yisi ati , ' Lolini, nawomba uwuzya kuli mwemwe imyaka iyivule, inyhononelapo isunde linu, lelo mutatala mumphe penepo nanthi umwana wambuzi ukuti ningasechela ni viwuza vyane, ³⁰ Kwene lino umwana ninu wiza , wuno wonona ivyawumi winu kuli ya malaya, mwamukomela umulama uwine.' ³¹ ''Yisi wavwanzile kuli weliwwe ati, ' Mwana, wemo uli nani kasita wensi, na vyonsi vino ivyane ivyako ³² .Kwene chechituzipile ukuti tusechele nu kukunda, amuno umuto wako wafwile, nukuti nomba uwum; waponzile, nukuti nomba azanyilwe.'''