¹ Pahinumdomi sila sa pagpailalom ngadto sa autoridad ug sa anaa sa katungdanan, pagtuman kanila, andam sa pagbuhat sa maayong buhat. ² Dili magbiay biay kang bisan kinsa, walay gana sa pagpakig away, ug may malumo, mapakita ang pagkamapaubsanon ngadto sa tanang mga tawo. ³ Kay sa makausa kita sa atong mga kaugalingon walay panghunahuna ug dili matinumanon. Nahisalaag kita ug nahimong ulipon pinaagi sa nagkadaiyang mga pagbati ug mga kalipay. Nagpuyo kita sa pagkadaotan ug kasina. Kita mga salawayon ug nagdinumtanay sa matag usa. ⁴ Apan sa dihang ang kamaayo sa Dios nga atong manluluwas ug ang iyang gugma alang sa katawhan mitungha, ⁵ dili kini pinaagi sa mga buhat sa pagkamatarong nga atong nahimo, apan tungod sa iyang kaluoy nga iya kitang giluwas, pinaagi sa paghugas sa bag-ong pagkatawo ug kabag-ohan pinaagi sa Balaang Espiritu. ⁶ Ang Dios madagayaon nga mibubo sa Balaang Espiritu kanato pinaagi sa atong Manluluwas nga si Jesu-Cristo, ⁷ aron nga human gimakatarong pinaagi sa iyang grasya, mamahimo kitang manununod diha sa pasalig sa kinabuhing walay kataposan. ⁸ Kini nga pulong kasaligan. Buot ko nga hatagan ninyo ug kabug-aton nga mosulti mahitungod niining mga butanga, aron ang nagsalig sa Dios mamahimong matinud-anon sa maayong mga buhat . Kini nga mga butang maayo ug mapuslanon alang sa tanang katawhan. ⁹ Apan likayi ang binuang nga mga pagpakiglantugi ug ang mga gigikanan ug panaglalis ug panagbingkil mahitungod sa balaod. Kadtong mga butanga walay bili ug dili mapuslanon. ¹⁰ Isalikway si bisan kinsa nga maghimog hinungdan sa pagkabahin-bahin diha kaninyo, human sa una ug ikaduha nga pagpasidaan, ¹¹ ug hibaloi nga kanang usa nga motalikod gikan sa hustong dalan ug nagpakasala ug nanghimaraot sa iyang kaugalingon. ¹² Sa dihang ipadala ko diha kaninyo si Artemas o Tychicus, pagdali ug anhi kanako sa Nicopolis, diin nakahukom ako nga magpuyo panahon sa tingtugnaw. ¹³ Himoa ang tanan pagpadala kang Zenas nga abogado ug si Apollos, sa paagi nga sila dili makulangan. ¹⁴ Ang atong katawhan kinahanglan nga makakat-on sa pag pakiglambigit sa maayong mga buhat nga nagatagbo sa dinalian nga panginahanglan aron dili sila mahimong dili mabungahon. ¹⁵ Ang tanan nga uban kanako nangumusta kaninyo. Kumustaha kadtong naghigugma kanato diha sa pagtuo. Ang grasya magauban kaninyong tanan.