¹ Si Pablo ug si Timoteo, mga alagad ni Cristo Jesus, alang sa tanan nga gigahin diha kang Cristo Jesus nga anaa sa Filipos, lakip ang mga pangulo ug mga diakono. ² Hinaot nga ang grasya maanaa kaninyo ug ang kalinaw nga gikan sa Dios nga atong Amahan ug sa Ginoong Jesu-Cristo. ³ Akong gipasalamatan ang akong Dios sa matag hinumdom kaninyo. ⁴ Kanunay sa akong matag ampo alang kaninyong tanan, kini uban sa kalipay nga ako nag-ampo. ⁵ Ako nagpasalamat alang sa inyong pagpakig-uban sa ebanghelyo gikan sa unang adlaw hangtod karon. ⁶ Ako masaligon niining butanga, nga siya nga nagsugod sa maayong buhat diha kaninyo mopadayon sa hingpit niini hangtod sa adlaw ni Jesu-Cristo. ⁷ Husto alang kanako nga mobati niining paagiha mahitungod kaninyong tanan tungod kay ania kamo sa akong kasingkasing. Kamong tanan nahimong kaabag nako sa grasya sa akong pagkabinilanggo ug sa akong pagpannalipod ug pagpamatood sa ebanghelyo. ⁸ Kay ang Dios mao ang akong saksi, kung unsa ang akong paghandom kaninyong tanan uban sa kalooy ni Cristo Jesus. ⁹ Mao kini ang akong pag-ampo: nga ang inyong gugma modagaya ug modako pag-ayo diha sa kahibalo ug sa tanang panabot. ¹⁰ aron inyong oyunan ang labing maayo, ug aron kamo magmatinudanon ug walay ikasaway hangtud sa adlaw ni Cristo,. ¹¹ Kini usab aron nga kamo mapuno sa bunga sa pagkamatarong nga miabot pinaagi kang Jesu-Cristo, alang sa himaya ug pagdayeg sa Dios. ¹² Karon buot nako nga masayod kamo, mga igsoon, nga ang mga butang nga nahitabo kanako nakatabang gayod sa pagpa-uswag sa ebanghelyo. ¹³ Tungod niini, ang akong mga kadina kang Cristo nahimong naila sa tibuok guwardiya sa palasyo ug ngadto sa tanan. ¹⁴ Kadaghanan sa mga igsoon adunay labaw nga pagsalig sa Ginoo tungod sa akong mga kadena, ug sila adunay kaisug sa pagsulti sa pulong nga walay kahadlok. ¹⁵ Sa pagkatinuod ang pipila nagmantala kang Cristo tungod sa kasina ug panagbingkil, ug usab ang uban tungod sa maayong kabubut-on. ¹⁶ Ang mga nagmantala kang Cristo tungod sa gugma nasayod nga ako gibutang dinhi alang sa pagpanalipod sa ebanghelyo. ¹⁷ Apan ang ubang nagmantala kang Cristo tungod sa hinakog ug dili tinud-anay nga mga tumong. Sila naghunahuna nga sila makahimo ug kasamok alang kanako sa akong mga kadina. ¹⁸ Busa unsa? Bisan sa unsang paagi, kung sa sayup nga motibo o sa kamatuoran - si Cristo namantala, ug niini magmaya ako! Oo, ako magmaya. ¹⁹ Kay ako nasayod nga kini moresulta sa akong kaluwasan, kini nahitabo tungod sa inyong mga pag-ampo ug sa tabang sa Espiritu ni Jesu-Cristo. ²⁰ Kini sumala sa akong masaligon nga paglaom ug kasigurohan nga ako dili maulawan. Hinuon, uban sa tanang kaisog, ingon sa kanunay ug usab karon, ako naglaom nga si Cristo mabayaw sa akong lawas, bisan sa kinabuhi o bisan sa kamatayon. ²¹ Kay alang kanako ang pagkinabuhi mao si Cristo, ug ang pagkamatay kadaogan. ²² Apan kung ang pagkinabuhi diha sa unod makahatag ug bunga gikan sa akong mga paghago, ako wala masayod kung unsa ang akong pilion. ²³ Kay ako napugos niining duha ka mga pilianan. Ako nagtinguha nga mobiya ug makig-uban kang Cristo, nga mas labing maayo! ²⁴ Apan ang pagpabilin diha sa unod mas gikinahanglan alang sa inyong kaayohan. ²⁵ Ako kumbinsido man niini, ako nasayod nga ako magpabilin ug magpadayon uban kaninyong tanan, alang sa inyong pag-uswag ug kalipay diha sa pagtuo. ²⁶ Tungod nii uban kanako aduna kamoy madagayaong rason aron ipasigarbo si Cristo Jesus sa akong pakig-uban kaninyo pag-usab. ²⁷ Ipahigayon lamang ang inyong mga kinabuhi sa paagi nga takos sa ebanghelyo ni Cristo. Buhata kini aron nga, kung moanha ako sa pagpakigkita kaninyo o kung wala ako, madungog ko kung unsaon ninyo pagbarog nga lig-on sa usa ka espiritu. Manghinaot ako nga madunggan ko nga kamo anaa sa usa ka kalag nga nagkahiusa sa pagpaningkamot alang sa pagtuo sa ebanghelyo. ²⁸ Ug ayaw kahadlok sa bisan unsa nga buhaton sa inyong mga kaaway. Kay timailhan kini alang sa ilang pagkalaglag. Apan sa inyong kaluwasan, ug kini gikan sa Dios. ²⁹ Kay gihatag kini kaninyo alang- alang kang Cristo dili lamang sa pagtuo diha kaniya, apan usab ang pag-antos alang kaniya. ³⁰ Kay kamo adunay samang panagbangi sama sa inyong nakita kanako, ug ang inyong nadungog kanako karon.