¹ Bamo abanalume bakafuma ku Yudeya bakayanga ku Antioki sona bakamanyisyanga abawamwabo, bakatingi, '' Pene pala udumuliwe, ukuyana ni ndaghilo zya Mozesi, utangapongapokiwa.'' ² Vino vikamubika u Pawuli nu Baranaba ukuti manyi bivwane nukunenezania nabo.Po u Pawuli nu Baranaba, poka nabanyabo bobakabapo, bakasaliwa ukubuka ku Yerusalemu ukukomana na batumiwa , abasongo, pilalusyo linonyene. ³ Po lero bobatumiwa naba chalichi, bakenda mu Fonike na mu Samariya sona bakafumusya ukupinduka kwa bapanzi. Bakiza nichimwemwe ichikulu kubawamwabo. ⁴ Bobafika ku Yerusalemu, bakapokeliwa naba chulichi sona nabatuniwa sona namakambala, po bakababuzya ivinthu vyonsi vyo uchala abomba nabo. ⁵ Loli umunthu yumo yo akitika, yuyo akaba yumo waba Falisayi, akimilila akanena akati, '' chenelile ukubadumula sona nukubalamula ukuti basungilile ululaghilo lwa Mozesi.'' ⁶ Po abatumiwa nabasongo bakabungana poka ukunenezania amazyu agha. ⁷ Bobanenezania, u Pitala akimilila nukunena kukwabo, '' Bawamitu, muzimenye ukuti chochiza loli kale uchala akasala abache pakasi papinu, ukuti nu mulomo wane abapanzi bivwe amazyu amiza, nukusubila. ⁸ Uchala yo amenye umoyo, abasimikizya pakubapa umuzimu umuswepu, ngati namo akabombela kukwitu. ⁹ Atakapambania pakasi papitu na babo, pakubasuka imyoyo yabo mu lwitiko. ¹⁰ Po ulu choni cho mukumuyezya u Chala, pakubapayika ukatundu munsingo zya bamanyili yuyo abatata nuswe tutangakwanisya pakunyamula? ¹¹ Loli tukusubalila ukuti tuzupokiwa ukwendela muchisa cha mwene u Yesu, ngati mumo bakabela.'' ¹² Abanthu abinji bakaba bwaka myaa bobakwivwa kwa Baranaba nu Pawuli bobakubabuzga, ivimanyikwilo nivyakuswighisya vyo u Chala akabomba pakasi pabakunzi ukwendela mumwabo. ¹³ Bobaleka pakunena, u Jemusi akamula, nukunena ukuti, '' Bawamwitu, ivwa kukwane. ¹⁴ U Simoni akaba ukuti amubuzya mumo u Chala pabwandilo muchisa chache akabavwizya abakunzi ukuti asende kukwabo umunthu mwizina lyache. ¹⁵ Amazyu ghabawonela ghakwitikizania na vino, ngati mumo bakasimbila, ¹⁶ Pala ivinthu vino vyamala nkhuzukupyanila, ukuzukuzenga sona ichinamwene cha Deveti, chicho chikawa; Nkhuya pakwandizya ukuzenga muvibolya vyache sona, ¹⁷ ukuti abanthu bobakasyalikila bamulonde uChala, ukongania nabakunzi bobitiziwe mwizina lyane. ¹⁸ Vino vyovyo umwene akunena, yuyo abomba ivinthu ivinyene vyovikanda ukumanyikwa ukufuma mukabalilo akakale. ¹⁹ Polelo, inyinong'ono zyane zyakuti tutakabatamyenge abapanzi babo bakung'anamukila kwa chala. ²⁰ Loli inthi tubasimbile ukuti bafumeko kumununsi uwubibi uwavinyamana vivyo bakochela utwa chala twabo, ukufuma kubwamalaya, sona batakalyenge ichinyamana chochanyongiwa bwaka, sona batakalyenge nibanda. ²¹ Pakuti indaghilo zya Mozesi zyabelengiwa akabalilo akatali munyumba izyakwiputilamo isiku nisiku ilyakutuzya, sona amazyu ghache ghalumbililiwe muvisu vyonsi. ²² Po chikaba chochiza ku batumiwa nabasongo, nabachalichi bonsi, nukumusala u Yuda yo bakatingi Balanabasi nu Sila bobakaba bobasongo pabwanangwa nukubatuma ku Antiock nu Pawuli poka nu Balanabasi. ²³ Vyobakasimba vyovino: '' ukufuma kubatumiwa na kubasongo, mwebawamwitu, abapanzi ku Antiock Siliya namu Kilikiya; tukubalamuka! ²⁴ Chifukwa twivwa ukuti abanthu bamo bafumapo papitu, potutabatumite, babo bakabatamya na mazyu nukubavulungania inyinong'ono, nu mutende mukasi mumyoyo yinu, ²⁵ chokaba ngati chiza kukwitu, kubanthu tukaba inyinong'ono yoka, ukusala abanthu nukubatuma kukwinu nabaghaniwa bitu u Balanabasi nu Pawuli, ²⁶ abanthu babobakabika ubumi bwabo mububibi chifukwa chizina lya mwene witu Yeso kilisitu. ²⁷ Polelo twatuma u Yuda nu Sila bo inthi bababuzye vyo tukababuzyanga loli mumazyu ghabo. ²⁸ Pakuti chikaba ngati chochiza ku muzimu umuswepu na kukwitu, ukuwolosya inyobe papinu ukuti manyi mube niving'wamu vivyo vitabayanite umwe. ²⁹ Ukuti muleke ukwiputa kuvifwani, ukwadaba kuvinyamana ivyakunyonga kuvipili nakwisipo, nanthi wafumako kuvyonsi ivi, inthi chikabe chochiza sona tulilaghana mumutende.'' ³⁰ Polelo bobabatuma, bakenda ukuya ku Antioki; po bobabunganika abanthu bonsi poka, bakabapa abakalata. ³¹ Bobabelenga bakahoboka chifukwa chakubakazya. ³² U Yuda nu Sila, nabawonela bakabakazya abanangwa namazyu ghoghakabaghomyanga. ³³ Bobikalapo akabalilo akatali, bakabatuma nukuti umutende wube nabo kubobabatuma ³⁴ kukwitu.Loli chikaba ngati chochiza ukuti u Silasi asyale kulanyene. ³⁵ Loli u Pawuli nu Baranaba bakikala mu Antioch, bakamanyisyanga nukulumbilila poka nabobanyabo izyu lya mwene. ³⁶ Bo pendapo amasiku, u Pawuli akamubuzya u Baranaba akati, '' zatunyokele tuye tubalinge abanyitu mu twaya tonsi mo tukafumusyanga izyu lya mwene.'' ³⁷ U Baranaba akalondaga ukuti amusende u Yohani yo akitiziwanga Maliko ukuti babuke nawe poka. ³⁸ Loli u Pawuli akalinga ngati techochiza ukuti abuke nu Maliko, yuyo akabaleka mu Pamphylia atakaya pabutali nabo mumbombo. ³⁹ Pachifukwa ichi batakivwana, po bakanda ukulekana, uyu pamwene uyu pamwene, po u Baranaba akamusenda u Maliko, bakakwera ubwato bakaya ku cyprus. ⁴⁰ Loli u pawuli akamusala u sila nukubuka nawe, bo asubiliwa nabawamwabo ku chisa cha chara. ⁴¹ Po akabuka ukupulunsania mu Siliya na mu silisiya, pakuwomya ama church.