¹ Mu mashara ezi ninda vona a mangiroyi wone a zyimene mu makokona wone efasi, niya zyimikite o ruho rwe fasi o kuchinga ye hangani o ruho rwasha hungi hanshi kapa ha wate kapa mu zishamu. ² Mpaho shendi vona engiroyi limwi kali kambama mwiwiru kuvuzwe zyuva, kali kwesi eci ramatera cha Nyambe ozyu ahara.Nilya kuwa koku wongoza ku mangiroyi wone aa niya hewa a manta oku zyonawura efasi ne wate ye. ³ Mwasha zyonawuli efasi kapa ewate kapa e zishamu mbwita netu mane ku swaya a vakana va Nyambe wetu ha zifateho zavo. ⁴ Mpaho ninda shuwa emparo yava niva swayiwa ava vazwa mu mashika onshe a Isiraere ndi 144, 000. ⁵ Ava vazwa mu rusika rwa Juda ndi 12 000 ava niva swayiwa, 12 000 mu rusika rwa Rubbeni, ava vazwa mu rusika rwa Gadi ndi 12 000, ⁶ ava vazwa mu rusika rwa Ashere ndi 12 000, ava vazwa mu rusika rwa Nafetali ndi 12 000, ava vazwa mu rusika rwa Manase ndi 12 000. ⁷ Ava vazwa mu rusika rwa Simiyoni ndi 12 000, ava vazwa mu rusika rwa Livi ndi 12 000, ava vazwa mu rusika rwa Isakare ndi 12 000, ⁸ ava vazwa mu rusika rwa Zeburoni ndi 12 000, ava vazwa mu rusika rwa Josefa ndi 12 000, ava vazwa mu rusika rwa Benjameni ndi 12 000 avo niva swayiwa. ⁹ Mu mashara ezi ninda tonda mi haho havuso bwangu ninda vona e cinalyanga e cinene eci kaci woli o kuvaliwa ku muntu, nivazwa mu macava, mu mishovo, mu vantu nomu ndimi niva zyimene havuso vo ruvona na havuso bwa Nguana. Kava zyavere e zizyavaro zi tuva mi kava kwatilire o tutavi to turali mu maanja avo, ¹⁰ mi kava shumpura kezywi liwongoza ye: ''Okuhaza kwa Nyambe wetu, ozyu akere mu ruvona, nikwa Nguana.'' ¹¹ A mangiroyi wonshe kaa zyimene niya zimburukite o ruvona na vakuru ne zivumbwa-Nyambe zone ezi zihara, Niya wa hanshi ke sifateho zawo havuso vo ruvona noku tongama kurapera Nyambe, ¹² Niya taye, ''Ameni! Okutembwa, ne tuvo, novutali, no vuitumero, ne kute, no vuyendesi na manta zive kwa Nyambe wetu kuya oku kakumani noku kakumani! Ameni!'' ¹³ Zyumwinya wa vakuru mpaho nandi vuza ye, ava va zyabere ezi zyavaro zoku tuva, mbani, mi oku niva kazwa kokwi?'' ¹⁴ Ninda mutava ye, ''Enwe, muzyi,'' mi akundi vuza, ''Ava mbavo niva kazwa mu nkalirwa enene, niva sanza e zizyavaro zavo nokuzi tuvisa mu maroha a Nguana. ¹⁵ Nde vaka aha vena havuso vo ruvona rwa Nyambe noku musevezera mu tempere yakwe a kamwi na masiku, mi neye ozyu akere mu ruvona nara wumbwa etente yakwe hawiru lyavo. ¹⁶ Nera kali niva shuwe enjara kame, nera kali niva shuwe enyota kame. Ezyuva kali nelyi yiise hawiru lyavo, kapa wonshe o mutukusa u kuvaza. ¹⁷ Kakuli Nguana ozyu akere hakati ko ruvona narava mulisana wavo, nara vahitira kuya ku mapopaizi a menji o vuharo, mi Nyambe nara siingura e zinsozi zonshe ku mensho avo.''