¹ Aha sheku mana ezi ninda shuwa muwiru o murumo o munene kau shuwahara mbwa mazywi e cinalyanga ecinene nia shupura ye, ''Areruya. Okuhazwa ne tuvo na manta nza Nyambe wetu. ² Kakuli enkaturo zakwe nza niti noku sepahara, na atuli o mushayi o munene ozyu na zyonaura efasi koku shayintika kwakwe. Namu lifisi a maroha a vakana vakwe, awo naatira.'' ³ Voku amba lyavili: ''Areruya! O vusi vuzwa hakwe vusuma kuya mwiwiru enako ne nako.'' ⁴ A vakuru va makumi - ovire - ni-vone ne zivumbwantu zihara zonenivawa hanshi noku tongamina Nyambe, ozyu kakere muruvona. Mi niva shumpura, ''Ameni. Areruya!'' ⁵ Mpaho shekuzwa ezywi muruvona, litaye, ''Mu mutembe Nyambe wetu, enwe mwenshe muvakana vakwe, enwe mu mutiya, vonshe a vacenya na vanene,'' ⁶ Mpaho shendi shuwa shina ncinalyanga ecinene mbo murumo wa menji avuva mi shina milikitizo ye milinga yo nvura, neyi shumpura ye, Areruya! Kakuli o Nfumu a vusa, Nyambe ozyo zetu zonshe. ⁷ Tu tangarare noku voterwa noku muha etuvo kakuli epobwe lya masheshwa wo nguana sheya huli mi nomu sheshiwa wakwe nali vakanyi. ⁸ Na zumininwa oku zyavara mwi sira likevera noku cena'' (Esira erotu li zyimanina ezi tendantu ezirotu zavantu vacena). ⁹ Mpaho shelindita engiroyi ye, ''ñore ezi: E nfuyauzi nzavena niva kuiwa ku mukiti wa masheshwa a nguana.'' Mi nilya wezera ye, ''Anu nga mazywi eniti a Nyambe.'' ¹⁰ Mpaho shendi wira ha matende oku murapera, kono akundi taye, ''Washa tendi vulyaho! Neme ndili mukana muyenzo mi avo vashili kwatise muvupaki bwa Jesu. Mu murapere Nyambe, kakuli oku paka za Jesu ngo muzya we ciporofita.'' ¹¹ Mpaho shendi vona ewiru li aruka mi haho havuso bwangu koku vonahara embizyi yi tuva. O mulizyi wayo ka kuyiwa o kusepahara ne niti. A atura no kurwa koku sepahara. ¹² A mensho akwe afwana o muliro, mi ha mutwi wakwe azwesi a mahusi a mangi e cifumu. Akwesi ezina liñoretwa hakwe lizyivitwa eye yemwini kwaazya ozyo alizyi. ¹³ Ka zyavere eci zyavaro nica vombekwa mu maroha, mi ezina lyakwe likuyiwa Ezywi lya Nyambe. ¹⁴ Empi ze wiru kazi mucilire nava lizyite hava mbizyi voku tuva, nava zyavere mwi lineni endotu, ituva noku cena. ¹⁵ Mukanwa kakwe muzwanga o mukware o muceku owu kashauza a machava kuva wisiza hanshi, nara vavusa ko muramu we nsimbi. Ndeye naku kandanga muci kandiro che waine yaka nyeezi ko vuhali bwa Nyambe ozyu ena manta - onshe. ¹⁶ Hachi zyavaro chakwe naha kuwuru kwakwe ha ñoretwa ezina lyakwe: ''Muvusi wa Vasi no Nfumu wa Vanfumu.'' ¹⁷ Mi ninda vona engiroyi kali zyimene mwi zyuva. Nilya kuwa kezywi liwongoza kukuwa ezi zyuni zonshe ezi kazi wuruka muwiru ye, ''Mukezye, mushangane hantuhonke kwi pobwe enene lya Nyambe. ¹⁸ Mukezye mulye manyama a vanfumu, a manyama a vayendesi ve zigugi za mandwa, na manyama a vakwame a vakozu, a manyama e mbizyi niva lizyi vazo, na manyama a vantu vonshe, va rukuruhite na vakana, vachenya navanene.'' ¹⁹ Cware mpaho shendi vona echivatana nava nfumu vefasi na mampi avo. Kava shangana ye varwe varwise ozyu kalizyite ha mbizyi ye mpi yakwe. ²⁰ Kono ecivatana nica kwatiwa no muporofita wa kayama ozyu katenda ezisupo naa hambusa ava niva wana e swayo lye civatana mi niva tongamina noku rapera e ciswaniso caco co kuvumba. Avo vovire niva shoherwa nivahara mu muliro wu tumbuka we sirufura. ²¹ Ovungi bwavo niva yayiwa ko mukware owu kauzwa mukanwa kozyu ka lizyite ha mbizyi. Mi ezi zyuni zonshe nizali rera ha manyama avo.