¹ Bashere ni beshwetu, muteeze ku kulitabilira kwangu kunu ndimiha. ² E chinalyanga ho chishuwa Paulusi aamba kwabo mu mushobo wa baheru, boku tontora. Akuta ye, ³ Ndili Mujuda, ndi zarwa mwa Tarisusi ya Silisia, kono ninda litutira mowu mureneñi ku matende a Gamaliele. Ninda tewa kokuya ke njira yo kumamera e mirawo yi beshukurwetu. Ndina e zwalo lya Nyambe, shina bulyaho mwina mwenshe shunu. ⁴ Ninda sehekisa mweyi njira ku rufu; Ninda ba shumina bonshe na bakwame na bakentu kuba twara mu ntorongo. ⁵ Hape aba purisita banene na bakuru bawora kuba e mpaki ye ninda tambura a mañoro a bakwetu mwa Damasikasi, okute ye ndiye ko. Kandi tetwe oku shumina noku ba reta mwa Jerusarema mweyi njira okute ye bezye ba hewe o murandu. ⁶ Koku tendahara kute ye aho kandiya buyenda na hafwihi ne Damasikasi, mwi nako ya kamwi haho bulyo e muni nene kuzwa mwiwiru lyoku tanga ku tunya mu mabbali angu. ⁷ Ninda wira hanshi ndoku shuwa ezywi lindita ye , 'Saule, Saule, chinjaho ndi sesa?' ⁸ Ndoku taba, 'Ndiweni, Nfumu?' Aku ndita, 'Ndime Jeso wa Nazareta, ozyo kwesi o sesa.' ⁹ Abo kabena neme niba bona e muni, kono kali niba shuwisisa ezywi lyakwe ozyo na wamba kwangu. ¹⁰ Ndo kuta ye, 'Nchinji ndibotere okutenda, Nfumu?' Onfumu aku ndita ye, Zyimane mi oye mwa Damasikasi; oko mboka sumwinwa ezo oswanera kutenda.' ¹¹ Kali kandi wora kubona bakeñisa o kutuba kwe muni, cware ndokuya mwa Damasikasi nendi hitirwa ka maanja abo kabena neme. ¹² Kwina ninda ka shangana o mukwame akuiwa Ananiasi, mukwame a tokomera kuamana no murawo mi ka ambwa ke zirotu ku Majuda kaba kara mo. ¹³ Naakezya kwangu, kazyimene ha mbali yangu, nokuta ye, 'Mushere Saule, tambure kubona kwako,' Mwayiyo nako ndoku mubona. ¹⁴ A kuta ye, 'Nyambe wu beshukurwetu na kuketi ye ozyibe cho a shaka, kubona bo ba rukite, no kushuwa ezywi lizwa mukanwa kakwe yemwini. ¹⁵ Kakuli nora ba e mpaki yakwe kubantu bonshe kuamana nezo sho noboni no kushuwa. ¹⁶ Hape hanu nchinjaho oshi liberere? Nanuke, o korobezwe, mi ozwise zibi zako, nokuwa he zina lyakwe.' ¹⁷ Aha shinda kabooli kwa Jerusarema, mi aho nda kurapera mwi tempere, kokuba kute ye ndokuhewa e mpono. ¹⁸ Ndoku mubona nandita ye, 'Hwere ozwe mwa Jerusarema hahanu, kakuli kali kaba zumine o bupaki bwako kuamana neme.' ¹⁹ Ndokuta ye, 'Nfumu, abo beni bezyi ye ndime ninda kabiza mwi ntorongo no kudama bo kaba zumina kwako mu masinagoge onshe. ²⁰ A maroha a Sitefeni e mpaki yako aho kaa tiliwa, Neme mpuka ndi zyimene no kuzumina, mi kandi gantera e zizwato zabo kaba muyaya.' ²¹ Kono aku ndita ye, 'O nanuke, kakuli mbondi ku tandire kube Fasi.''' ²² A bantu niba mu zuminiza kuwamba mani kuhura ha. Kono hape boku jangaza nokuta ye, ''Azwe hanu hanshi o muntu wa bulyaho: kakuli kakubotere kute ye ahare.'' ²³ Aho kaba jangaza bulyaho, kushoha e ngubo zabo, no kushoha e dudusa muwiru, ²⁴ o mukuru wa bayendesi aku raera Paulusi kuretwa mu ma butukiro. Aku raera kute ye a buzaurwe niba mudama, okute ye eye mwini tema mbwa zyibe ye nchinji ba ku mu jangazira bulyaho. ²⁵ Aha shibana mushumini ne nkwere, Paulusi akuwamba kwi sore e nene kazyimene ha mbali ye, ''Ku zuminizwa kute ye oshwatire o muntu o Muroma ni kwaazy'o murandu mwa muwanini?'' ²⁶ E sore enene aha she lishuwe zi, akuya ku muyendesi mukuru noku muta, na wamba ye, Nchinji shemu shaka kutenda? Kakuli ozyu muntu muzyaki wa mwa Roma." ²⁷ O mukuru wa masore akezya noku muta ye, "Ndisumwine, oli muzyaki wa Roma?" Paulusi akuta ye, " Ee." ²⁸ O mukuru wa masore akutaba, Kaili ka mashereni mangi ninda wanisa obuzyaki." Kono Paulusi aku wamba, "Ninda zarwa nandili muzyaki wo Muroma." ²⁹ Mi a bakwame abo kaba kwesi bamu buzaura boku musiya haho bulyaho. O mukuru wa masore neye ka tiite, aho sha zyiba ye Paulusi kali muzyaki wo Muroma, kakuli ka mushumine ³⁰ Aha shelizwa, o mukuru wa masore ka shaka o kuzyiba e niti kuamana ne nyanso za Majuda kwa Paulusi. Cware aku mu shumununa noku raera o Mupurisita ni bonshe bashi nkuta ku kopana. Mpaho sha reta Paulusi hanshi noku mubika mukati kabo.