¹ Aho shitwa bbatuki kwavo, mi toku zuwa, tokuhitirira kuya ku mureneñi wa Kosi, mi kelyo licirira ezyuva mu mureneñi wa Rodesi, mi kuzwamo ku mureneñi wa Patara. ² Aho shetuwana cisepe ciya Fenisia, toku kwera noku zuwa. ³ Aho shetu bwene ewoongo lya Cyprus, netu cisiite kuma monsho, noka fwiika kwa Siria, mi toka sukira ku mureneñi wa Tire, kakuli nkoko cisepe kacika rongwera ezibya. ⁴ Aho shetuwani a vazyiizwa, toka ka karako mazyuva eyanja ni ovire. Vava vazyiizwa vo kuaamba kwa Paulusi ko muzya ye nareke kalyata etende mwa Jerusarema. ⁵ Aho shitwakali mazyuva, to kuzwa mi netukaya mu muyendo wetu. Voshe, neva kentu vavo na vanavo, voku tusindikiza munjira yetu mbita aho shikatukena kunje yo mureneñi. To kutongama he liizo, kurapera, mi toku liraana. ⁶ Tokurongama mucisepe, aho kava voora kumunzi hape. ⁷ Aho shetwa mani muyendo wetu we cisepe kuzwa mwa Tire, tokahura kwa Ptolemaisi. Kuko to karumerisa vakwetu no kukakara navo ezyuva lyonke. ⁸ Ke zyuva liciririra tokuzwa netukaya kwa Sesaria. Tokukavira munjuo ya Filipi, mukutazi wezywi, ozyo kali weyanja ni vovire, mi tokukara neye, ⁹ Haho ozyu mukwame kakwesi vana vone vanaruyeya vo kava porofita. ¹⁰ Aho shetwakali mumo mazyuva, ko kukezya ozyo kazwa kwa Judea omu porofita ozyo kakuwiwa Agabus. ¹¹ Aku kezya kwetu aku hinda musunga wa Paulusi. Kowo akushumina matende na maanja akwe akuta ye, ''Eci nceco uamba Muzya Ucenete, 'Cware Aha a Vajuda mwa Jerusarema mbuva shumine ozyu omwine wowu musunga, kapa okumuha mumaanja ava shifasi ¹² Aho shetushuwa ezo zintu, tweshe eswe na vantu vo kava hara mweco civaka vo kutatika kukumbira Paulusi ye kasa yendi kwa Jerusarema. ¹³ Paulusi akutava, ''Nzinji mupanga, nkulira no coraura mozyo wangu? Ndilitukiseze, kali nkuta ye kushuminiwa vulyo, kono nokufwa mwa Jerusalema kezina lyo Nfumu Jeso.'' ¹⁴ Shinaho Paulusi kali kali kushirira ye agoreswe, tokureka kulika mi to kuta ye, ''Kutendwe ke ntato yo Nfumu.'' ¹⁵ Aho she kuhita awo mazyuva, to kutora emikotana yetu ne tukaya kwa Jerusarema. ¹⁶ Kuko hape koku kayenda neswe neva zyiizwa vamwi kuzwa kwa Sesaria. Vo kezya no mukwame kakuwiwa Mnason, ozyo kazwa kwa Cyprus. muzyiizwa wa kare, ozyo tuwsanezi kukara neye. ¹⁷ Aho shetuhura wa Jerusarema, vakwetu vo kututambura kemboterwa. ¹⁸ Aho shelizwa Paulusi akuyenda neswe kwa Jakovo, a vakuru vonshe nkukavena. ¹⁹ Aho shamana oku varumelisa, akutanga okuviha zumi no zyumwi ecintu co Nyambe nateenda mukati kava shifasi ko musevezi wakwe. ²⁰ Aho shiva shuwa vulyaho, voku temba Nyambe, voku muta ye, ''O bwene, mukwetu, zikiti zoti mukati ka Vajuda avo ni va zumina. ²¹ Mi voshe vashiilire kuvika murawo. Niva sumwinwa zako, ye ozyiya a Vajuda voshe vahara mukati kava shifasi vareke Mushe, hape oshivata ye vareke kupanga vanavo mupato, no kusa cirira omukwa wecizo wakare. ²² Ncinji tupange? Mbuvashuwe ye nokezyi. ²³ Cware otende vuti tukusumwina hanu: Twina vakwame vone vanalikonki. ²⁴ Hinde vo vakwame okalicenese navo, ovalihire zikoroti zavo, kuta ye va kurure mitwi yavo. Kutaye yenshe azyive ye ezintu zo ni vaambirwa kuaamana newe nzembuzi. Vazyive ye newe ocirira murawo. ²⁵ Kono kuamana neva shifasi avo shika vazumine, tuñora nokuha entaero ye valizwise kwezo ni za tenderwa ku matavero amaswaniso, kuzwa mu maroha, ezo zasiniwa, no vuhure.'' ²⁶ Cware Paulusi akuhinda a vantu, mi kezyuva licirira, akulicenese navo, nakaya mutempere, kuzyivahaza enako ya mazyuva oku kulicenesa, mbita ho eneu shaka neihewe kwani neni. ²⁷ Aho mazyuva eyanja ni ovire aho shika amana, a Vajuda vamwi vazwa kwa Asia aho shivavona Paulusi mutempere, ne mboterwa ye cinalyanga yo nshe, voku muvika maanja. ²⁸ Kava jangaza, ''nwe vantu va Isiraere, mutu tuse. Ozyu mukwame ndeye kazyiiya vantu konshe ezintu zo kazirwisa vantu, omurawo, neci civaka. Kunje yezo, nareta ava Gerike mutempere noku sirafaza cinu civaka cicenete. ²⁹ Kakuli shika vabwene Trofimos o Muefese nena neye mu mureneñi, mi vokuazyara ye Paulusi ndeye nakamureti mu tempere. ³⁰ O mureneñi wonshe kauvoterwa, mi vantu vo kuvutuka hantuhonke vo kumukwata Paulusi. Voku mukokera hanje ye tempere, eziyazo zokuarwa haho vulyo. ³¹ Aho kava yereka kumu yaya, kokuzwa mbuzi ku mukuru we cisore ye Jerusarema yonshe kaina mu munyunga. ³² Haho vulyo akuhinda masore nava kurwana vavo no kuvutuka ku cina lyanga. Vantu ho sivavona masore no mukurwana wavo, vokureka kudama Paulusi. ³³ O mukuru wecisore akumushunina aku mukwata Paulusi, akuraera ye ashuminwe ka mawenge ovire. Aku muvuza ye ndini mi zinji natenda. ³⁴ Vamwi mucinalyanga kava jangaza cintu conke vami navo cimwinya. Shinaho mukuru we cisore kwazya eco kaswanezi kuaamba kevaka lye ndungati, aku raera ye Paulusi aretiwe munkuta ye tempere. ³⁵ Aho sha kezya ha malizyiro, masore kava muhindite kevaka lye mifirifiri ye cinalyana. ³⁶ Cinalyanga ca vantu kacicirire neciya vujangaza, ''muzwe kwakwe!'' ³⁷ Aho Paulusi shikaretwa ha nkuta hatempere, akuaamba ku mukuru we cisore, ''ndiaambe cimwi kwako?'' Mukuru we cisore akutiye, ''Nga owamba eci Gerike? ³⁸ Kali oli Muigepita, ewe sho hitirira ava zokeri vo muvuso no kuhinda vantu voli 4 000 mukanda?'' ³⁹ Paulusi akuta ye, ''Ndili Mujuda, kuzwa mu mureneñi Tarese mwa Silisia. Ndili muzyaki wo mureneñi ovutokwa. Ndikumbira, ndizuminine ndiwaambe ku vantu.'' ⁴⁰ Aho mukuru we cisole sha muha civaka, Paulusi akuzyimana hamalyatiro no kurava ke yanja ku vantu. Aho shekuva no kutontora hawa, aku aamba kwavo muci Heveru. Akuti ye,