¹ Yanna ora bedanda siado', guira' ca xaique ca sacerdote ne ca binigola xti guidxi guninna ca' luguia Jesus, tu gu'ti cabe laabe. ² Laacabe bindiibi cabe laabe, yene cabe laabe ne bidiicabe laabe Pilato xaique que.

³ Ti ora Judas, ni maca bidxii deche laabe, vi'ya ma nexhe zati Jesus, uca arrepentir ne bidxigueta gande de ni chii moneda de plata que, ca xaique ca sacerdote ne ca binigola,

⁴ ne guni': "Naa bichee, ra bidxiee deche' rini que gapa donda." Peru laaca guni'ca: "¿Xi cuenta gadu de nga ya? Nga ni bi'nu lii nga." ⁵ Ti ora que laabe bisa'bibe ca nda plata que ndani yu'du que, bireebe ne gulu'be doo yani be.

⁶ Ca xaique xti ca sacerdote que gucuaaca ca ndaa plata que ne guni'ca: "Cadi neza di cu'nu ndi ra nuu tesoro ca, purti ni risaca rinni risaca ni." ⁷ Laacabe guyui'lisaa cabe ni cayaca que, ne vueltu que guzi'cabe layu xti Alfarero para gucha'chi cabe ca ni de gadxe guidxi lúni. ⁸ Ndi nga runi layu que runibia'cabe ni casi: "Layu rini" de inadxi.

⁹ Ti ora que ni guni' profeta Jeremias que, bizaaca, naa: "LAACABE GUCUAACABE GANDE NE CHII MONEDA DE PLATA QUE, BIA'CA PRECIU GUTABE PUR CA ISRAELITA ¹⁰ NE BIDIICABE LAABE PARA LAYU XTI ALFARERO, CASI CA SEÑOR BISIENE NAA."

¹¹ Yanna Jesus bizuhuaa nezalu xaique guidxi ne xaique guidxi que gunabadiidxa laabe: "¿Lii nda rey xti ca Judiu?" Jesus bicabi laabe: "Lii caniu' ni."

¹² Peru ora Laabe bilaa ca xaique ca sacerdote ne ca binigola donda ique be, Laabe que nicabibe gaxti.

¹³ Ti ora que Pilato guni': "¿Cadi cayuna dia'gu guira' ni cudxiibacabe i'cu di?" ¹⁴ Peru Laabe que nicabibe nin ti diidxa, ngue runi xaique que nabepe cadxagayaa.

¹⁵ Yanna, zaa que ma biaa xaique guidxi que gundaa ti ni deguyoo ni na' guira xixe'. ¹⁶ Ca dxi que napacabe ti ni deguyoo nabé runibia'cabe laa, ni la' Barrabas.

¹⁷ Casi laaca gucuaa lisaa ca', Pilato rabi laacabe: "¿Tu laa napatu ganna gundaa? ¿Barrabas la o Jesus, ni rabicabe cristu? ¹⁸ Purti laabe nannabe bidiicabe laabe pur envidia.

¹⁹ Laga zubabe lu bangu ra rini'cabe xinga neza, xheelabe biseenda ti mensaje ne na: "Cadi gapu diou gaxti ne nguiu que gapa di donda ca; purti yanadxi nabe biina lu ti bacaanda runi Laabe.

²⁰ Yanna ca xaique ca sacerdote ne ca binigola bicaaca ca xaique que guinabaca Barrabas ne ñuuticabe Jesus. ²¹ Gobernador que gunabadiidxa laacabe: "¿Tulaa de guiropa cabe napatu ganna gundaa?" Laaca naca': "Barrabas."

²² Pilato rabi laacabe: "¿Xi gunenia' Jesus ni rabicabe Cristu ya?" Iracabe bicabicabe "Bicaa laabe lu cruz." ²³ Ne laabe guni'be: "Xiñee, xi bicheenebe? Peru laacabe bicaacabe ridxi jma pe nadi'pa': "Bicaa laabe lu cruz."

²⁴ Ti ora bi'ya Pilato ma que zanda guni gaxti', ne laga ma guiracabe cayasa yaya cabe, laabe gucuaabe nisa, gudibinabe nezalu guira xixecabe ne guni'be: "Naa cadi napa donde de rinni guxhii hombre que gapa donda di; laguuya pur laatu."

²⁵ Guira' ca binni que guni'ca: "Rinnibe guiaba ni luguiadu ne lugia' ca xiiñi du." ²⁶ Ti ora que laabe bindaabe Barrabas para laaca, peru bichendabe Jesus ne bidiibe laa para guica lu cruz.

²⁷ Ti ora que ca dxu xti xaique que yene ca' Jesus ra Pretorio ne bichiña cabe guira' xixe ca dxu que. ²⁸ Laacabe guxha cabe lari ladibe ne gudixhe cabe ti lari cahui luguiabe. ²⁹ Ora que bi'ni cabe ti corona de guiichi, gula'qui cabe ni ique be, ne bicaacabe ti bastón ladu derechu nábe, bisuxibi cabe ra lube ne bixidxi cabe de laabe cani'cabe: "¡Viva rey xti ca Judiu!" ³⁰ Ne laacabe bichaxhini cabe luguiabe, gucuaacabe ti baston ne gudapa cabe ique be. ³¹ Ora laacabe ma bixiidxi cabe de laabe, guxa cabe lari cahui que bigacu cabe laabe xaba be que ne zinecabe laabe para guicabe lu cruz.

³² Ora laacabe bire cabe, bidxaga cabe tobi hombre de Cirene ni lá Simon, ni bicá cabe laa chine laacabe para ganda gua gaya cruz que'. ³³ Laacabe llenda cabe ti lugar lá Golgota, ni rini': "Lugar xti Dxita gue'tu." ³⁴ Laacabe bidi cabe laabe gue'be Vinu nucha ne hiel. Peru ora laabe gulu rua be ni, que ñé be ni. ³⁵ Ora laacabe ma bica cabe laabe lu yaga cruz que, gundácabe xhababe lu cabe ora laacabe udxite cabe para guya cabe tu gapa suerte chine'ni. ³⁶ Laacabe guri cabe, ne cayapa cabe laabe ³⁷ Luguia de ique be gulu cabe ti didxa ni cudxiba donda ique be ni na: "NDI NGA JESUS, REY XTI CA JUDIU." ³⁸ Chupa gubana gucua ca lu cruz ne laabe, tobi ladu derechu xtibe, ne tobi ladu biga xtibe. ³⁹ Ca ni sidiidi cagudi' ca laabe, ne cunibi ique ca ⁴⁰ ne na ca: "Lii ni chi guxhia ndou' yu'du ne chi guzaalu ni xti tiru lu chona gubidxa, bila laaca lii. pa naca lu xhiiñi Diuxhi, biete de lu cruz ca."

⁴¹ Saqueca ca xhique ca sacerdote cayuni burla ca laabe, ne ca escriba ne ca binnigola, ne na ca: ⁴² "Laabe bila be xcadxi, peru que ganda gula be laaca laabe. Laabe nga rey xti Israel; lagudi guiete be de lu cruz ne oraca' suni cre' nu laabe. ⁴³ Laabe nabe runi cre' be Diuxhi. Diuxhi gueda gula laabe yana pa gapa gana, ti purti laabe guni' be: "Naa naca Xhiiñ Diuxhi." ⁴⁴ Ne ca gubana ni gucua ne laabe lu cruz que, laaca ngueca didxaguidxa gudxi ca laabe.

⁴⁵ Dede bia' gala dxi beeda ti guelacahui luguia interu naca guidxilayu' dede bia' ra guiona xhigaba huadxi. ⁴⁶ Ma yaca ganda guiona xhigaba huadxi que, Jesus bica' ti ridxi naro'ba ne guni': "ELI, ELI, ¿LAMA SABACTANI?" ni rini': "DIUXHI XTINE, DIUXHI XTINE, ¿XHI JÑE MA BISAANU NAA XTUBE?" ⁴⁷ Ora xtale de ca ni nu' ca xa ñee cruz que binadiaga ca laabe, laacabe guní cabe: "Laabe cucaridxi be Elias." ⁴⁸ Guenda tobi de laacabe bixhoñe ne gucua ti esponja, ne bigadxe ni ne vinu ni nandá, ne gulu ni lu ti nda' nite, ne bidii gueebe.

⁴⁹ Xcadxi binni que naa ca: "Lagusaana laabe xtubi be; chi guiduyanu pa gueeda Elias gueda gula laabe." ⁵⁰ Oraque Jesus bica ridxi xti tiru ne bidii Espiritu xti. ⁵¹ aque, Laari ni nanda ndani yu'du gureza chupa nda' de luguia dede xhaguete. Guca ti xhu' ndani guidxilayu' ne ca guie' ngola gulaa ca. ⁵² Ca ba' bixhale ca, ne xcuerpu xtale de ca ni nandxo xti Diuxhi ni biaba ca lu guenda rasi, biasa ca. ⁵³ Laacabe bire' cabe de ndani ba' xti cabe biasa si cabe de lade gue'tu, ne guyu cabe ndani guidxi nandxo, ne bihuini cabe ra lu xtale.

⁵⁴ Ora xhaique ti gayua dxu que' ne ca ni cayapa ca Jesus biiya ca xhu' ro' que, ne guira ni bizaaca que, laacabe izaa bidxibi cabe ne naa cabe: "Dxandipe ndi naca ndi xhiiñi Diuxhi."

⁵⁵ Xtale gunna ni bedananda ca Jesus dede Galilea para gapaca laabe, nu ca raque' cayuuya ca de zitu. ⁵⁶ Lade cabe nu' Maria Magdalena, Maria jña Jacobo ne José ne jña ca xhiiñi zebedeu.

⁵⁷ Ra bixhiini, beeda ti hombre ricu de Arimatea, lá Jose, ni laaca naca ti discipulu xti Jesus. ⁵⁸ Laabe bidxiña be Pilato ne gunabadidxa be laa pur xcuerpu jesus. Oraque Pilato biseenda de que gudi ca xcuerpu Jesus Laabe. ⁵⁹ se gucua cuerpu que', bichenda be laa adxi lari de linu naya' ⁶⁰ ne gulaqui be laa ndani laaca ba' xtibe, ni nacubi, ni gundacabe lu ti guie ngola. Oraque laabe bica na be ti guie naro'ba para bichi' be rua ba' que ne zeebe. ⁶¹ Maria Magdalena ne xti Maria que', nu' ca raque zuba ca neza lu ba' que.

⁶² Xti dxi que, ni naca dxi gudiidi si dxi guenda ribaqui chaui, ca xhaique ca Sacerdote ne ca fariseu bidxiña ca ra nu' Pilato. ⁶³ Laacabe guní cabe: "Señor laadu rietenaladxi du de que ora ni rusigui ca nabani, laabe guni be: "Tiidi si chona gubidxa naa sabane lade gue'tu." ⁶⁴ Nga runi bini mandar de que chi gapa cabe ra ba' que' dede ra guiona gubidxa; pa ca' la? ca discipulu xtibe sandaca chindana ca laabe ne gabi ca binni: "laabe ma bibaani be guenda guti." Ne ultimu guendarusigui di gaca jma ru naro'ba que niru' que."

⁶⁵ Pilatu gudxi laacabe: "Lachine ti neza de ca ni rapa. Lache' ne lagapa ni' modo jma galan ganda laatu." ⁶⁶ Ngue runi laacabe guye cabe ne gupa cabe ba' que, ne bichii chaui cabe guie' que ne gulu cabe ti neza de ca ni rapa.