¹ Enyuma ly'oluzira lw'Abayahudi, lwa Nyamuzinda erhi izuuba lishoshoka, Marya w'e Magadala n'owundi Mariya bayiisha bal'ilola oku chuusho (shinda). ² Ho na halya omusisi mudaarhi gwagera, Malahika wa Nnahamwiirhu ayandagala oku nkuba, ayiisha, ahirikira lirya ibuye lunda luguma, analitamala kwo. ³ Akaag'ilangashana nka mulazo, n'emishangi yaage yali myeeru nka lubula. ⁴ Abazzmu bmuyooboha bweneene, chiru kuhka barhondeera kgera mwo omusisi, bayoorha nka bamaafa.

⁵ Malahika ayiimuka omu kanwa, abwiira balya bakazi erhi: “Mweee murhayoobohe. Mmenyire oku Yezu muli mwalonza, olya babambaga oku musalaba; ⁶ arhalihano, anafuusire, nka kulya anaderhaga. Yiishi loli halya aali agwiishire.

⁷ Mugende duba duba, mubwiire abigirizibwa baage mpu: Anafuusire, amurhanzirageokuja e Galilaya; eyo munda yo mwamubonera. Ebyo byo nali ngweerhe nti mmubwire.”

⁸ Abo bakazi barhenga aho chuusho duba duba, erhi bakola bayoobohire bweneene banasiimire bweneene, erhi banali bulibirha, baji'ibwiira abigirizibwa eyo myanzi. ⁹ Hon'aho yesu ayiisha, abaja yo, ababwiira erhi: “Asingi wa!” Balya bakazi bamuja ho, bamugwaarha amagulu, bamugashaaniza. ¹⁰ Ago mango yezu ababwiira erhi: “Murhayoobohe. Mugende mubwiire bene wiirhu baje e Galilaya: eyomunda yo bambonera.”

¹¹ Amango abo bakazi babaaga bakola bali omu njira, baguma b'omu basoda baali balanzire echuusho (nshinda) bashubira omu chishagala, barhondeereza abakulu b'abajiinji ngasi ebyabiire byooshi. ¹² Abakulu b'abajinji bashimaanana haguma n'abagula: erhi baba bamaalagaanana, baha abasoda nfaranga nyinji, ¹³ bababwiirha mpu: “Muderhe oku ene budufu abigirizibwa baage bamaayiisha, bamaanzimba omurhumba gwaage erhi muli iro. ¹⁴ Na kavurunera akamanya okwo, rhwayiish'imanya oku rhwamuyaaza n'okumufungira ngasi bizibu.” ¹⁵ Abo basoda barhoola ezo faranga, bajira nk'okwo babwiiragwa. Ntyo kwo eyo myannzi yalumiire omu Buyahudi kuhika ene.

¹⁶ Balya bigirizibwa ikumi na muguma baja e Galilaya, oku irango Yezu anababwiiraga. ¹⁷ Erhi bamubona, bamugashaaniza, chiru akaba ntyo, baguma muli bo baba n'akarinda. ¹⁸ Yezu abaja yo, ababwiira erhi: “Nahiirwe obuhashe bwooshi enyanya emwa Mungu n'en'igulu. ¹⁹ Mugendage emw'abantu b'emilala yooshi, mubajire babe bigirizibwa baani: mubabatize oku iziino lya laarha n'ely'omugala n'elya Muuka gwa Mungu, ²⁰ munabayigirize okuyumva ebi namurhegekaga byooshi. Munamanye oku nkola nabeera haguma na niinyu ensiku zooshi, kuhika oku buzinda bw'igulu.”