¹ Pamandei palyebhela isiku eilya puute, isanya lwalyaswanga abhale isiku ilya paloungou, ou Mariamu Magdalena, noula ou Mariamu ouwamwabho bhaheinzeile ahwenye ikaburi. ² Nanaali itensya, eigousi, hunongwa zya antumi bha Daada bhahishile pala pankoungwa na bhoungulusye iwe, peipo ahalikhalila. ³ Eisheni yakwe yahali nashi ouwumeme, na menda gakwe gahali mazelu tee. ⁴ Bhaala abhaleindeileili bhahayinga na hwogope tee, nash abhafwee.

⁵ Oula ountumi abhabhoula bhaala abhashei huje, muganje hwogope eimeinye huje muhumwanza you Yesu, wabhakhomeileiye pashikhobhehanyo. ⁶ Noumo eipa, lelo azyousheile nashi shabhabhouzyeizye. Einzaji mwenye ou Daada pagoonile.

⁷ Bhalaji nanaali mubhabhouzye abhaazyi bhakwe huje, azyounsheile afume hwabhafwe, einyi abhatanguliye Hugalilaya. Ouwo wamubhahulole.’ Einya anei eimbabhouzyeizye.”

⁸ Bhaala abhashei bhahasogola paala pikaburi nanaali nouwoga na bhashiye tee, bhasheimbeiye, abhabhoule abhaazyi bhakwe. ⁹ Enya ou Yesu ahatangana nabho ahaga, “Salamu.” Bhaala abhashei bhaheinza na hukhate amanama gakwe, nantele bhahapuuta. ¹⁰ Nantele ou Yesu abhabhouzya, “Musahogope, bhalaji mubhabhouzye aholo bhanyu bhatangulile Hugalilaya. Ouhwo bhanzandole anei.

¹¹ Abhashei bhaala nabhabhalaga, einya bhamo abhaliinzi bhabhalile humujini abhabhoule abhalongozi bhabhasayi bha Ngouloubhei gounti eigo gagabhoumbeishe. ¹² Eipo abhalongozi bha bhasayi bha ngouloubhe peekana bahalongozi bhabhoungana ayanje eijambo na ayangane einongwa eizyo pandweimo nabho, bhafumizye eimpeya ¹³ na hubhabhoule, mubhabhoulaje bhamwabho huje, abhaazyi bha Yesu bhaheinzeile nousiku tee ahwibhe, wanahi Ou Yesu paala atei pataibha tigonile. ¹⁴ Nkashele ougousi wounvwa eigo, atei tinzayanje naawo huje, musahabhe na mayeimba.” ¹⁵ Abhaleindeileili bhaala bhaheega eimpeiya ziila, bhahabhomba nashi shamanyiziwe. EAinongwa eizyo zyahanyampana wabha Yahudi, eili sheisho paka sanyounu.

¹⁶ Lelo bhaala abhaatumi eilongo neiyeka bhabhalile hu Galilaya, hula hwigamba ou Yesu hwabhalajizizye. ¹⁷ Lwabhahalola, bhahapuuta. Lelo bhaamo bhahabha nou wooga. ¹⁸ Ou Yesu aheinza hwabheinei nabhabhouzye, eimpeiwilwe eikhone lyounti lyei munsi nei mwanya. ¹⁹ Eishi bhalaji mubhabheishe abha munsi bhounti abhe bhabhaazyi, bhouzyaji hwitawa lya Daada, nEIlya mwana, nou oumpepo oumufinjile. ²⁰ Mubhamanyizyaje abheneishishi humambo gounti geimbalajizizye, einya anei eindipeka namwei wilawiila, paka mumalishilo wei munsi.