¹ Husalaa eiyo ou Yesu abhalile isiku lyeitouyo ashilile humagonda. Abhaazi bhakwe bhali nei nzala na bhanda adenye amansalei naalye. ² Ila Amafarisayo nabhagalola eigo, bhabhouzya ou Yesu “Enya abhaazi bhaho bhabudula eindajizyo bhabhomba isiku zasagagaluhusiwe isiku lyeitouyo.”

³ Ila ou Yesu abhabhoozya, “Sagamubhazizye ou Daudi shabhombile, eisaala nahali nei nzala, pekaa na bhantu bhalinabho? ⁴ Shashahinjiye muhati yeinyumba ya Ngouloubhei nalye amabumunda geilulolesyo, gagali sageihalali hwamwene alye nabhala bhalinabho, ila halali puutizi? ⁵ Mseile amanyile mundajizyo, aje hunsiku lyeitouyo apuutizii muhati yeishibhanza bhayinanganya oulutouyo, ila sagabhali nei hatiya? ⁶ Ila eiyanga huliimwei aje wali gousi ashile eibhanza alii eipa. ⁷ Nkashe mugameinye eili lilineimaananshi; eihwanza ei rehema na saga einsayo; andisagamwabhalongaga bhasaga bhali nei hatiya, ⁸ Huje Oumwana wa Adamu ndo Gousi wilutouyo.”

⁹ Nantele ou Yesu asogola pala abhala hushibhanza shabho. ¹⁰ Enya hwali nou muntu wahoumeile einyobhe. Amafarisayo bhabhouzya ou Yesu, bhaga. “Eshi, sawa aponyei isiku lyeilutouyo?” ili huje bhawezye ahushitaki wa bhomba eimbibhi.

¹¹ Ou Yesu wabhabhouzya, “Younanu pahati yenyu, waali nei ngole yeka, neiyo eingole yaagwa muhati yeileindei isiku lyeitouyo, sagabhayikhate na ayefwe hwikhone muhati yeileindei? ¹² Eishi, sheishilhu sheishili sheisamani, hani huje, saga hani yeingole! Eishi shinza abhombe aminza isiku lyeitouyo.” ¹³ Nantele ou Yesu abhouzya oula oumuntu, “Glolosya oukhono gwaho.” Wanyosya napate ouwinza nanshi gula gwamwabho. ¹⁴ Leelo Amafarisayo bhafuma hounze bhahwipanga idala lya hubude bhabhalile hounze apanje hushinyume shakwe. Bhahanzaga idala lyahugoje.

¹⁵ Ou Yesu nawamanya eilyo asougouye eipo. Abhantu abhinji bhalondozyeizye, na abhaponiezye bhoonti. ¹⁶ Abhalajizizye bhasahabhombe huje bhamwabho bhamanye, ¹⁷ Huje ikamilishe eila eilyoli, yaya yangwilwe nou kuwe ou Isaya, ahajile, ²² Oumuntu uomo wasalola amaso nou oupoumu, asangeni nei peepo aletilwe hwitagalila lya Yesu. Aponiezye, peka namatokeo gaje oumuntu oupoumu ayanjile na lole. ²³ Eimpouga yonti yaswijile na yanje, “Awezizya oumuntu ounou abhe mwana wa Daudi?”

²⁴ Ila umuda Amafarisayo lwabhahounvwa amayele eiga, bhayanjile, “Ounou oumuntu sagaafumya eimpepo hwikhone lyakwe youyo ila hwikhone lya Belzebuli, ougosi hweimpepo.

²⁵ “Ila ou Yesu wamanya einsebho zyabho na nabhabhozye, “Kila umweinei wawugabhanyishe gwene gunanjiha, na kila eikhaya awe einyumba yeigabhanyiha yene sagayayiheemeileila. ²⁶ Nkashe Usetano, abhahumwefwe Usetano, basi ajikhana hunafasi yakwe mwene. ²⁷ Ni namuna wele uwoumweinei wakwe ubhahweimeileile? Na nkasha eifumya eimpepo hwikhone lya Belizabuli, afwasi bheinyu bhafumya hwidala weile? Hweeli bhayibha bhalonzanyi bheinyu. ²⁸ Na nkashe bhafumya eimpepo hwikhone lya Mfinjile wa Ngouloubhe, eishi oumweinei wa Ngouloubhi weinzeile amweinyu.

²⁹ Nou muntu abhawezye weile ahwinjile muhati yeinyumba yeweikhone na hweibhe, bila hupinye hwikhone kwanza? Eipo panzahwibhe intabhalo zyakwe afume muhati yeinyumba.

³⁰ Wawonti wasagaali peka nanei ali shinyume shane, wape wasaga abhounganya peka nane ouyo ataganganya.

³¹ Eishi eiyanga hulimwe, huje eimbibhi nei kufuru abhantu bhayeisajilwa, ila ahukufuru Umpepo ufinjile sagabhayisajilwa. ³² Na wawonti wayanga izwi shinyume shaMwana wa Adamu, eilyo ayisajilwa. Ila wawonti wayanga shinyume nou Mpepo ufinjile, uoyo sagayisajilwa, huunsi eine na wala eila yeihwenza.

³³ Awe oubhombe ikwi abhe linza nei doundoo lyakwe linza, au linankAanye ikwi nei doundoo lyakwe, huje ikwi limanyiha hwidoundoo lyakwe. ³⁴ Amwe bheimpapo bhei nzoha, amwe mulibhabhibhi, muwezizye ayanje amazwi aminza? Huje iloumu liyanga afume mumbeiho zyazili mumwoyo. ³⁵ Oumuntu oumwinza humbeiho einyinza yahumwoyo gwakwe afumya einyinza, na oumuntu oubhibhi humbeiho eimbibhi yeimwoyo gwakwe, afumya shashili shibhibhi. ³⁶ Eimbabhozya hwisiku lyei longwi abhantu bhaihwanziwa ayanje eimbibhi zyonti zeizwi lyasagalilineimaana lyabhayanjile. ³⁷ Huje humazwi gaho waibhaziwa eilyori na humazwi gaho wailongwa.”

³⁸ Eipo asimbi na Mafarisayo bhahabhouzya ou Yesu bhahaga “Manyizi, teinzasoungwe alole eishara afume huliwe.”

³⁹ Ila ou Yesu aheiteiha na nabhabhozye, “Eishipapo eishibhibhi na bheegu shihwanza eishara. Ila neimo eishara yeibhafume hwabhene ila eila eishara ya Yona ukuwe. ⁴⁰ Nansi shilaou Yona shahali muhati yivyanda vyeinswii eingousi hunsiku zitatu pasanya na nousiku, eisho sheisho Oumwana wa Adamu shanzabhe muhati gweimwoyo gweinsi hunsiku zitatu pasanya na nousiku. ⁴¹ Abhantu bhei Ninawi bhayihweimeileila hwitagalila peka neimpapo yaa bhantu eibha na bhayishilonga. Huje bhalambile namaloumbeileilo ga Yona, na einya, oumuntu oumo ougousi ashiile ou Yona ahweili eipa. ⁴² Ou Malikiya wahukusini aihweimeileila hulongwi peka na bhantu bheishimpapo eishi nashilonje. Ahenzeile afume humwisho weinsi ahenzeile atejelezye einjele ya Selemani, na einya, oumuntu oumo uogousi ashile ou Selemani ahwelii eipa.

⁴³ Eisala ipepo ibhibhi nalihufuma umuntu, lishilila eisehemu yasaga eili na meinze neihwanza patouye, ila salipalola. ⁴⁴ Tena ayanga, ‘Imbaweile hunyumba yanei mweinfumile.’ Lwawela ayaga eila einyumba eiyouseilwe na eili tayali. ⁴⁵ Nantele abhala na nabhalete abhanje eimpepo eimbibhi saba zyeizilimbibhi hani ashile eiyene, bhahwenza akhale bhonti pala. Ni hali yakwe ya humwisho eibha mbibhi ashile eiyahwande. Eisho shasho sheishayibha humpapo einei eimbibhi.

⁴⁶ Ou Yesu nazyoungoulaga nei mpouga einya, oumayei wakwe na holo bhakwe bhaheimeileiye hounze, bhahanzaga ayanje nawoo. ⁴⁷ Oumuntu weka abhouzya, “Einya oumaye waho na aholo bhaho bheimeileiye hounze, bhahwanza ayanje nawe.”

⁴⁸ Ila ou Yesu ayanga, wabhozyeizye, “Oumaye wane you nanu? Na aholobhane bhananu?” ⁴⁹ Waape anyosizye oukhono gakwe hwabhaazi na yanje, “Enya, eibha bhamayei naholo bhanei! ⁵⁰ Huje wowonti wabhomba zyageine ou Daada wanei wali humwanya, oumuntu ouyo ndio holo wanei, ouyeiloumbou wanei noumaye wanei.”