¹ Laha namonjy gnan'i Jerosalema Jesosy voho gny mpianany ka nandeha tao Betifaga, agny an-tendrombohits'i Oliva, la nandefa mpianatsy roe Jesosy, ² niresaky tamin-drozy hoe: “Mandehana ao amin'izay vohitsy magnaraky ao, fa eo nareo la hahajery boriky mifehy voho ana-boriky raiky miaraky aminy. vahao rozy voho andeso amiko atoy. ³ Laha misy mivola gnanareo mahakasiky gnan'io, la resaho hoe: “Misy ilan'ny Tompo gnan-drozy; voho eo ho eo io olo io la handefa gnan-drozy miaraky aminareo.”

⁴ Voho nitranga io mba hahatanteraky zay nambara tamin'ny alalan'ny mpaminany. Hoy Ie hoe: ⁵ “Ilazao gny anaky ampelan'i Ziona hoe: “Ingo, gny Mpanjakanao mamonjy gnaao, Manetsy tena voho mondra boriky- ana-boriky lahy.”

⁶ Bakeo la lasa reo mpianatsy voho nanao arak'izay nandidian'i Jesosy gnan-drozy. ⁷ Nandesin-drozy gny ampondra voho gny ana-boriky voho nametraky gny sikin-drozy teo aminy, ka nipetraky teo amin'ny gny siky Jesosy. ⁸ Gny ankabeazan'ny vahoaky la namelatsy gny sikiny tamin'ny tany, voho reo hafa nanapaky sampan-kazo voho nagnaparitaky gnan'io tamin'ny lalany. ⁹ Bakeo reo vahoaky nialoha gnan'i Jesosy voho reo zay nagnaraky gnazy nikorakoraky hoe: “Hosana ho gnan'ny anak'i Davida! Isaorana gny avy bakamin'ny agnaran'ny Tompo! Hosana agny amin'ny avo indrindra!”

¹⁰ Lafa nilitsy tao Jerosalema Jesosy, la nikoraky gny raiky tana ka nanao hoe: “ia moa io?”

¹¹ Gny vahokay namaly hoe: “Ie ro Jesosy gny mpaminany bakagny Nazareta agny Galilia.

¹² Bakeo nilitsy tao an-tempoly Jesosy. Niroahiny iaby reo mpivily voho mpamarotsy tao an-tempoly, voho navaliny gny latabon'ireo mpanakalo drala voho gny fipetrahan'ireo mpamarotsy voromailala. ¹³ Hoy Ie tamin-drozy hoe: “fa voasoratsy hoe: “Gny tragnoko la ha kaihy hoe tragno fivavaha; kanefa ataonareo zohy fieren'ny jiolahy.”

¹⁴ Lafa avy teo la nisy jiky voho mandringa namonjy Gnazy tao an-tempoly, ka nisitraniny rozy.

¹⁵ Fa lafa nahajery gny raha- maha tseriky nataony gny lehiben'ny mpisoro voho gny mpanora-dalagna, voho lafa ren-drozy gny aja maliniky nitoretoreo tao an-tempoly hoe: “Hosana ho gnan'ny anak'i Davida,” la nasiaky rozy.

¹⁶ Hoy rozy taminy hoe: “Reareo va io resahan'ireo olo reo?” namaly gnan-drozy Jessosy hoe: “Eka! Fa tsy mbo nivakinareo mihitsy va gny hoe: “Avy amin'ny tsihovin'ny aja maliniky voho gny aja minono ro nandovararianareo gny fandrengea?”

¹⁷ Bakeo nagnenga gnan-drozy Jesosy ka nandeha tagny amin'ny tanana'i Betania voho nipetraky tao gny haly.

¹⁸ Sady lafa maray laha nimpoly tagny an-tana Ie, la mosare. ¹⁹ Nahajery azon'aviavy tegny an-tsisin-dala, la namonjy tegny Ie voho tsy nahajery na ino ino teo afa-tsy gny raviny. Hoy Ie taminy hoe: “Ao tsy hisy voa sasy bakaminao mandrakizay,” voho niaraky tamin'izay la maiky lay aviavy.

²⁰ Lafa nahita gnan'io reo mpianatsy, la tseriky rozy niresaky hoe: “Nanao akory ro nahamaiky avy hatragny toy aviavy toy?”

²¹ Namaly Jesosy voho niresaky gnan-drozy hoe: “Resahako marina aminareo, laha manam-pinoa voho tsy misy fisalasala nareo, la tsy zay natao tamin'io aviavy io avao ro hataonareo, fa ndra la hiresaky amy toy tendrombohitsy toy aza hoe: “miongota voho mifindra agny an-dranomasina, la hatao io. ²² na ino ino angatahinareo am-bavaky, am-pinoa, la ho azonareo.”

²³ Lafa nilitsy tao an-tempoly Jesosy, la namonjy Gnazy gny lehiben'ny mpisoro voho gny zokiolo laha nampianatsy Ie sady niresaky Hoe: “fahefa bakaia moa ro anaovanao regny raha regny, voho ia ro nagnome gnanao gnan'io fahefa io?”

²⁴ Namaly Jesosy voho niresaky tamin-drozy hoe: “Hametrahako fagnontania raiky avao koa nareo. Laha resahanareo amiko, la ho ho volagniko aminareo gny fahefa anaovako regny raha regny. ²⁵ Gny batisan'i jaona -bakaia ro niaviany? Bakagny an-dagnitsy sa bakamin'olombelo?” Nialy hevitsy rozy, nanao hoe: “Laha miresaky tsika hoe hoe, Bakagny an-dagnitsy, Ie hiresaky amintsika hoe: fa nagnino nareo ro tsy mino gnazy?” ²⁶ Fa laha miresaky tsika hoe: “Bakamin'ny olombelo, mataotsy gny vahoaky tsika, fotony rozy iaby la mihevitsy gnan'i Jaona manahaky gny mpaminany.” Ka namaly gnan'i Jesosy rozy ka nivola hoe: “tsy hainay.” ²⁷ Sady hoy avao koa Ie tamin-drozy hoe: “Zaho avao koa la tsy hiresaky aminareo hoe bakaia gny fahefa anaovako regny raha regny.

²⁸ Fa nagnino gny hevitrareo? Nisy johary raiky nana anaky lahy roe. Nandeha nagnagny amin'ny gny voalohany ie voho nanao hoe: “Anaka, mandehana miasa agny amin'ny tanim-boaloboky androany.”

²⁹ Gny anany lahy namaly gnazy hoe: “tsy ho agny aho,” fa bakeo niova hevitsy ie ka lasa.

³⁰ Bakeo la nagnagny amin'ny raiky faharoe ie sady niresaky manahaky gnan'io avao koa. Namaly ie ka niresaky hoe: “Ho agny aho, tompoko; nefa tsy nagnagny ie. ³¹ Ia tamin'ireo anany roe lahy reo ro nanao gny sitrapon'ny rainy?” Voho hoy rozy hoe: “Gny voalohany.” Jesosy niresaky gnan-drozy hoe: “Resahako marina aminareo, reo mpamory hetra voho reo mpivaro-tena la hilitsy gny Fanjakan-Dranagnahary alohanareo. ³² Fa Jaona namonjy gnanareo tamin'ny fahamarigna, fa tsy nino gnazy areo. Fa reo mpamory hetra voho mpivaro-tena nino gnazy. Fa nareo, ndra la nahajery gnan'io aza, la tsy nibebaky voho tsy nino gnazy.

³³ Janjigno toy fagnora raiky hafa toy. Nisy johary raiky, tompon-tany. nanao tanim-boaloboky ie, nifefeny io, nandavahany famiaza tagnatiny tao, nananganany tilikambo, voho nampagnofany tamin'ireo mpamboly voaloboky. Bakeo la nagnagny amin'ny tana hafa ie. ³⁴ Lafa nihanariniky gny taom-pamokara, la nagniraky gny sasany tamin'ireo mpanompo ie ho agny amin'ireo mpamboly voaloboky hangalaky gny vokany. ³⁵ fa nisamborin'ireo mpamboly voaloboky reo mpanompony, nivangoan-drozy gny raiky, nivonoan-drozy gny hafa, la mbo nitorahy vato gny hafa. ³⁶ Voho mbo, nandefa mpanompony hafa ndraiky lay tomon-tany, maro noho gny tamin'ny voalohany, fa nataon-drozy manahaky gnan'igny avao koa. ³⁷ Tafaran'io, la nagniraky gnanany lahitoka tagny amin-drozy gny tompon-tany, niresaky hoe: “Hagnaja gnanako rozy.”

³⁸ Fa lafa nahita gnanany lahy toka reo mpamboly voaloboky, la nifampiresaky rozy hoe: “Toy ro mpandova. Andeha, ho vonoantsika ie voho alantsika gny lova.” ³⁹ Nohon'io la nisamborin-drozy ie, natoraky tao agnatin'ny tanim-boaloboky voho nivonoa. ⁴⁰ Voho lafa avy gny tompon-tanim-boaloboky, ino ro ho ataon-drozy mpamboly voaloboka?”

⁴¹ Hoy rozy taminy hoe: “Ho ringaniny amin'izay fomba mahery mare reo olon-doza, voho bakeo hampagnofany amin'ireo mpamboly voaloboky hafa gny tanim-boaloboky, olo hagnome gnazy gny anjara voliny amin'ny fotoam-pamokara.”

⁴² Jesosy niresaky tamin-drozy hoe: “Mbo tsy namaky gny Soratsy Masina mihitsy va nareo hoe: “Gny vato nilavin'ny mpagnori-tragno ro natao vato fehizoro. Bakamin'ny Tompo io, voho mahatandregna eo agnatrehantsika?

⁴³ Nohon'io resahako aminareo, alao aminareo gny fanjakan-Dranagnahary voho hatolotsy gny firenena zay mamokatsy reo voany. ⁴⁴ Ndra ia ia ho lavon'io vato io la ho potopotiky. Fa zay hilavoany koa la hotorotoro.”

⁴⁵ Lafa nahajanjy reo fagnohara reo gny lehiben'ny mpisoro voho reo fariseo, la azon-drozy fa mahakasiky gnan-drozy ro niresahany. ⁴⁶ Nikasa gny hanambotsy Gnazy, fa zao natahotsy gny vahoaky rozy, fotony nataon'ny olo ho mpaminany Ie.