¹ Olwa yakholomokha okhurula khushikulu, omukanda omukhongo kwa mulondakhwo. ² Ne omundu wobuchere niyetsa namwinamira, naboola, Omwami, noyanza umbonie.

³ Mana Yesu nanyira omukhonokwe namutirakhwo naboola, ndienya, hona. Ne habwene nabwene nahona. ⁴ Mana Yesu namulaka mbu, sholaboolerakhwo omundu Yesu ta, habula tsia wimanyisie khuMukuhani, mana orusia omusango kwa Musa yalaka, shinga obuloli khubo.

⁵ Olwa Yesu yenjira Kaperinaumi, Omusesia undi yamwitsira namusaya mbu, ⁶ Omwami omusumba wanje nomulwale ingo, nelikara, naye anyakhana muno.

⁷ Naye Yesu namuboolera, nditsa okhumuhonia.

⁸ Omusatsa oyo naboola mbu, shokhoyere mbu, witse hashitsafu wanje ta, habula boola butsa likhuwa naye omusumba wanje alahona. ⁹ Okhuba siesi endi omundu ouli hasi wobunyali, emboolera uno tsia, naye atsia. oundi mbu, yitsa naye yetsa, ne khumusumba wanje mbu khola lino, naye akhola.

¹⁰ Olwa Yesu yaulira yako, yauka muno, nababoolera, abamulondakhwo, toto mwene ebaboolera, eshiri okhulola obusubiri shinga buno kata mwiIsraeli. ¹¹ Nasi ebaboolera mbu, abanji baletsa okhurula ebukwe nende mumbo, nabo balekhala nende Abrahamu, nende Isaka, nende Yakobo muBwami bwoMwikulu. ¹² Nabo abana boburuchi balasukunwa erwanyi mushirima eshimali, ebweneyo balekhula nibalumasia ameno. ¹³ Naye Yesu namuboolera, tsie, kabe kario shinga olwa osubire. Naye omusumbawe nahona ebise yibo.

¹⁴ Ne olwa Yesu yetsa munzu wa Petero, yanyola nyinamwana omukhayewe nali nende omuyeka nakonire. ¹⁵ Namutirakhwo nakwo niimulekha, nasinjira nabakhalabanira.

¹⁶ Olwa kwola mukoloba, bamurerira abanji abanyasibwa nebishieno, naye nalonda ebishieno nelikhuwalie, nahonia bosi abali abalwale. ¹⁷ Mbu, kosibwe akaboolwa nende Isaya Omulakusi mbu, ye mwene yabukula obuteshere bwefwe, nabukula amalwale kefwe.

¹⁸ Ne olwa Yesu yalola omukanda omunji, yalaka mbu, barule batsie aundi. ¹⁹ Omuhandichi undi namwitsira, naboola Omwami, nditsa okhulondakhwo buli ewa otsia,

²⁰ naye Yesu namuboolera, amabwe kali nende obwina, amayoni kokhwikulu kali nende efitsu, naye Omwana womundu abula ewa ara omurwe ta.

²¹ Mulala khubechibe namuboolera, Omwami, lekha enzie eyabire Papa wanje.

²² Naye Yesu namuboolera, nondakhwo, lekha abafu bayabirane.

²³ Ne olwa yenjira muliaro, abechibe nibamulondakhwo. ²⁴ Ne lole, khwali nende omuyeka omukhongo khunyanza, mbu, inyanza niifunikhwa namarunda, naye yali nakonire. ²⁵ Abechibe nibamwitsira, nibamubusia, nibamuboolera, Omwami, khuhonie, khutiba.

²⁶ Naye nabakalusia, mbushina nimuli noburi? Enywe bobusubiri obutiti, mana nabukha nahalabira omuyeka nende inyanza, mana nikhuba nomulenjero.

²⁷ Mana abandu nibauka, nibaboola, uno nomundu wambiashina, mbu, kata omuyeka nende inyanza bimuulira?

²⁸ Olwa yali namalire okhwambukha injerekha, mwitokho lindi lia Genesereti, bamwakanira babiri abali nebishieno, nibarula mubirindwa, abokhurisia muno mbu, abulaho omundu owakhabirire khunjira eyo ta. ²⁹ Nabo lola bayula nibaboola mbu, oli orie ninefu Yesu, Omwana wa Nyasaye, witsire okhwononia ebise biefwe nibishiri okhuula? ³⁰ Ne ahambi ninabo khwali nende lituli lietsimbitsi nibalisinjia.

³¹ Kho ebishieno nibimusaya nibiboola mbu, khurume mutsimbitsi.

³² Naye nabiboolera, tsie, nabio nibimurulamwo nibitsia mutsimbitsi, ne lole, lituli liosi lietsimbitsi niliirukha nilitsia munyanza likhamira mumatsi. ³³ Nabo abayi niberukha nibatsia mwitokho, nibaboolera buli mundu akali nikekholeshe khutsimbitsi tsiali nebishieno. ³⁴ Ne lole, Litokho lilamba niliitsa okhumwakanira Yesu, ne olwa bamulola, bamusaya mbu, arule mwitokho liabwe.