¹ Mulakhalaka eshina ta, mbu mana mwesi muleshe okhukhalachirwa. ² Shichira shingalwa mukhalachira abashienyu eshina, nindio mwesi mulakhachirwa, khandi eshichero shia mucherera, mwesi mulachererwa murio. ³ Mbushina nolola akhakokha khali mumoni yowashio, ne nolalola eshirundu shiri mumoniyo ta? ⁴ kata wakhaboolera orie owashio mbu, lekha ekhuyinie akhakokha khali mumoniyo, olwa oli neshirundu mumoni yo? ⁵ Ewe omwikati, ranjirira oyinie eshirundu shiri mumoniyo kho mana olole obulayi akhakokha khali mumoniyo washio.

⁶ Shimulaheresia tsimbwa ebindu ebithienukhu ta, khandi mulasukunira khwo Tsimbitsi tsilulu tsienywe ta tsiakhashukhana tsiasenekana butswa mubirenje biatsio, ne tsikalukhana okhubasera enywe.

⁷ Saba mana mulahebwa, khabe mana mulanyoola, khong'onde mana mulekulirwa omuliango. ⁸ okhuba buli Omundu usaba alahebwa, ne, yesi oukhaba alanyoonyola, naye ulia oukhong'onda, alekulirwa omuliango.

⁹ kata niwina khwinywe owa Omwanawe olwa amusaba omukate naye namuheresia Lichina? ¹⁰ noho namusaba Inyeni naye namuheresia Inzokha? ¹¹ kho enywe kata olwa muli ababii murio mumanyire okhuheresia abana benywe ebihanwa ebilayi, kho toto mwene nindio Senywe ouli Mwikulu shialabaheresia ebindu ebilayi muno khubali abamusaba?

¹² kho kosi amalayi akamukhaaba okhukholerwa nende abashienyu, mwesi mubakholere murio, lino nelilako khandi Obulakusi.

¹³ Mwinjirire mushiribwa eshinyerere, okhuba eshiribwa eshibambalifu, khandi Injila neyibambufu eyichomire mubusasishi, mana khandi niyo eya abandu abanji balondangakhwo. ¹⁴ Nebutswa eshiribwa eshinyerere khandi Injira inyerere, niyo eyinjira mubulamu, ne, nibatiti abachilondakhwo.

¹⁵ Mwihenjeresie nabalakusi bobubeyi, abetsa khwinywe nibefwalire shinga Amakondi, ne mukari nibali Ebisutse ebihalaba. ¹⁶ Mulabamanya khubiamo biabwe, abandu bakhanoka Emitsabibu khumafumire? Nohomba amakhuyu okhurula khumarakalu? ¹⁷ kho omusala omulayi kwamanga ebiamo ebilayi, khandi Omusala omubi kwamanga ebiamo ebibi. ¹⁸ Omusala omulayi shikunyala okhwama ebiamo ebibi ta, nohomba Omusala omubi okhwama amatunda amalayi ta. ¹⁹ Buli omusala okulama ebiamo ebilayi ta, kularemwa nikusukunywa mumuliro. ²⁰ khulweshio mulabamanya khubiamo biabwe.

²¹ Shali buli Mundu ounanga Omwami, Omwami oulenjira mubwami bwoMwikulu ta, nebutswa ulia oukhola kelienya lia Papa ouli Mwikulu. ²² Abanji bakhabole khunyanga eyo, Omwami, Omwami, shikhwaboola obulakusi Mulira lio? khandi Mulira lio khwalonda ebishieno? khandi muliralio khwakhola amangalimwa? ²³ Nasi endibaboolera, Shemumanyire ta, enywe abakholi betsimbi, murulekhwo.

²⁴ Kho buli Mundu oulira amakhuwa kanje, nende okhukakhola, ndakhamucherasie nende Omundu Omuchesi owombakha Inzuye Khulwanda. ²⁵ Mana olwa Ifula yitsa nende emikhula nomuyeka nikuhutsa nikukhupa khunzu eyo, shiilakwa ta, okhuba yombakhwa khulwanda. ²⁶ Nebutswa yesi yesi oulira amakhuwa kanje, mana nalakakhola tawe, alaba shinga ulia Omundu Omusiru owombakha Inzuye khumuyeshe. ²⁷ Ne olwa Ifula yakwa nachio emikhula nichibira, Imbumbuyeka niyihutsa, nibikhupa Inzu eyo, nayo niyikwa hasi, ne okhukwa khwayo nikhuba okhukhongo muno.

²⁸ Ne olunyuma lwa Yesu okhwechesia amakhuwa kano, abandu bauchisibwa muno nende amechesioke. ²⁹ Shichira yechesia shinga ulia ouli nobunyali, ne shiyali shinga abechesia bandi ta.