¹ Kamala nikekholekha olwa Yesu yali niyakhamala okhuruma ekhumi nababiri yarulaho natsia mumatokho kandi okhwechesia nende okhuyaala.

² Ne olwa Yohana omubatisi yaulira nali mumbohe, akaKristo yali nakholanga, yaruma babiri khubechibe. ³ Nibamureba, mbu, niwe owaboolwa mbu witsa? nohomba khulindirire oundi?

⁴ Yesu nabakalusia ari, "mutsie muboolere Yohana, akamuhuliranga nende akamulolanga, ⁵ ababofu banyolire okhulola, khandi abalema bachendanga, abobuchere basiywa, khandi abekala amarwi baulira, nabo abafu balamusibwa, nabo abamanani bayalirwa oburume obulayi. ⁶ Naweikhabi omundu yesi oulesichirasibwa khulwa isie tawe".

⁷ Ne olwa balekhana, Yesu yachaka okhubaboolera khumakhuwa kaYohana," nishina eshia mwatsia okhulola mushitsimi? olubembe nilushinibwa nende omuyeka noho? ⁸ Mwarula nimutsia okhulola shina? Omundu owifwalire tsingubo tsindayi? lole balia abefwala tsingubo tsindai bali Munzu yaBaruchi. ⁹ nebutswa mwatsia okhulola shina? Omulakusi? toto mwene emubaboolera mbu, aliho hano oushira Omulakusi. ¹⁰ Uno niye owamahandiko kaboolanga khuye, 'lola eruma omurume wanje imbeliwo, naye alakasia Injira yo'.

¹¹ Toto emuboolera mbu, Yohana omubatisi nomukhongo okhushira Omundu yesi owebulwa noMukhasi, nebutswa ulia omutiti muBwami bwaNyasaye, nomukhongo okhumushira! ¹² Ne okhurula mutsinyanga tsia Yohana omubatisii, okhula bulano, Obwami bwaNyasaye nobwamani, nabo abamani nibo ababutira. ¹³ Shichira Abalakusi nende amalako balakula okhula khu Yohana; ¹⁴ ne nimuba mwakhafuchirira, mbu niye Eliya owali mbu alitsa. ¹⁵ Ne ulia ouli namarwi kokhuhulira, lekha ahulire.

¹⁶ Nebutswa ndakhacherasiakhwo shina olwibulo luno? Shinga abana abekhale khushiiro, nibalanjirisia abashiabwe, ¹⁷ "nibaboola mbu, khumwimbiire, ne shimushinire ta, khwikhulire, ne shimuberere ta. ¹⁸ Ne Yohana yetsa nalalitsanga khwo kata okhunywa ta, nibaboola mbu, 'ali nende ebishieno.' ¹⁹ Omwana woMunda yetsa nalitsanga khandi nanywetsanga, baboola mbu, Omundu 'omulangu khandi omumesi, omwitsa wabasololi bobushuru nende abononi!' nebutswa obuchesi bumanyikhana khumirimo chiabwo."

²⁰ Mana nachaka okhuyibira amatokho kayakhola mwo emirimo chie chiamakana shichira shibekalukha sia khwo nibalekha obwononi ta. ²¹ Wowe, enywe abakorezini! Wowe enywe abaBethisaida! okhuba ebikhole biamakana biakholwa mwinywe nibiakhakholirwe Tiro nende Sidoni, khane bakhekalukhasiye khale nibefwala amakunia nibepuka likoshe. ²² Ne butswa emuboolera mbu, Tiro nende Sidoni bakhaberwe tsimbabasi khunyanga yobuyasibwi okhushira inywe. ²³ Nenyu, Kaperinaumu, mwenya okhwichinga okhula Mwikulu, muleshibwa okhula emakombe, kali amakhongo kakholwa mwinywe nikaba nikakholwa Sodoma, liakhabere nilishiriho okhula bulano. ²⁴ Nasi emuboolera mbu abandu baSodoma bakhalolerwa tsimbabasi khunyanga yokhuyasibwa okhushira inywe.

²⁵ khubise ebio Yesu nakalusia naboola mbu, orio muno Papa Omwami woMwikulu nende Eshibala, wabisa amakhuwa kano abachesi nende bobumanyirisi, nobafunulira abatiti. ²⁶ okhuba Papa kakhukasira mumonitsio.

²⁷ Papa wanje yamberesia ebindu biosi, abulaho oumanyire Omwana, habula Papa, khandi abulaho oumanyire Papa nalali Omwana, nende yabo bosi abaOmwana afunilira. ²⁸ Yitse khwisie Inywe mwesi abachonyire nemisiko emisiro, nasi ndalabaheresia obuhulushi. ²⁹ mubukule likokolo lianje mana mweche mwisie, okhuba endi omuholo khandi omwongoli womwoyo, ne, mulanyola obuhulushi mumioyo chienywe. ³⁰ Okhuba likokolo lianje neliangu, khandi omusiko kwanje nomwangu.