¹ Ne olwa yali niyakhalaanga abechibe ekhumi nababiri, yabaheresia amani kokhulonda ebishieno nende amani keshirima, nokhuhonia buli imbia yosi yamalwale nende obuteshere. ² Nako amera kabechibe ekhumi nababiri ngakano, Simioni, owalangwa mbu Petero, nende Anderea omusiani wabwe Yakobo omwana wa Zebedayo, nende Yohana omusiani wabwe, ³ Filipo nende Batulumayo, Tomaso nende Matayo omusololi wobushuru, Yakobo omwana wa Alfayo, nende Tsadayo. ⁴ Simoni omukanani, nende Yuda Iskarioti oulimukhoba.

⁵ Abenabo ekhumi nababiri, Yesu yabalaka nabaruma naboola, mulatsie mutsinjira tsia abamahanga, kata mumatokho kaba Samaria mulenjiremwo ta. ⁶ Ne mutsie mubana baIsraeli bakora, ⁷ ne olwa mutsia, yaale nimuboola,"Obwami bwoMwikulu busitire ahambi". ⁸ Honie abalwale, siiye bobuchere, lamusie abafu, londe ebishieno, muherwe butswa, nenyu hane butswa. ⁹ Mulachinga ifetsa, noho itsahabu, noho tsisende mumiloloti chienywe ta. ¹⁰ kata okhuchinga omuloloti khuluchendo lwenywe, kata tsingubo tsibiri, noho ebilaro noho indabushi okhuba omukholi akhoyera omurungo. ¹¹ Ne mwitokho liosi nende litala eliamwinjiramwo, reberesie omundu womulembe ulimwo, menyemwo okhuula olwamurulamwo. ¹² Ne olwamwinjira munzu omwo, mushesie ¹³ ne munzu iba niikhoyere, leshe omulembe kwenywe kubemwo, ne nalabamwo oukhoyere ta, omulembe kwenywe kubakalushire. ¹⁴ Naye yesi olabenjisia ta, nohomba okhuhulira amakhuwa kenywe ta, olwamurula mwitala ero, mubungulule olufu lwebirenje bwenywe. ¹⁵ Toto mwene ebaboolera, buliba obulai khushibala shiaSodoma nende Gomora tsinyanga yitso okhushira mwitokho elo.

¹⁶ Lole emuruma shinga amakondi mubisutse, mube abachesi shinga Inzokha, khandi abahola shinga Lihusi. ¹⁷ Henjeresie okhuba abandu balamuyira imberi webina, nibamukhupa mutsisinagogi tsiabwe, ¹⁸ nenyu mulairwa imberi wabaami nende wabaruchi khulwanje, shinga obuloli khubamahanga. ¹⁹ Ne olwa bamuyira imberi, mulahenda mbu mulaboolashina ta, okhuba mulahebwa khubise ebo eshiamulaboola. ²⁰ okhuba shimuli enywe ababoola ta, habula Roho wa Papa wenywe niye oulaboolera mwinywe. ²¹ Naye omundu alakhoba omwana wabwe omusiani wabwe okhwirwa naye papa ario khumwanawe, nabo abana balarulirakhwo abebusi, nibabakhola okhwirwa. ²² Nenyu mulasirwa nende abandu boosi khulwa elira lianje, naye owifwira okhula khubumalirishi, alahonibwa. ²³ Ne olwa bamusandia mwitokho lino, yirushire mulindi, okhuba ebaboolera mbu, mulaba nimushiri okhumala amatokho kosi kaiIsraeli, naye omwana womundu arulilira.

²⁴ Omwechi shali ikulu womwechesiawe ta, ²⁵ Nebulayi mbu omwechi abe shinga omwechesiawe, naye omusumba shinga Omwami, nibaba nibalanjire omwami weinzu mbu, Belizabuli, balalanga barie abeinzuye?

²⁶ Mularie tawe, okhuba shibulaho eshifunikhwa eshilanyala okhufunulwa, nasho eshibiswa eshilanyala okhunyolekha ta. ²⁷ Aka emuboolera mushirima, kaboole mubulafu, ne eshia mumonyerwa mumarwi, shiliyalwa khushitsafu shienzu. ²⁸ Ne shimulabaria balia ebeera omubiri, nibalanyala okhwira omwoyo ta, habula rie ulia ounyala okhwira omubiri nende omwoyo biosi emakombe. ²⁹ Tsiminyi tsirano shitsikusibungwa ling'ondo? Ne kata ndala khuyo shiinyala okhukwa hasi papa wenywe nalamanya ta; ³⁰ ne kata liswi liosi liemirwe chienywe liabalwa. ³¹ Mularia tawe, muli bobukusi muno okhushira tsiminyi. ³² Omundu yesi ounziyama isie imberi wabandu, nasi siesi ndakhamwiyame imberi waPapa wanje Mwikulu. ³³ Naye omundu yesi niyangana imberi wabandu, nasi siesi ndilimwikaana imberi wa Papa wanje woMwikulu.

³⁴ Mulapaare mbu ndietsa okhurera omulembe mushialo ta, shindietsa okhurera omulembe ta, habula olukanga. ³⁵ Okhuba ndietsa okhwaukhasia omundu nende samwana, naye omukhana nende nyinamwana, naye omukhasi womusiani nende mama nyakhufiala. ³⁶ Ne omusuku womundu niweinzuye. ³⁷ Owachama samwana noho nyina okhushira sie, shiakhoyere ta, naye owachama omukhanawe noho omusianiwe okhushira sie, shakhoyere isie ta. ³⁸ Oulabukula omusalabakwe mana yanondekhwo, shakhoyere isie ta. ³⁹ Oulinda obulamubwe, alabukosia, naye oukosia obulamubwe khulwa isie, alabunyoola.

⁴⁰ Oubenjisia inywe, yanyinjisiye isie, naye ounyinjisia isie, amwinjisiye owaruma. ⁴¹ Owinjisia omulakusi mulira liomulakusi alanyoola eshihanwa shiomulakusi. Naye owinjisia omulunjishi mulira liomulunjushi alanyoola eshihanwa shiomulunjishi. ⁴² Naye ouhana khumulala khubatiti bano, eshikombe shiamatsi amanyifu, mulira liomwechi, toto ebaboolela shialakosia eshihanwa shie ta.