6
(Ajaran Tentang Membori)

1 “Waspadalah delom melakuko kewajipon agamome de hadopon mendesio, jengon dengan meksud untuk de koleh uleh urang loin munye upa iyo. Kowe hopi akan menerimo upah deri Bepakme nyo de serga. 2 Ulehnyo iye tekalo kowe membori sedekah, jengon memboikko trompet de hadoponme upa nyo urang-urang munafik lakuko de sinagoge-sinagoge ngan de jelon-jelon empuknyo enye de puji urang loin. Ake mengehatoko nyo sebonornyo dengan kowe bahwa enye sodah menerimo upahnye. 3 Cuma sebeleknye, tekalo kowe membori sedekah, jengon biarko tangan kirime mengetahui ape nyo tangon kananme lakuko. 4 Enggak konyo sedekahme iye tekerawo ngan Bepakme nyo ngolehnyo tekerawoi iye nak memboriko upah dengan kowe.

(Ajaran Tentang Bedoa)

5 “Ngan, waktu kowe bedoa, jengon upa urang-urang munafik kerana enye agom togok ngan bedoa de sinagoge-sinagoge ngan de sudut-sudut jelon empuk de kole urang loin. Ake mengehatoko iye sesunggohnyo mike la sodah menerimo upahnye. 6 Cuma sebeleknye, kapan kowe bedoa, masuklah kedelom kamarme ngan katuplah pintunye, ngan bedoalah dengan Bepakme nyo ado de tempat tekerawo, mangko Bepakme nyo ngoleh nyo tekerawo iye akan memboriko upah ngan kowe. 7 Ngan, tekalo kowe bedoa, jengon menggunako kehehato nyo hopi ado artinye, upanyo de lakuko urang-urang nyo hopi mengenal Allah, sabab enye mengiro dengan lobot kehehato, enye akan de dongor ko. 8 Karana iye, jengon upa iye karana Bepakme sajo tahu ko ape nyo kou perluko sebolum kowe mintak kepodo-Nye. 9 Bedoalah upa iye,
“Bepak kami nyo de serga,
Dekuduskolah nama-Me.
10 Detonglah kerajaon-Me,
jedilah kendok-Me debehumi upanyo de serga.
11 Borilah kamie, pado hari nie,
makonon kamie nyo secukupnye.
12 Ngan, ampunilah kesalohon-kesalohon kamie,
upa kamie jugo mengampuni urang-urang nyo besaloh dengan kamie.
13 Ngan, jengonlah ngundo kamie ke delom pencobaon,
cuma lapaskolah kamie deri nyo jahat.
Ulehnyo Kowelah Sang Pemilik Kerajaon, ngan kuasa, ngan kemuliaon sampoi selamo-lamonye. Amin.”

14 Sabab munye kowe mengampuni kesalohon-kesalohon urang loin, Bepak sorgawime jugo akan mengampunime. 15 Cuma sebeleknye, munye kowe hopi mengampuni kesalahon-kesalahon urang loin, Bepakme jugo hopi akan mengampuni kesalahon-kesalahonme.
(Sikap Tekalo Bepuaso)

16 “Ngan, tekalo kowe bepuaso, jengon muram upa urang munafik ulenyo enye mengubah mokanye enggakkonyo dekoleh sedang bepuaso uleh urang loin. Ake ngehatoko nyo sebonornye ngan kowe bahwa enyelah menerima upahnye. 17 Cuma sebeleknye, kowe, tekalo bepuaso, minyakilah kepalome ngan besuhlah wajahme 18 enggakkonyo puasome hopi dekoleh urang, hambok uleh Bepakme nyo ado de tempat nyo tekerawo. Ngan, Bepakme nyo ngoleh perbuatonme nyo tekerawo iye akan membelosnye ngan kowe.”
(Kumpulkolah Reto de Surga)

19 “Jengon menimbon untuk dirime dewek reto de behumi, tempat ngengat ngan karot merosak, ngan tempat pemaleng membongkar serta memaleng. 20 Cuma sebeleknye, kumpulko untuk dirime dewek reto de surgo, tempat ngengat ngan karot hopi merosak ngan tempat pemaleng hopi membongkar serta memaleng. 21 ulenyo de tempat retome berado, de sane jugo hatime berado.”

22 “Mato adolah lampu tubuh. Jedi, munye matome beik, segelo badanme nak menjedi tarang. 23 Cuma sebeleknye, munye matome jahat, segelo badanme akan ponoh kekolomon. Jedi, munye tarang nyo seharusnye ado padome adolah kekolomon, alangku nemannyo kekolomon iye.”

24 “Hopi ado urang nyo depot melayani duo tuan ulenyo nye nak membenci tuan nyo sikuk ngan mengasehi nyo loin, atau nye nak setio dengan tuan nyo sikuk ngan meremeko nyo loin. Kowe hopi depot melayani Allah ngan mamon.”
(Jengon Kowe khawatir)

25 “Sabab iyelah Ake bekehato ngan kowe, jengon kuatir tentang hidopme, ape nyo nak kou makon atau ape nyo nak kou minom. Upa iyelah jugo tentang tubuhme, ape nyo nak kou pakoi. Bukonkah hidop lobih penting deri pado makanon, ngan badan deri pado pakoiyon? 26 Kolekolah burung-burung de langet nyo hopi menabur, hopi menuoi, ngan hopi mengumpulko ke delom lumbung, hambuk Bepak sorgawime membori mike makon. Bukonkah kowe lobih berego deri pado enye? 27 Siapekah de antaro kowe nyo ulenyo kuatir depot menamboh sehasta ngan umurnye?

28 Ngan, munye pakaion mengka kowe kuatir? perhatiko bunga bakung de padang, upamone enye tumbuh, enye hopi bekerejo ngan jugo hopi memintal, 29 Cuma Ake mengehatoko dengan kowe bahewo Salomo delom kemuliaonnye pun hopi bepakoion upa saloh satu deri bunga-bunga iye. 30 Jedi, munye rumput de padang, nyo ado sehari nie ngan pepagie detohukko ke delom perapion, Allah meringkasinye sedemikion rupa, bukonkah terlobih lagi kowe, hai kowe kurang iman? 31 Kerana iye, jengon kowe kuatir dengan bekehato, “Ape nyo nak kami makon?”, atau “Ape nyo nak kami minom?”, atau “Ape nyo nak kami pakoi?” 32 Sabab, bengso-bengso loin mendelok-delok segelo nie ngan Bepak sorgawi me tahuko munye kowe membutuhko segelo nie. 33 Cuma sebeleknye, deloklah dehulu kerajaon ngan kebonoran-Nye, ngan segelo iye nak detambohko dengan kowe. 34 Jedi, jengon kuatir tentang ari pepagi ulenyo hari pepagi nak mengawatirko dirinyo dewek. Cukuplah satu ari dengan kesusahonnyo dewek.