¹ Tarus Yesus dingicakng di Roh ka padang gurun untu di cobai'k ibalis. ² Apas Yesus bapuasa ampat puluh ari ba ampat puluh maam, ahire kaparaatn lah Yesus. ³ Lalu ataknglah si pancoba koa tarus bakata ka-Ia: “Kade Kao Anak Jubata, parentahaatnlah biar batu-batu nyian jaji roti.”

⁴ Tapi Yesus nyahuti'k: “Ada tatulis: Manusia idup buke dari roti maan, tapi dari satiap firman nang kaluar dari moot Jubata.”

⁵ Tarus ibalis ngicakng Ia ka Kota Suci ba nampatatn Ia ka bumbungan Rumah Jubata, ⁶ lalu bakata ka-Ia: “Kade Kao Anak Jubata, jantuatnlah dirik-Nyu ka babah, barang ada tatulis: Parihal Kao, Ia maok marentahatna'k malaekat-malaekat-E nyingkap Kao ka atas kokote, biar pahaNyu ame tarantuk ka batu.”

⁷ Yesus bakata ka ia: “Ada pula'k tatulis: Amelah kao nyobaik Tuhan, Jubatanyu!”

⁸ Lalu ibalis ngicakng Ia ugak ka atas bukit nang sidi tingi ba neeatn ka Ia samua karajaan dunia ba kamegahatne, ⁹ tarus bakata ka Ia: “Samua koa maok ku bareaatn ka Kao, kade'k Kao sujut nyambah ka aku.”

¹⁰ Tarus bakatalah Yesus ka ia: “Darilah, ibalis! Barang ada tatulis: Kao harus nyambah Tuhan, Jubatanyu, ba kahe ka Ia maanlah kao ba bakti!”

¹¹ Lalu ibalis ningaatn Ia, tee lah malaekat-malaekat atakng melayani'k Yesus

¹² Tapi waktu Yesus nangar, kade Yohanes udah dinangkap, ngasisilah Ia ka Galilea. ¹³ Ia ningaatn Nasaret ba diapm ka Kapernaum, ka tapi dano, ka daerah Zubulon ba Naftali, ¹⁴ Biar ganaplah firman nang di nyampeatn di nabi Yesaya: ¹⁷ Dari waktu dikoalah Yesus maritaatn: “Batobatlah, barang Karajaan Saruga udah samak!”

¹⁸ Sawaktu Yesus bajaatn nutuatni'k danau Galilea, Ia nee dua urakng adik-baradik, yakoa Simon nang di nyaruk Petrus, ba Andreas, adi'e. Kabatne agik nabaratn jala ka danau, barang kabatne panjala ikatn. ¹⁹ Yesus bakata ka kabatne: “Ijeklah, tunaan Aku, kao maok Ku jajiatana'k panjala manusia.” ²⁰ Tarus kabatne pun bijak ningaatn jalae tarus nunaan Ia.

²¹ Apas Yesus ampus dari koa, Ia nee ugak dua urakng adik baradik, yakoa Yakobus anak Zebedeus ba Yohanes adi'e, basama-sama apak kabatne koa, Zebedeus agik ngarapiatn jala ka daapm parahu. Yesus nyaruik kabatne. ²² Tarus kabatne bijak ningaatn parahu ba apak e, lalu nunaan Ia.

²³ Yesus pun bakuliling ka saluruh Galilea; Ia ngajar daapm rumah-rumah ibadat ba maritaatn Injil Karajaan Jubata ba ngilangan sagala panyakit ba kalamahan ka antara bangsa koa. ²⁴ Lalu tasiarlah kabar parihal Ia ka saluruh Siria ba di ngicaknglah ka Ia samua urakng nang buruk kaadaane, nang mandarita babagai panyakit ba sinsara, nang karasukatn, nang gila babotn, nang lumpuh, lalu Yesus nyamuhan dangan samua koa. ²⁵ Tarus urakng manyak rami-rami nunaan Ia. Dangan baatangan dari Galilea ba dari Dekapolis, dari Yerusalem ba dari Yudea ba dari sabarang Yordan.