¹ Pas waktu koa muoklah Yohanes Pambaptis ka padakng gurun Yudea ia maritaatn: ² “Batobatlah, barang karajaan Saruga udah samak!” ³ Sasidie ia koa lah nang dimaksut di nabi Yesaya sawaktu ia bakata: “Ada suara nang ngampak-ngampaki ka padakng gururn: Siapatnlah maraga untu' Jubata, ocoratnlah maraga untu' Ia.”

⁴ Yohanes make jubah bulu onta ba ikat pinggang kuit, ba makanane buntak ba madu daapm abut. ⁵ Tarus ataknglah panduduk Yerusalem, dari saluruh Yudea ba saluruh daerah sakitar sungai Yordan. ⁶ Lalu sambi ngakoik dosae, dangan koa dibaptis di Yohanes ka sungai Yordan.

⁷ Tapi waktu ia nee manyak urakng Farisi ba Saduki atakng untu di baptis, bakatalah ia ka kabatne: Hoi kao katurunan uwar baludak. Sae gek nang ngataatn ka kao, kade kao bisa dariaatn diri'k nyu dari ukuman nang ana atakng? ⁸ Jadi hasilatn lah buah nang sasuai ba pertobatan. ⁹ Ba amelah kao kira, kade kao bisa bakata daapm atinyu: Abraham koa kan apak kami! Sasidie aku bakata ka kao: Jubata bisa nyajiaatn anak-anak untu Abraham dari batu-batu nyian! ¹⁰ Kapak udah dinyiapatn ka akar puhutn, ba satiap puhutn nang ina mangasilatn buah nang baik, pasti ditabakng ba dibuakng ka daapm api.

¹¹ Aku maptis kao ba aik untu' tanda pertobatan, tapi Ia nang atakng ana dari aku labih ba kuasa dari pada aku, aku ina pantas ngapasatn kasut-Te. Ia ana maptis kao ba Roh Baraseh ba api ugak. ¹² Alat panampi'k udah ka kokot-Te. Ia mao'k marasehatn tampat pangirikatn-Ne ba ngomoan gandum-Me ka daapm angko, tapi dabu jerami koa ana Ia tunu ka daapm api nang ina tapadaman.

¹³ Lalu ataknglah Yesus umpat dari Galilea ka Yordan ka Yohanes untu' di baptis dihe. ¹⁴ Tapi Yohanes maian Ia, jare: “Akulah nang pararu dibaptis di-Nyu, ngahe Kao nang atakng ka aku?

¹⁵ Tarus Yesus nyahuti', Jakata-E ka Ia: “Biarlah hal koa jaji, barang yakoa lah sapatute diri'k ganapatn saluruh kamaoan Jubata.” Yohanes pun nuruti-Ia.

¹⁶ Apas di maptis, Yesus bijak ka uwar dari aik pas waktu koa ugak angit tabuka' ba Ia nee Roh Jubata aya burukng dara turutn ka atas-E, ¹⁷ tarus kadangaratnlah suara dari saruga nang ngataatn: “Nyianlah Anak-ku nang Ku ngasihi', ka Ia lah Aku berkenan.”