¹ Mweso nkungu begheshibwa bashighelelagha kweli Yesu nu kumubusha: Nai u mukulu munene mu bukota bw'ighulu?

² Yesu amanagha mwana muto nu kumubika mukantighi nabo, nu kutenda: ³ Nababula bulili, ndi tamwaghaluka nu kuba anga bana bato tamukingila mu bukota bw'ighulu. ⁴ Uchasula olya ukimbotia anga mwana muto, akaba mukulu munene mu bukota bw'ighulu. ⁵ Nu olya wasekela mwana muto anga whono kw'ishina lyani ansekela ine'inene.

⁶ Tondo ndi muntu umoi akitasha umoi kw'abo bana bankatisha, bwatunganana kweli ashukwe lughikililo mwikoshi lyaghe, nu kulekelwa mwishiba lya kitatenge. ⁷ Musambo mu kisi kubushi bw'ikitalo! Kubuno bwatunganana makitalo mabe, tondo musambo ku whoso muntu wa makitalo. ⁸ Ndi kuboko kobe ali kughulu kobe kwaba nsila sa kukwinda mu bwaghi ketula ko, nu kalekele bulai nowe. Bwaswagha kuba kasokoluma na kuba na maghulu ali maboko mabili nu kulekelwa mw'ishiba lya kaya ka milyalya. ⁹ Nu ndi liso lyobe u nsila sa kukwingisha mu bwaghi, lungula lyo nu lekela lyo bulai nowe; bwaswagha ku weli kwingila mu kalamo na liso limoi, na kuba na miso mabili nu kulekelwa mu mutula wa kaya.

¹⁰ Mwindange na kwenegha umoi kubano bato, kubuno nababula buno baghenshi babo ba munda n'ighulu bakumona chaso cha Tata wani wa mw'ighulu. ¹¹ Kubuno Mwana wa muntu ashwile konia kicho chashiminde. ¹² Buni bumukulenganya? Ndi muntu ite mbuli ighana nu emoi sa shimila ntana shigha eso makumi mwenda nu mwenda ku minduko nu kwenda kulond'eso sa shiminde? ¹³ Nu ndi asimona, bulili namubula buno seso samubogyabogya kughimba makumi mwenda nu mwenda sitashiminde. ¹⁴ Ububo, so winu wa munda n'ighulu ntakushima umoi kwabo bato ashimile.

¹⁵ Ndi mwisakwinu akita bwaghi, nda umukalaghule uwe nawe umpanga. Ndi akwongwa nti wonia mwisakwinu. ¹⁶ Tondo, ndi ntakongwa, tola muntu umoi ali babili inga bitondo binsai bikitwe mu mutendeshi wa bateneneki babili ali basatu. ¹⁷ Nu ndi anana kubongwa, sambalila Kanisa; nu ndi anana lingo kwongwa Kanisa abe ku uli anga umoi utakatisha nu muntu wa tughutughu. ¹⁸ Na babula bulili, kinsai kimukakanda ghano gha kisi, kikakandwa mw'ighulu, nu kinsai kimukakandula ghano gha kisi, kikakandulwa mw'ighulu. ¹⁹ Nababula lingo buno ndi babili ku benywe bimilana kusegha kikai kimoi ghano gha kisi, nti beleshibwa cho na Tata wa mw'ighulu. ²⁰ Kubuno ndi babili ali basatu bakulumana kw'ishina lyani neli munkatighi nabo.

²¹ Agho Petelo ashighelelagha kweli, nu kumubula: Mukota ngendo'inga inashighilila mwisakwitu olya wankitila bwaghi? Sinaba ngendo mutubakamo?

²² Yesu amubulagha: Nshakubula ngendo mutubakamo, tondo kwika ku makumi mutubakamo ngendo mutubakamo. ²³ Uchasula, bukota bwa mw'ighulu bwasusana na mwami umoi walondagha kughansa bikulo ku bakiti baghe. ²⁴ Mwa mu kughansa bamwekelagha umoi w'isombyagha talanta elefu ikumi. ²⁵ Bwatabagha na bya kuligha, mukota waghe amumekulagha aghushwe, we, mukashi waghe, bana baghe, nu binsai byabagha nabyo, nw'indiko lilighwe. ²⁶ Mukiti wa nkashi indekelagha gheli, kumukomela mashwe nu kumubula: Mukota: Ndindile nakulighe binsai. ²⁷ Mu lukogho lwaghe, Mukota wa ghoso mukiti amushighagha ende, nu alighaghe lil'indigho. ²⁸ Mukutuka agho uso mukiti akulumana na munabo wite indiko lyaghe lya dinali ighana. Amukatagha nu kumughonda ikoshi, mu kumubula: Ligha byani biwite.

²⁹ Munabo indekelagha ghansi nu kumulilila: Ndindile nakulighe. ³⁰ Tondo, munabo ntashimagha, a mulekelagha mu kahombo, kwikila busi bwakaligha indiko lyaghe. ³¹ Bakiti banabo mu kulola ku byatinga, bonganwagha bubibu, nu bendagha kusambalila mukota wabo binsai byatingile.

³² Agho mukota amanagha whoso mukiti, nu kumubula: Mukiti mubi, na kushighilagha indiko lyobe linsai, kubuno wandililagha; ³³ Nuwe ntuna kwilinde muninu lukogho anga buna kukwilagha lukogho? ³⁴ Nu mukota waghe, ashibukagha, amwesanagha ku bitani, kwikila alighe binsai. ³⁵ Ububo bukabakita Tata wani wa mw'ighulu, ndi umoi ku benywe ntashighilila mwisakwabo na mutima waghe unsai.